އިންޑިއާގެ ވެރިރަށް ނިއުދިއްލީގައި މި މަހުގެ 26 ވާ އަންގާރަ ދުވަހު ކުއަޑް ގައުމުތަކުގެ ހާރިޖީ ވަޒީރުންގެ ސަމިޓް ބޭއްވުމަށް ތައްޔާރުވެފައިވާއިރު، އެމެރިކާގެ ޚާރިޖީ ވަޒީރު މާކޯ ރޫބިއޯ މިއަދު އިންޑިއާއަށް ރަސްމީ ދަތުރުފުޅެއް ފައްޓަވައިފިއެވެ.
ހަތަރު ދުވަހުގެ މި ދަތުރުފުޅުގައި އޭނާ އެންމެ ފުރަތަމަ ވަޑައިގެންނެވީ އިރުމަތީ އިންޑިއާގެ ކޮލްކަތާ އަށެވެ. އެއަށްފަހު މިއަދު ރޫބިއޯ ވަޑައިގަތުމަށް ހަމަޖެހިފައިވަނީ ނިއުދިއްލީއަށެވެ. ދިއްލީގައި އިންޑިއާގެ ބޮޑުވަޒީރު ނަރެންދުރަ މޯދީއާއި ހާރިޖީ ވަޒީރު ޑރ. އެސް ޖަޔަޝަންކަރާއެކު ބާއްވާ ބައިލެޓްރަލް ބައްދަލުވުންތަކުގައި ދެ ގައުމުގެ ދިފާއީ ގުޅުން ވަރުގަދަކުރުމާއި، ވިޔަފާރިއާއި، ޓެކްނޮލޮޖީ އަދި ހަކަތައިގެ ދާއިރާއިން އެއްބާރުލުން ދިނުމާ ބެހޭގޮތުން ފުޅާ ދާއިރާއެއްގައި މަޝްވަރާ ކުރައްވާނެއެވެ.
މި މަހުގެ 26 ގައި ނިއުދިއްލީގައި ބާއްވާ ކުއަޑް ހާރިޖީ ވަޒީރުންގެ ބައްދަލުވުމަކީ އިންޑޯ-ޕެސިފިކް ސަރަހައްދުގެ ސަލާމަތާއި ހަމަޖެހުން ގާއިމުކުރުމަށް ބާއްވާ ވަރަށް މުހިންމު ސަމިޓެކެވެ. އިންޑިއާގެ ހާރިޖީ ވަޒީރު ޖަޔަޝަންކަރު ރިޔާސަތު ބަލަހައްޓަވާ މި ބައްދަލުވުމުގައި އެމެރިކާގެ މާކޯ ރޫބިއޯގެ އިތުރުން އޮސްޓްރޭލިއާގެ ހާރިޖީ ވަޒީރު ޕެނީ ވޮންގް އަދި ޖަޕާނުގެ ހާރިޖީ ވަޒީރު ތޮޝިމިޓްސޫ މޮޓެގީ ބައިވެރިވެވަޑައިގަންނަވާނެއެވެ. މި ސަމިޓުގައި މައިގަނޑު ގޮތެއްގައި މަޝްވަރާ ކުރާނީ ވަކި ފަރާތަކަށް ނުޖެހޭ، މިނިވަން އިންޑޯ-ޕެސިފިކް ސަރަހައްދެއް ބޭއްވުމަށާއި، ކަނޑުގެ ސަރަހައްދުތަކުގެ ސަލާމަތްތެރިކަން ކަށަވަރުކުރުމުގެ އިތުރުން މޫސުމީ ބަދަލުތަކުން ރައްކާތެރިވުމަށް ގުޅިގެން ކުރެވިދާނެ މަސައްކަތްތަކާ ބެހޭގޮތުންނެވެ. ބައިނަލްއަގުވާމީ މާހިރުން ދެކޭގޮތުގައި، ދާދިފަހުން ޓްރަމްޕް ޗައިނާއަށް ކުރެއްވި ދަތުރުފުޅަށްފަހު ރޫބިއޯ އިންޑިއާއަށް ކުރައްވާ މި ދަތުރުފުޅާއި ކުއަޑް ބައްދަލުވުމަކީ މި ސަރަހައްދުގައި ޗައިނާގެ ނުފޫޒު ގަދަވަމުންދާ ދަނޑިވަޅެއްގައި ހަތަރު ގައުމުގެ ސްޓްރެޓީޖިކް ބައިވެރިވުން އާ ހިސާބަކަށް ގެންގޮސްދޭނެ މުހިންމު ފިޔަވަޅެކެވެ.
ކުއަޑްއަކީ ޗައިނާގެ ނުފޫޒު އިންޑޯ ޕެސިފިކް ސަރަހައްދުގައި ގަދަވިޔަ ނުދިނުމަށް އެމެރިކާ، އިންޑިއާ، އޮސްޓްރޭލިއާ އަދި ޖަޕާން ގުޅިގެން އުފައްދާފައިވާ ހަތަރު ޤައުމުގެ އިއްތިޙާދެކެވެ.
Advertisement
This content is created and paid for by advertisers and does not involve Voice Journalists
