ހުޅުމާލެ ފޭސް 2 ގެ ހިޔާ ފްލެޓްގެ 8 ވަނަ ޓަވަރުގެ އެޕާޓްމަންޓެއްގައި މިއަދު ހިނގި އަލިފާނުގެ ހާދިސާއަކާ ގުޅިގެން، އެ ގޭގައި ދިރިއުޅޭ ފަސް މީހަކަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ވަގުތީ ބޯހިޔާވަކިކަން ހަމަޖައްސައިދީފިއެވެ.
އެންޑީއެމްއޭ އިން މައުލޫމާތު ދޭ ގޮތުގައި މި ހާދިސާ ހިނގާފައިވަނީ ހިޔާ H8-19-06 އެޕާޓްމަންޓްގެ ބަދިގޭގައެވެ. މި ހާދިސާގެ ރިޕޯޓް ލިބުމާއެކު އެ އޮތޯރިޓީން ވަނީ އެ ސަރަހައްދުގައި ހަރަކާތްތެރިވާން ފަށާފައެވެ.
އަލިފާންގަނޑު މިހާރު އެއްކޮށް ނިއްވާލެވިފައިވީ ނަމަވެސް، ހާދިސާގެ ސަބަބުން އެޕާޓްމަންޓަށް ވަރަށް ބޮޑަށް ދުމުގެ އަސަރުކޮށްފައިވާ ކަމަށް އެންޑީއެމްއޭ އިން ބުނެއެވެ.
އެޕާޓްމަންޓްގެ އެތެރޭގައި ދުމުގެ އަސަރު ބޮޑުވެ، މިވަގުތު އެތަނަކީ ދިރިއުޅެން އެކަށީގެންވާ ތަނަކަށް ނުވާތީ، އެތަން ސާފުކޮށް ނިމެންދެން އެ ގޭގައި ދިރިއުޅޭ 5 ދިވެހިންނަށް އެހީތެރިކަން ފޯރުކޮށްދީފައިވާ ކަމަށް އެންޑީއެމްއޭއިން ބުނެއެވެ.
މިގޮތުން، އެ 5 މީހުންނަށް ކުރިއަށް އޮތް 3 ދުވަހުގެ މުއްދަތަށް ވަގުތީ ބޯހިޔާވަކިކަމާއި ކެއިންބުއިމުގެ އިންތިޒާމް އެންޑީއެމްއޭ އިން މިހާރު ވަނީ ހަމަޖައްސައިދީފައެވެ.
މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބުނުކަމުގެ ރިޕޯޓެއް ލިބިފައެއް ނުވެއެވެ.
Advertisement
This content is created and paid for by advertisers and does not involve Voice Journalists
