ހޮރްމޫޒް ކަނޑުއޮޅީގައި އެމެރިކާއާއި އީރާނާ ދެމެދު ހަމަލާ ބަދަލުކުރުމާ ގުޅިގެން ބައިނަލްއަޤުވާމީ ތެލުގެ އަގު އަނެއްކާވެސް ބޮޑު ތަނުން މައްޗަށް ޖެހިލައިފިއެވެ.

އެގޮތުން ހަމަލާ ބަދަލުކުރުން ތަކާއެކު ބްރެންޓް ކްރޫޑް ތެލުގެ އަގު ބުރާސްފަތި ދުވަހު 7.5 އިންސައްތައާ ހަމައަށް އުފުލުނެވެ. ނަމަވެސް މިއަދު އޭޝިއާގެ ބާޒާރުތައް ހުޅުވުނުއިރު އެ އަދަދު ތަންކޮޅެއް ތިރިވެ، ފީފާއެއްގެ އަގު 101.12 ޑޮލަރަށް ވަނީ ތިރިވެފައެވެ. ބުރާސްފަތި ދުވަހު ހުރީ 103.70 ޑޮލަރަށެވެ.

ދުނިޔޭގެ ތެލާއި ގޭހުގެ ސަޕްލައިގެ ގާތްގަނޑަކަށް ފަސްބައިކުޅަ އެއްބައި ދައުރުވާ ހޮރްމޫޒް ކަނޑުއޮޅީގައި މި ހަމަލާތައް ބަދަލުކޮށްފައިވަނީ އެޕްރީލް 7 ގައި ދެ ޤައުމު ދެމެދު އިޢުލާނުކުރި ހަނގުރާމަ ހުއްޓާލުމުގެ އެއްބަސްވުން އޮއްވައެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) ބުނީ އެމެރިކާ ކަނޑުގެ ސިފައިންގެ ތިން މިސައިލް ޑެސްޓްރޯޔަރަކަށް އީރާނުގެ މިސައިލާއި ޑްރޯން އަދި ކުދި ބޯޓުތަކުން ހަމަލާ ދިނުމާ ގުޅިގެން، ރައްދު ހަމަލާ ދީފައިވާ ކަމަށެވެ.

އީރާނުގެ ޚަތަމުލް އަންބިޔާ ސެންޓްރަލް ހެޑްކުއާޓާސް އިން ބުނީ ހަނގުރާމަ ހުއްޓާލުމުގެ އެއްބަސްވުމާ ޚިލާފުވެ، އީރާނުގެ ތެޔޮ ޓޭންކަރަކާއި އެހެން އުޅަނދަކަށް އެމެރިކާ އިން ހަމަލާ ދީފައިވާ ކަމަށެވެ. އީރާނުގެ އަސްކަރީ ހެޑްކުއާޓާސް އިން ބުނި ގޮތުގައި ޤެޝްމް ރަށް ހިމެނޭ ގޮތަށް މަދަނީ ސަރަޙައްދުތަކަށް ވެސް އެމެރިކާ އިން ހަމަލާ އަމާޒުކުރިއެވެ.

ކަންމިހެން ހުރި ނަމަވެސް އެމެރިކާގެ ރައީސް ޑޮނަލްޑް ޓްރަމްޕް ބުނީ ހަނގުރާމަ ހުއްޓާލުމުގެ އެއްބަސްވުން ދެމިއެބައޮތް ކަމަށެވެ. އަދި ފަހުން އީރާނުގެ ދައުލަތުގެ މީޑިއާ އިންވެސް ބުނީ ހާލަތު "އާންމު ހާލަތަށް ރުޖޫޢަވެފައިވާ" ކަމަށެވެ.

ފެބްރުއަރީ ފަހުކޮޅުން ފެށިގެން އީރާނުގެ ހަމަލާތަކުގެ ނުރައްކާ އޮތުމުން އެ ކަނޑުއޮޅީގެ ޝިޕިން ގާތްގަނޑަކަށް ހުއްޓިފައިވާއިރު، ހަނގުރާމައިގެ ކުރިއާ އަޅާ ބަލާއިރު ބްރެންޓް ތެލުގެ އަގު ގާތްގަނޑަކަށް 40 އިންސައްތަ ވަނީ އުފުލިފައެވެ.

ހުކުރު ދުވަހު އޭޝިއާގެ ހިއްސާ ބާޒާރުތައް ހުޅުވުނުއިރު، ޖަޕާނުގެ ނިކެއި 225 އާއި ދެކުނު ކޮރެއާގެ ކޮސްޕީ އާއި ހޮންގް ކޮންގުގެ ހެންގް ސެންގް އެއް އިންސައްތައަށް ވުރެ ބޮޑަށް ވެއްޓުނެވެ. ވޯލް ސްޓްރީޓުގެ އެސް އެންޑް ޕީ 500 ވެސް ގާތްގަނޑަކަށް 0.4 އިންސައްތަ ދަށްވިއެވެ.