ފަހިދިރިއުޅުން ކޯޕަރޭޝަނުގެ އެޕާޓްމަންޓެއް ކުއްޔަށް ދޫކުރި މީހެއް ޖޫރިމަނާކޮށްފިއެވެ.
އެފްޑީސީން ބުނެފައިވަނީ، އެ ކޯޕަރޭޝަނުގެ އެޕާޓްމަންޓެއް އުސޫލާ ހިލާފަށް ކުއްޔަށް ދިންކަން ފާހަގަކުރެވިގެން އެކަކު ޖޫރިމަނާކޮށް އެބާވަތުގެ އެހެން ދެ މައްސަލައެއް ބަލަމުން އަންނަކަމަށެވެ. އެގޮތުން ތިން މީހަކަށް އެބާވަތުގެ ކަންކަން ނުކުރުމަށް އިންޒާރުދީފައިވާކަން ވަނީ ފާހަގަކޮށްފައެވެ.
ފަހިދިރިއުޅުމުގެ އެޕާޓްމަންޓެއް ކުއްޔަށްދިން މައްސަލާގައި މީގެ ކުރިންވެސް ވަނީ ފިޔަވަޅު އަޅާފައެވެ. އެގޮތުން ބިދޭސީންގެ ބަޔަކަށް ކުއްޔަށް ދިން މައްސަލާގައި އެޕާޓްމަންޓެއްގެ ވެރިފަރާތް 50،000 ރުފިޔާއިން ވަނީ ޖޫރިމަނާކޮށްފައެވެ. ސޯޝަލް ހައުސިންގެ ދޫކޮށްފައިވާ ފަހިދިރިއުޅުމުގެ އެޕާޓްމަންޓްތައް ކުއްޔަށް ދިނުމަކީ މަނާކަމެކެވެ.
ގެދޮރުވެރިޔާގެ ސްކީމްގެ ދަށުން ދޫކޮށްފައިވާ އެ ފްލެޓްތައް ކުއްޔަށްދޭނަމަ އެއްބަސްވުން ބާތިލްކޮށް، ފްލެޓްތައް އަތުލާނެ ކަމަށް ފަހި ދިރިއުޅުން ކޯޕަރޭޝަނުން ވަނީ މީގެ ކުރިން ބުނެފައެވެ.
ސޯޝަލް ހައުސިން ސްކީމްގެ ދަށުން އެޕާޓްމަންޓްތައް ލިބޭ ފަރާތްތަކުން ބޮޑުއަގުގައި އެތަންތަން ކުއްޔަށްދޭ މައްސަލައަކީ ވަރަށްގިނަ ބައެއްގެ ޝަކުވާއަކަށް ވެފައި އޮންނަ ކަމެކެވެ. އެގޮތުން ހިޔާ، އަދި ސިފައިންނާއި ފުލުހުންގެ ފްލެޓްތައް ކުއްޔަށްދޫކުރާ މައްސަލާގައި ބައެއް އާއްމުން ވަނީ މީގެ ކުރިން ކަންބޮޑުވުން ފާޅުކޮށްފައެވެ.
Advertisement
This content is created and paid for by advertisers and does not involve Voice Journalists
