ނިމިދިޔަ އެމްޑީޕީ ސަރުކާރުގައި މިފްކޯގެ ދަށުގައި ހުރި އައިސްޕްލާންޓްތައް ފެނަކައާ ހަވާލުކުރުމުން އެތަނުން ދެބައިކުޅަ އެއްބައި ޕްލާންޓްގެ އޮޕަރޭޝަން ހުއްޓިގެންދިޔަ ކަމަށް މަސްވެރިކަމާބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ޝިޔާމް ވިދާޅުވީ، މި ސަރުކާރުން ވެރިކަމާ ހަވާލުވިއިރު އައިސް ލިބުމުގައި ބޮޑެތި ދަތިތަކެއް ހުރި ކަމަށެވެ. އަދި އެކަން އެހެން ދިމާވީ އައިސް ޕްލާންޓްތައް ފެނަކައާ ހަވާލުކުރުމުންކަމަށްވެސް ވިދާޅުވިއެވެ.
މީގެ ކުރިން މިފްކޯގެ އައިސް ޕްލާންޓްތައް މިހުންނަނީ މިފްކޯގެ ބެލުމުގެ ދަށުގައި. އައިސް ޕްލާންޓްތަކާ ކުޅެހަދަން މި އެނގެނީ ހަގީގަތުގައިވެސް މިފްކޯގައި މި ކަމަށް މި ތިބަ ޓެކްނިކަލް ބޭފުޅުންނަށް. އެހެންނަމަވެސް ވޭތުވެދިޔަ ސަރުކާރުގައި، ދިވެހިރާއްޖޭގައި މިފްކޯގެ ދަށުގައި ހުރި އައިސް ޕްލާންޓްތައް، އޭރުގައި 22 އައިސް ޕްލާންޓެއް މިފްކޯގެ ބެލުމުގެ ދަށުގައި ހުރި. އެ ފެނަކައަށް ބަދަލުކުރެވިގެން ދިޔުން މި ވެގެން ދިޔައީ، ހަގީގަތުގައިވެސް ވަރަށް ބޮޑު މުސީބާތަކަށް.
ޝިޔާމް
އައިސް ޕްލާންޓްތައް ފެނަކައާ ހަވާލު ކުރުމުން، ވަރަށް ގިނަ އައިސް ޕްލާންޓްތަކުގެ މަސައްކަތް ހުއްޓުނު ކަމަށާަ، އެހެން އެކަން ދިމާވީ ފެނަކައިގައި އެ އޮޕަރޭޓްކުރަން އެނގޭ ޓެކްނިކަލް ބޭފުޅުން ނެތުމުން ކަމަށް ޝިޔާމް ވިދާޅުވިއެވެ.
އެ ދައުރު ނިމުނު އިރުގައި މި ދެންނެވި 22 ޕްލާންޓްގެ ތެރެއިން އޮޕަރޭޝަންގައި ނެތް ދެބައިކުޅަ އެއްބައިވެސް. އެއާ ކުޅެން ނޭނގޭ ބަޔަކާ އެ ހަވާލުކުރީމާ ވީގޮތް.
ޝިޔާމް
ކަންމިހެން ހުރުމުން މިސަރުކާރުން ވެރިކަމާ ހަވާލުވެ އެ އައިސްޕްލާންޓްތައް ވަނީ އަލުން މިފްކޯގެ ބެލުމުގެ ދަށަށް ގެނެސްފައެވެ. އަދި މިހާރު ރާއްޖޭގައި ހުރި 74 އައިސްޕްލާންޓްގެ ތެރެއިން 27 ޕްލާންޓް އޮޕަރޭޓް ކުރަމުންދަނީ މިފްކޯއިންކަން ޝިޔާމް ފާހަގަކުރެއްވިއެވެ.
ޝިޔާމް އިތުރަށް ވިދާޅުވީ މަސްވެރިންގެ އަތުން ދާ އެއްޗެއް ކުޑަ ކުރުމަށް ދޯނީގައި، ލޮނުން އައިސް އުފައްދައިގެން އޮޕްރޭޓް ކުރުމުގެ އިންތިޒާމްވެސް ހަމަޖެއްސުމަކީ ސަރުކާރުގެ ވައުދެއް ކަމަށާ އެ މަސަކަތްވެސް ކުރިއަށްދާ ކަމަށެވެ.
ނަމަވެސް ފަރުމަސްވެރިންނަށް އައިސް ޕްލާންޓްތައް ބޭނުންވާ ކަމަށާ، އެ ފަރާތްތަކުގެ އެދުމަށް އައިސްޕްލާންޓްތައް އަދިވެސް އަޅަމުންދާ ކަމަށް ވިދާޅުވުއެވެ.
Advertisement
This content is created and paid for by advertisers and does not involve Voice Journalists
