ހުޅުމާލެގައި ނުކުޅެދުންތެރިކަން ހުންނަ ފަރާތްތަކައް ހަދާ "އެމްޕަވަމަންޓް ހަބް" ގެ މަސައްކަތްތައް ނިންމައި ޖުލައި މަހުގެ ތެރޭގައި ހުޅުވުމަށް މަސައްކަތް ކުރަމުންދާކަމަށް މިނިސްޓްރީ އޮފް ހެލްތު، ފެމިލީ އެންޑް ވެލްފެއަރއިން ބުނެފިއެވެ.

މި ހަބް ހަދަން ނިންމާފައިވަނީ، ހުޅުމާލެ ފޭސް 2 ގެ އަމާން އުދަރެސް ފްލެޓްތަކުގެ 7 ވަނަ ޓަވަރުގެ 1 ވަނަ ފަންގިފިލާގައެވެ.

މި އެމްޕަވަމަންޓް ހަބްގެ މައިގަނޑު އެއް މަގުސަދަކީ ނުކުޅެދުންތެރިކަން ހުންނަ ފަރާތްތަކަށް ބޭނުންވާ މަސައްކަތުގެ ތަޖުރިބާ އަދި ހުނަރުތައް އެމީހުންނަށް އުނގަންނައިދިނުމެވެ. އަދި ނުކުޅެދުންތެރިކަން ހުންނަ ފަރާތްތަކަށް ހާއްސަ ކޮށްގެން ހޮސްޕިޓާލިޓީ، އައިޓީ، ރީޓެއިލް، ކަލިނަރީ އަދި އަތްތެރި މަސައްކަތުގެ ދާއިރާއިން ތަމްރީނުކުރުމަށްޓަކައި ހާއްސަ ޕްރޮގްރާމްތަކެއް މި ހަބްގައި ކުރިއަށް ގެންދާނެއެވެ.

އެގޮތުން، ނުކުޅެދުންތެރިކަން ހުންނަ ފަރާތްތަކުގެ އުފެއްދުންތައް ދައްކާލުމަށްޓަކައި ހާއްސަ ޖާގައަކާއި، އެ ތަކެތި ވިއްކުމަށްޓަކައި ފިހާރައެއްވެސް މި ހަބްގައި ގާއިމުކުރެވިފައިވާނެއެވެ. މީގެ އިތުރުން، ނުކުޅެދުންތެރިކަން ހުންނަ މީހުން ތަމްސީލުކުރާ ޖަމިއްޔާތަކަށް އެކިއެކި ހަރަކާތްތަކާއި ބައްދަލުވުންތައް ބޭއްވުމަށް މި ހަބްގައި ޖާގައެއް ކަނޑައެޅިފައިވާނެއެވެ.

ސަރުކާރުން ހަދަން ނިންމާފައިވާ މި ހަބް ހަދާނީ، ނުކުޅެދުންތެރިކަން ހުންނަ މީހުންނަށް ފަސޭހައިން ބޭނުންކުރެވޭނެ ގޮތަކަށެވެ. އަދި މި މަސައްކަތް ކުރުމަށްޓަކައި ހަރަދު ކުރާނީ އިސްލާމީ ކަންތައްތަކާ ބެހޭ ވުޒާރާގެ ޒަކާތު ފަންޑުންނާއި، އިޖުތިމާއީ ތަރައްގީއާއި ބެހޭ ވުޒާރާއާއި އެފްޑީސީ ގުޅިގެންނެވެ.