އިންޑިއާގެ އަމްރީތާ ހޮސްޕިޓަލާއެކު އާސަންދައިން ގާއިމްކޮށްފައި އޮތް އެއްބަސްވުން އާ ކުރުމުގެ މަސައްކަތް ކުރިއަށްދާކަމަށް އާސަންދަ ކުންފުނިން ބުނެފިއެވެ.

އަމްރިތާ ހޮސްޕިޓަލާއެކު ވެފައިވާ އެއްބަސްވުމުގެ މުއްދަތު ހަމަވުމާއެކު، އެ ހޮސްޕިޓަލަށް ބަލިމީހުން ފޮނުވުން މިވަގުތަށް ވަނީ މަޑުޖައްސާލާފައެވެ. ނަމަވެސް ފަރުވާ ހޯދަމުން އަންނަ ބަލިމީހުންނަށް ހަމަޖެހިފައިވާ އުސޫލުގެ މަތިން އެ ހޮސްޕިޓަލުން ހިދުމަތް ދެމުންދެއެވެ.

މިކަމާ ގުޅިގެން ބައެއް މީޑިއާތަކަށް މައުލޫމާތު ހިއްސާކުރަމުން އާސަންދައިން ބުނީ، އަލުން ބަލިމީހުން ފޮނުވޭނެ ސީދާ ތާރީހެއް އަދި ކަނޑަނޭޅުނު ނަމަވެސް އެގްރީމެންޓް އާކުރުމުގެ މުއާމަލާތްތައް ކުރިއަށްދާކަމަށެވެ. އާސަންދަ ކުންފުނިން ބުނީ އަމްރީތާ ހޮސްޕިޓަލާއެކު އޮތް އެއްބަސްވުމުގެ މުއްދަތު ހަމަވެފައި އޮތްނަމަވެސް އާސަންދައިގެ ދަށުން ބޭސްފަރުވާ ހޯދަމުންދާ މީހުންނަށް ހިދުމަތް ލިބޭނޭކަމަށެވެ. އަމްރީތާ ހޮސްޕިޓަލަކީ އެންމެގިނައިން ފަރުވާ ހޯދަން ދާ އެއް ހޮސްޕިޓަލެވެ. 

ބޭރުގެ ހޮސްޕިޓަލްތަކާއެކު އާސަންދައިން ހަދާފައި އޮންނަ އެއްބަސްވުމުގެ މުއްދަތު ހަމަވުމުން މީގެ ކުރިންވެސް ބަލިމީހުން ފޮނުވުމުގެ ކަންކަން މެދުކަނޑާލިނަމަވެސް ފަރުވާ ހޯދަމުން އަންނަ ބަލިމީހުންގެ ކަންކަން ހަމަޖެހިފައިވާ އުސޫލުގެ މަތިން ކުރިއަށްގެންދެއެވެ. ދައުލަތުގެ ބަޖެޓުން އެންމެބޮޑު އެއް ހަރަދެއް ހިނގަނީ ސިއްހީ ދާއިރާއަށެވެ. މީގެ ތެރެއިންވެސް ދައުލަތުގެ ހަރަދުގައި ބޭރުގެ ހޮސްޕިޓަލްތަކުން ބޭސްފަރުވާ ކުރުމަށް ބޮޑެތި ހަރަދުތަކެއް ހިނގާކަމަށް ތަފާސްހިސާބުތަކުން ދައްކައެވެ. 

އާސަންދައިގެ ދަށުން އެންމެ ބޮޑު ހޭދައެއް ހިނގަނީ އަވައްޓެރި އިންޑިއާގެ ހޮސްޕިޓަލްތަކަށެވެ. އެގޮތުން އެންމެބޮޑު ހޭދައެއް ހިނގާ އެއް ހޮސްޕިޓަލަކީވެސް އަމްރިތާ ހޮސްޕިޓަލެވެ.