1447 ވަނަ އަހަރުގެ، މި އަހަރުގެ އަރަފާތު ދުވަހުގެ ޚުތުބާ މަސްޖިދުއްނަބަވީގެ އިމާމު ޝައިޚް ޑރ. ޢަލީ ބިން ޢަބްދުއްރަޙްމާން އަލް-ޙުޛައިފީ ދެއްވާއިރު، ނަބަވީގައި ޢީދު ޚުތުބާ ދެއްވާނީ ޝެއިޚްގެ ދަރިކަލުން ޝައިޚް އަޙްމަދު ބިން ޢަލީ އަލް-ޙުޛައިފީ ކަން އިއުލާންކޮށްފިއެވެ.
މި އަހަރުގެ ޢަރަފާތް ދުވަހު، މިއަދު މަސްޖިދު ނަމިރާގައި ޢަރަފާތް ދުވަހުގެ ޚުތުބާ ދެއްވާަނީ ޝައިޚް ޢަލީ އަލް-ޙުޛައިފީއެވެ.
ސައުދީ ސަރުކާރުގެ ކަމާބެހޭ އިދާރާތަކުން ވަނީ މި ޚުތުބާ ދުނިޔޭގެ އެކި ކަންކޮޅުތަކުގައި ތިބި މުސްލިމުންނަށް ފަސޭހައިން އަޑުއަހާލެވޭނެ އިންތިޒާމު ހަމަޖައްސައިދީފައެވެ.
އެގޮތުން 30 އަށްވުރެ ގިނަ ބަހުން ޚުތުބާ ވަގުތުން ތަރުޖަމާކޮށް ދުރަށް ދައްކަން ހަމަޖެހިފައިވާއިރު، ކިއު.އާރު ކޯޑު މެދުވެރިކޮށް ލައިވް އޯޑިއޯ އަދި ލިޔުމުން ތަރުޖަމާ ފެންނާނެހެން އިންތިޒާމުތައް ވަނީ ފުރިހަމަކޮށްފައެވެ.
މީގެ އިތުރުން، އަޟްޙާ ޢީދު ދުވަހު، މާދަމާ މަދީނާގެ މަސްޖިދުއްނަބަވީގައި ޢީދު ނަމާދު އިމާމުވެ ކުރައްވައި ޢީދު ޚުތުބާ ދެއްވާނީ ޝެއިޚް ޢަލީ އަލް ޙުޛައިފީގެ ދަރިކަލުން ޝައިޚް އަޙްމަދު ބިން ޢަލީ އަލް-ޙުޛައިފީއެވެ.
އަހުމަދަކީ، ހާފިޒު ކަމުގެ ސަނަދު ހާސިލުކުރައްވާފައިވާ ސައުދީގެ މަޝްހޫރު އިލްމުވެރިއެއް ކަމަށްވާއިރު، އޭނާއަކީ، މަސްޖިދުއް ނަބަވީގެ އިމާމެކެވެ.
އޭގެއިތުރަށް، ބައްޕާފުޅު އަލީ ބިން އަލް-ޙުޛައިފީއަކީވެސް ހާފިޒެކެވެ.
ބައްޕަ އާއި ދަރިއަކު ހައްޖާއި ގުޅުން ހުރި މުހިންމު ދެ ޚުތުބާ ދެއްވުމަކީ ތާރީޚީ ކަމެކެވެ. މިކަން ދުނިޔޭގެ ސަމާލުކަމަށްވެސް ވަނީ އައިސްފައެވެ.
Advertisement
This content is created and paid for by advertisers and does not involve Voice Journalists
