ވެމްކޯގެ ދުވަސްވީ އެންމެ ހިދުމަތްތެރި އެއް މުވައްޒިފު ކަމަށްވާ ވ. ފަޒީލާ މަންޒިލް, އަހްމަދު އަޒްހީމް ނިޔާވެއްޖެ އެވެ.
އެ ކުންފުނީން ވެސް އަޒްހީމް ނިޔާވުމާއި ގުޅިގެން ތައުޒިޔާ ކިޔާފަ އެވެ. ވެމްކޯ އިން ބުނީ އަޒްހީމަކީ ގޭބީސީތައް ރަޖިސްޓްރީ ކޮށްގެން ކުނި ނަގަން ފެށި ދުވަސްވަރުން ފެށިގެން ވަރަށް ހީވާގި ކަމާއެކު މަސައްކަތް ކުރަމުންދިޔަ މުވައްޒިފެއް ކަމަށެވެ.
އަޒްހީމް ނިޔާވީ ބަލިވެ އުޅުމަށްފަހުކަމަށް ވޮއިސްއަށް ވަނީ މައުލޫމާތު ލިބިފައެވެ. ވެމްކޯގައި ހިދުމަތްކުރި މުއްދަތުގައި އަޒްހީމްގެ ކިބައިން ފެނުނީ ހީވާގި ކަމާއި މުރާލިކަން ކަމުގައި ކުންފުނިން ބުނެފައިވެ އެވެ. އަޒްހީމްގެ ވަކިވުމުން ފުން ހިތާމައެއް ލިބިފައިވާ ކަމަށްވެސް ބުންޏެވެ.
ވޭތުވެދިޔަ ނުވަ އަހަރު, ވެމްކޯއަށް ހިދުމަތްކޮށްދީފައިވާ އަޒްހީމަކީ އެ ކުންފުންޏަށް ވަރަށް އިހްލާސްތެރި ހިދުމަތްތަކެއް ކޮށްދިން މަަސައްކަތަށް ވަރަށް ކަމޭހިތާ އަދި އެންމެންގެ ލޯބި ހޯދާފައިވާ ހިތްހެޔޮ މުވައްޒިފެއް ކަމަށް ވެސް އެ ކުންފުނިން ވަނީ ފާހަގަކޮށްފަ އެވެ.
އަޒްހީމްގެ ވަކިވުމަކީ ކުންފުންޏަށް ލިބުނު ފޫނުބެއްދޭ ވަރުގެ ބޮޑު ދެރައެއް ކަމުގައިވެސް ބުނެފައިވެ އެވެ.
އުމުރުން 43 އަަހަރުގައި މިއަދު ނިޔާވި އަޒްހީމްގެ ޖަނާޒާ އޮންނާނީ އިޝާ ނަމާދަށް ފަހު އާސަހަރާ މިސްކިތުގަ އެވެ.
Advertisement
This content is created and paid for by advertisers and does not involve Voice Journalists
