ހިޔާ ފުލެޓްތަކުގެ ކުލިން 2000 ރުފިޔާ އުނިކުރިއިރު ފަހި ފުލެޓްތަކުގެ ކުލިން  އުނި ނުކުރި ސަބަބުތައް ގެދޮރުވެރިކަމާ ބެހޭ ވަޒީރު ޑރ އަބްދުالله މުއްޠަލިބު ސާފުކޮށްދެއްވައިފިއެވެ. 

މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ވަނީ، ހިޔާ ފުލެޓް ތަކުގެ ކުލިން 2000 ރުފިޔާ އުނިކުރިއިރު ފަހި ފުލެޓް ތަކުގެ ކުއްޔަށް 2000 ރުފިޔާ އިތުރު ކުރީ ކީއްވެތޯ ވަޒީރު މުއްޠަލިބާ. ސުވާލު ކުރައްވާފައެވެ. 

އެ ސުވާލަށް ޖަވާބު ދެއްވަމުން ވަޒީރު ވުދާޅުވީ، ރައީސް ޔާމީންގެ ސަރުކާރުން އެޅި ހިޔާ ފުލެޓްތަކަށް އެ ސަރުކާރުން ކަނޑައެޅި ކުއްޔަކީ 5300 ރުފިޔާ ކަމަށެވެ. ނަމަވެސް ރައީސް އިބްރާހީމް މުހައްމަދު ޞާލިޙްގެ ސަރުކާރުން އެ ކުލި 7500 ރުފިޔާ އަށް ބޮޑުކުރި ކަމަށެވެ. އަދި މެއިންޓެނެންސް ފީއާއެކު 8500 ރުފިޔާ 570 އަކަފޫޓްގެ އެ އެޕާޓްމަންޓް ތަކަށް ނަގަމުންއައިކަން ވަޒީރު ފާހަގަކުރެއްވިއެވެ. 

މުއްޠަލިބު އޮތުރަށް ވިދާޅުވީ، ރައީސް ޔާމީންގެ ސަރުކާރު ނިމެމުން އައި އިރު ސަރުކާރުން މަސައްކަތްކުރަމުން އައީ ލޯނެއް ނަގައިގެން ހިޔާ ފުލެޓްތައް އެއްކޮށް ނިންމަން ކަމަށެވެ. ނަމަވެސް، ރައީސް ޞާލިޙްގެ ސަރުކާރުން އެ ފުލެޓްތަކުގެ ފިނިޝިން ނުނިންމައި ހަވާލުކުރުމުން ރައްޔޮތުންގެ އަތުން ދެ ލައްކައެއްހާ ރުފިޔާ ޚަރަދުކޮށްގެން އެ ރައްޔިތުން ފުލެޓްތައް ހެދިކަމަށް އޭނާ ވިދާޅުވިއެވެ. 

ވަޒީރު ވިދާޅުވީ ފަހި ފުލެޓްގެ ކުލި ކަނޑާއަޅާފައި ވަނީ، ފުލެޓްތައް ހެދުމަށް ނެގި ލޯނަށް ދައްކަންޖެހޭ ވަރާ، ސަބްސިޑައިޒް ކުރާ މިންވަރެއް ބެލުމަށްފަހު އެންމެ ރަނގަޅު އަދަދު ކަމަށެވެ. ހިޔާ ފުލެޓްތަކަށްވުރެ ފަހި ފުލެޓްތައް ބޮޑު ކަމަށާ، އަގު ކަނޑައަޅާފައިވަނީ ވަކި ޕްރޮޖެކްޓެއް ތަފާތު ކުރުމުގެ ގޮތުން ނޫން ކަމަށްވެސް ވިދާޅުވިއެވެ.