ޗައިނާ ސަރުކާރުގެ ހިލޭ އެހީއާއެކު މާލޭގެ މަގުތައް ހެދުމަށް ވެފައިވާ އެއްބަސްވުމާ އެއްގޮތަށް އެ މަސައްކަތް ބާރަށް ކުރިއަށްދާ ކަމަށާަ، އެގައުމުގެ ސަރުކާރުންނާއި، ރާއްޖޭގެ ސަރުކާރުންވެސް އެ މަސައްކަތް ލަސްކުރުމަށް މަސައްކަތް ނުކުރާ ކަމަށް މިނިސްޓަރ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓް ޑޮކްޓަރ ޢަބްދުالله މުއްޠަލިބް ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި ‏ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް (ކުޑޫ) ވަނީ އެ މަޝްރޫޢު ކުރިއަށް ނުދާކަން ފާހަގަކުރައްވައި، އޭގެ ސަބަބު އޮޅުން ފިލުއްވަން ވަޒީރާ ސުވާލުކުރައްވާފައެވެ. 

ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް (ކުޑޫ)

އެ ސުވާލަށް ޖަވާބު ދެއްވަމުން ވަޒީރު މުއްޠަލިބު ވިދާޅުވީ، ހިލޭ އެހީއާއި، ލޯން އެހީއާއި، ދައުލަތުގެ ބަޖެޓުން ޚަރަދުކޮށްގެން ކުރިއަށް ގެންދާ ޕްރޮޖެކްޓް ތަކަކީ މުޅިން ތަފާތު އުސޫލު ތަކެއްގެ ދަށުން ތަފާތު ގޮތްގިތަށް ކުރިއަށް ގެންދާ ޕްރޮޖެކްޓް ތަކެއް ކަމަށެވެ.

އެގޮތުން މީގެ ކުރިންވެސް ޗައިނާއިން ދޭ ހިލޭ އެހީގެ ދަށުން މީގެ ކުރިންވެސް ކުރިއަށް ގެންދެވުނު މަޝްރޫޢުތައް ކުރިއަށް ގެންގޮސްފައިވާނީ، އެ ޕްރިޖެކްޓޭއްގެ ފީޒިބިލިޓީ ސްޓަޑީޒް ސްޓޭޖް ނިންމައި، ސާވޭ ޑިޒައިން ސްޓޭޖް ނިންމުމަށްފަހު ކޮންސްޓްރަކްޝަން ސްޓޭޖާ ހަމައަށް ދިޔުމަށްފަހުގައި ކަން ފާހަގަކުރެއްވިއެވެ.

މަގު ހެދުމުގެ މަސައްކަތުގެ އަދާހަމަ ދެއްވަމުން ވަޒީރު އިތުރަށް ވިދާޅުވީ، ފީޒިބިލިޓީގެ މަސައްކަތް މިހާރު ނިމިފައިވާ ކަމަށާ ސާވޭ ޑިޒައިން ކުރާނެ ބަޔަކު ހޮވާފައިވާ ކަމަށެވެ. އަދި ސާވޭ ޑިޒައިންކުރާ ޓީމު މި މަސްތެރޭގައި ރާއްޖެ އަންނާނެ ކަމަށާ، އެ މަސައްކަތް ނިމުމުން ކުރިއަށް ހުރި މަސައްކަތް ކުރުމަށް ބަޔަކު ހޯދުމަށް ޗައިނާގައި ޓެންޑާ މަރުހަލާ ކުރިއަށް ގެންދާނެ ކަމަށާ، މަސައްކަތަށް ކޮންޓެކްޓަރު ކަނޑައެޅުމުން އެ މަސައްކަތް ކުރިއަށް ދާނެ ކަމަށް  ވިދާޅުވިއެވެ.

ވަޒީރު ވިދާޅުވީ މަސައްކަތް ލަސްކުރަން ޗައިނާއިން އަދި ރާއްޖެއިންވެސް މަސައްކަތް ނުކުރާ ކަމަށާ، އޭގެ ބަދަލުގައި ސަރުކާރުން މިހާރުވެސް އަންނަނީ ކުރެވެން ހުރި މަސައްކަތެއް ކޮށްގެން މާލޭ މަގުތަކުގެ ޖާގަ ތަނަވަސްކޮށް ރައްޔޮތުންނަށް ފަސޭހަ ކޮށްދެއްވަން ކަމަށެވެ.