2028 ވަނަ އަހަރުގެ މެދުތެރޭގައި ލ. ހިތަދޫ ކޯޒްވޭގެ މަސައްކަތް ނިންމައި ބޭނުން ކުރަން ފެށޭނެ ކަމަށް އިންފްރާސްޓްރަކްޗާ މިނިސްޓަރ ޑރ. އަބްދުالله މުއްޠަލިބު ވިދާޅުވެއްޖެއެވެ.
ލ. ހިތަދޫ-ކުނަހަންދޫ ކޯޒްވޭގެ މަސައްކަތަކީ 2023 ވަނައަހަރުގެ ޖަނަވަރީމަހުގައި ސޮއި ކުރެވުނު މަޝްރޫޢު އެކެވެ. އަދި ރިޔާސީ އިންތިޚާބުގެ ކެންޕެއިންގެ ތެރެއިން، އެ އަހަރުގެ ސެޕްޓެމްބަރުމަހުގެ ތެރޭގައި އެމްޓީސީސީން ވަނީ މޮބިލައިޒްކުރުމުގެ މަސައްކަތްވެސް ކޮށްފައެވެ.
މަޖިލީހުގެ މިއަދުގެ ޖަލްސާގައި މާވަށުދާއިރާގެ މެންބަރު ވަނީ މަސައްކަތް ކުރިއަށް ގެންގޮސް ނިންމާލެވޭނެ ތާރީޚަކާ ގުޅޭގޮތުން ވަޒީރު މިއްޠަލިބާ ސުވާލު ކުރައްވާފައެވެ.
ސުވާލަށް ޖަވާބު ދެއްވަމުން ވަޒީރު ވިދާޅުވީ، އެ މަޝްރޫޢުގެ ޢަމަލީ މަސައްކަތް ފަށާފައިވަނީ މި ސަރުކާރުން ކަމަށެވެ.
މިގޮތުން ޖިއޯ ޓެކްނިކަލް އިންވެސްޓިގޭޝަންއާއި، ސާވޭގެ މަސައްކަތް ނިންމައި، ޑިޒައިންއަށް ގެންނަންޖެހޭ ބަދަލުތައް ގެނެސް، ޑީޓެއިލްޑް ޑިޒައިން އެޕްރޫވްކޮށް މިހާރު ޢަމަލީ މަސައްކަތް ވަނީ ފަށާފައި. ޢަމަލީ މަސައްކަތް ފެށީ 20 އޮކްޓޯބަރު 2025 ގައި
އިންފްރާސްޓްރަކްޗާ މިނިސްޓަރ ޑރ. އަބްދުالله މުއްޠަލިބު
މިއީ 500 ދުވަހުގެ ތެރޭގައި ނިންމުމަށް ހަވާލުކުރެވިފައިވާ މަޝްރޫއުއެއް ކަމަށާ، މަސައްކަތް ކުރިއަށްދަނީ ސަރުކާރުން ބޭނުންވާ ސްޕީޑްގައި ނޫންކަމަށް ވަޒީރު ވިދާޅުވިއެވެ.
ނަމަވެސް އަޅުގަނޑުމެން މަސައްކަތް މިކުރަނީ، އިރާދަކުރެއްވިއްޔާމުން 2028 ވަނަ އަހަރުގެ މެދުތެރެއަށް ދާއިރު މަސައްކަތް ނިންމައި ރައްޔިތުންނަށް މަގު ބޭނުންކުރެވޭގޮތް ހެދުމަށް.
އިންފްރާސްޓްރަކްޗާ މިނިސްޓަރ ޑރ. އަބްދުالله މުއްޠަލިބު
ހިތަދޫ އާއި ކުނަހަންދޫ ކޯޒްވޭގެ މަޝްރޫއުގެ ދަށުން ކަޅައިދޫ އާއި މެންދުއާ ދެމެދު 157.7 މީޓަރުގެ ބްރިޖެއް އެޅުމާއި މެންދު އާއި ކުނަހަންދޫއާ ދެމެދު 157.7 މީޓަރުގެ ބްރިޖެއް އެޅުން ހިމެނެއެވެ. އަދި އެ މަޝްރޫއުގެ ދަށުން 390 މީޓަރުގެ ރިވެޓްމެންޓެއް އަޅައި 714 މީޓަރުގެ މަގު ހަދާނެއެވެ.
Advertisement
This content is created and paid for by advertisers and does not involve Voice Journalists
