ވަކިވަކި ގައުމުތަކުގައި ހުރި ތަފާތު ގާނޫނުތަކަކީ މަސްތުވާތަކެތީގެ ކާޓެލްތަކަށް ލިބޭ އެންމެ ބޮޑު ހަތިޔާރު ކަމަށާއި، އެކަން އިސްލާހު ކުރުމަށް ދުނިޔެއަށް އޮތް ވަގުތު ކުޑަތަންވަމުންދާ އިންޑިއާގެ ހޯމް މިނިސްޓަރު އަމިތު ޝާހު ވިދާޅުވެއްޖެއެވެ.

ދިއްލީގައި އޮތް ކޮންފަރެންސެއްގައި ވާހަކަ ދައްކަވަމުން އަމިތު ޝާހު ވިދާޅުވީ މަސްތުވާތަކެތީގެ ގާނޫނުތައް އެއްގޮތްކުރުމަށާއި، އަދަބުތައް އެއް މިންގަނޑަކަށް ފެއްތުމަށާއި، ވަގުތުން ވަގުތަށް އިންޓެލިޖެންސް މައުލޫމާތު ހިއްސާކުރުމަށާއި، އަދި މަސްތުވާތަކެތީގެ ނެޓްވޯކްތަކުގެ އިސްވެރިން އެހެން ގައުމުތަކުން ހޯދައި ހަވާލުކުރުމަށް ގޮވާލެއްވިއެވެ. އެހެން ނޫންނަމަ، މަސްތުވާތަކެތީގެ ނުފޫޒު ހިނގާ ގައުމުތައް ދުނިޔޭގެ ބާރުގެ މަރުކަޒުތަކަށް ވެގެންދާނެ ކަމަށް އޭނާ އިންޒާރު ދެއްވިއެވެ.

އިންޑިއާގެ މަރުކަޒީ ޖާސޫސީ އިދާރާ ރޯގެ ބާނީ ރަމޭޝްވަރު ނާތު ކާއޯގެ ޝަރަފުގައި ބާއްވާ އަހަރީ ތަގުރީރު ސިލްސިލާ، އާރް.އެން. ކާއޯ މެމޯރިއަލް ލެކްޗަރ 2026 ގައި ވާހަކަދައްކަވަމުން އަމިތު ޝާހު މުހާތަބު ކުރެއްވި ސަފީރުންނާއި، ހައިކޮމިޝަނަރުންނާއި، 40 އަށްވުރެ ގިނަ ގައުމުގެ ޑިޕްލޮމޭޓުންނާއި، ކާއޯގެ އާއިލާގެ މެންބަރުންގެ އިތުރުން އިންޑިއާގެ ސަލާމަތީ ބާރުތަކުގެ އިސްވެރިން ހިމެނޭ ސައްލާއަކަށެވެ. މިއަހަރުގެ މި ފޯރަމް ބޭނުންކޮށްފައިވަނީ އިންޓެލިޖެންސްގެ މާޒީގެ ހަނދާންތައް އާކުރުމުގެ ބަދަލުގައި، މަސްތުވާތަކެއްޗާ ދެކޮޅަށް ދުނިޔޭގެ ފެންވަރުގައި ފިޔަވަޅު އެޅުމަށް މުސްތަގުބަލަށް އަމާޒުކޮށް ގޮވާލުމަކަށެވެ.

އަށް ބިލިއަންގެ އާބާދީއަކާއި، 195 ގައުމާއި، އަދި 250,000 ކިލޯމީޓަރުގެ ބައިނަލްއަގުވާމީ ބޯޑަރުތައް ހިމެނޭ މި ދުނިޔެއަށް، ވަކިވަކި ގައުމުތަކުން ވަކިވަކިން ކުރާ މަސައްކަތްތަކުން މަސްތުވާތަކެތީގެ މައްސަލައެއް ހައްލެއް ނުކުރެވޭނެކަމަށް އަމިތު ޝާހު ވިދާޅުވިއެވެ.

އަމިތު ޝާހު ވިދާޅުވި ގޮތުގައި ބޮޑުވަޒީރު ނަރެންދުރަ މޯދީގެ ލީޑަޝިޕްގެ ދަށުން އިންޑިއާއިން ވަނީ 2047 ވަނަ އަހަރާ ހަމައަށް މަސްތުވާތަކެތިން ސަލާމަތްވެފައިވާ އިންޑިއާއެއް ބިނާކުރުމުގެ ލަނޑުދަނޑި ކަނޑައަޅާފައެވެ. އަދި އިންޑިއާގެ ސަލާމަތީ އިދާރާތަކުން މަސްތުވާތަކެތީގެ ސިންޑިކޭޓްތައް ނައްތާލުމަށް ރޯޑްމެޕެއް ތައްޔާރުކޮށްފައިވާ ކަމަށްވެސް ވިދާޅުވިއެވެ. އޭނާ ވިދާޅުވީ، އިންޑިއާއިން ގެންގުޅޭ ޒީރޯ-ޓޮލަރެންސް ސިޔާސަތުގެ މާނައަކީ، އެންމެ ގްރާމެއްގެ މަސްތުވާތަކެތިވެސް ގައުމަށް އެތެރެވިޔަނުދިނުން ނުވަތަ އިންޑިއާގެ ސަރަހައްދު ޓްރާންސިޓް ރޫޓެއްގެ ގޮތުގައި ބޭނުންކުރިޔަ ނުދިނުން ކަށަވަރުކުރުން ކަމަށެވެ.