އޮސްޓްރޭލިއާގެ ބޮޑުވަޒީރު އެންތަނީ އަލްބަނީޒް، 2050 ވަނަ އަހަރާ ހަމައަށް އެ ގައުމުގެ އިގްތިސާދީ އަދި ސްޓްރެޓީޖިކް މުސްތަގުބަލު ބައްޓަންކުރުމަށް ގެންގުޅުއްވާ ތަޞައްވުރު ހާމަކުރައްވައިފިއެވެ.
ވެރިރަށް ކެންބަރާގައި، ކޮމިޓީ ފޮރ އިކޮނޮމިކް ޑިވެލޮޕްމަންޓް އޮފް އޮސްޓްރޭލިއާ އިން އިންތިޒާމުކޮށްގެން ބޭއްވި "ސްޓޭޓް އޮފް ދަ ނޭޝަން" ކޮންފަރެންސްގައި ވާހަކަދައްކަވަމުން އަލްބަނީޒް ވިދާޅުވީ، ދުނިޔެއަށް އަންނަމުންދާ ބޮޑެތި ބަދަލުތަކުގެ ތެރެއިން އިންޑިއާއާ އެކު އޮންނަ ގުޅުން ވަރުގަދަކުރުމާއި، އާޓިފިޝަލް އިންޓެލިޖެންސް އާއި ސާފު ހަކަތައަށް ބަދަލުވުމަކީ އޮސްޓްރޭލިއާގެ ކުރިއެރުމަށް އެންމެ މުހިންމު ކަންތައްތައްކަމަށެވެ ކަމަށެވެ. އަދި ބައިނަލްއަގުވާމީ ގޮތުން ކުރިމަތިވާ ބަދަލުތަކަށް އިންތިޒާރުކޮށްގެން ތިބުމުގެ ބަދަލުގައި، އޮސްޓްރޭލިއާއިން އިސްނަގައިގެން އެ ބަދަލުތައް ބައްޓަންކުރަންޖެހޭ ކަމަށް ވެސް އޭނާ ފާހަގަކުރެއްވިއެވެ.
ޕެސިފިކް ސަރަހައްދުގެ ގައުމުތަކާ އެކު އޮންނަ ގުޅުންތަކަށް އަލިއަޅުއްވާލައްވަމުން އަލްބަނީޒް ވިދާޅުވީ، ޗައިނާއާ އެކު އޮންނަ ގުޅުން ހަމަހަމަކުރުމާއި، ދެކުނު އިރުމަތީ އޭޝިއާގެ އިންވެސްޓްމަންޓްތައް އިތުރުކުރުމުގެ އިތުރުން އިންޑިއާއާ އެކު އޮންނަ ގުޅުން އާ އުސްމިންތަކަށް އުފުލުމަކީ ސަރުކާރުގެ އިސް އަމާޒެއް ކަމަށެވެ. ޚާއްޞަކޮށް އިންޑިއާ އާއި އޮސްޓްރޭލިއާގެ ދެމެދުގައިވާ ސްޓްރެޓީޖިކް ޕާޓްނަޝިޕްގެ ދަށުން، މުހިންމު މިނަރަލްތަކާއި، ޓެކްނޮލޮޖީ، ތައުލީމު އަދި ސަލާމަތީ ދާއިރާއިން ގުޅުން ބަދަހިވަމުންދާކަން އޭނާ ފާހަގަކުރެއްވިއެވެ. މީގެ އިތުރުން، އޭއައި ޓެކްނޮލޮޖީގެ ސަބަބުން ވަޒީފާތަކަށް ބަދަލުތަކެއް އައި ނަމަވެސް، އޭގެ ބޭނުން ހެޔޮގޮތުގައި ހިފައިގެން ގައުމުގެ އުފެއްދުންތެރިކަން އިތުރުކުރަންޖެހޭ ކަމަށާއި، އޮސްޓްރޭލިއާގެ އަމިއްލަ އުފެއްދުންތެރިކަން ކުރިއެރުވުމަށް ސަރުކާރުން އިސްކަންދޭނެ ކަމަށް ބޮޑުވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
