އިންޑިއާގެ ނީޓް އިމްތިޙާނާ ގުޅިގެން އުފެދިފައިވާ ހަމަނުޖެހުންތަކަށް ޙައްލެއް ހޯދުމަށް ސަރުކާރާއި އިދިކޮޅު ސީޖޭޕީ ޕާޓީއާ ދެމެދު ކުރިއަށްދިޔަ މަޝްވަރާތަކުގައި ބޮޑެތި ކުރިއެރުންތަކެއް ލިބި، ދަރިވަރުންގެ ބައެއް މައިގަނޑު ޑިމާންޑްތަކަށް ސަރުކާރުން އެއްބަސްވެއްޖެއެވެ.
އިންޑިއާގެ ކޮންސްޓިޓިއުޝަން ކްލަބުގައި ގާތްގަނޑަކަށް ދެ ގަޑިއިރު ވަންދެން ކުރިއަށްދިޔަ މި މުހިންމު ބައްދަލުވުމުގައި، ސީޖޭޕީން ހުށަހެޅި ގިނަ ކަންބޮޑުވުންތަކަށް ސަރުކާރުން ވަނީ ޖަވާބުދާރީވެފައެވެ.
މި ބައްދަލުވުމުގެ އެންމެ މުހިންމު ނިންމުމަކީ، ނީޓް އިމްތިޙާނަށް ތައްޔާރުވަމުން ދަނިކޮށް ނަފްސާނީ ގޮތުން ކުރިމަތިވި ފިއްތުންތަކުގެ ސަބަބުން އަމިއްލައަށް މަރުވި ދަރިވަރުންގެ ޢާއިލާތަކަށް ސަރުކާރުން މާލީ ބަދަލު ދިނުމަށް އެއްބަސްވުމެވެ.
މީގެ އިތުރުން، ނީޓް އިމްތިޙާނުގެ މައްސަލައިގައި އަޑުއުފުލައި މަގުމައްޗަށް ނުކުމެ މުޒާހަރާކުރުމުގެ ސަބަބުން ހައްޔަރުކޮށް، ދައުވާ އުފުލާފައިވާ ދަރިވަރުންގެ މައްޗަށް ކުރާ ހުރިހާ ދައުވާތަކެއް ވެސް އަނބުރާ ގެންދިއުމަށް ސަރުކާރުން ވަނީ ނިންމާފައެވެ. މިއީ މުޒާހަރާކުރަމުންދާ ދަރިވަރުންނާއި ބެލެނިވެރިންނަށް ލިބުނު ވަރަށް ބޮޑު ހިތްހަމަޖެހުމެކެވެ.
ނަމަވެސް، މި މައްސަލައިގައި އިހުމާލުވި ކަމަށް ބުނެ ތަޢުލީމީ ވަޒީރު ދާރްމެންދްރާ ޕްރަދާން މަޤާމުން އިސްތިޢުފާ ދެއްވުމަށް ސީޖޭޕީން ކުރާ ޑިމާންޑާ މެދު ސަރުކާރުން ވަގުތުން ވަކި ގޮތެއް ނިންމާފައެއް ނުވެއެވެ. ސަރުކާރުގެ ފަރާތުން ބުނެފައިވަނީ އެކަމާ މެދު ގޮތެއް ނިންމުމަށް މާދަމާ މެންދުރުފަހާ ހަމައަށް ވަގުތު ބޭނުންވާ ކަމަށެވެ.
Advertisement
This content is created and paid for by advertisers and does not involve Voice Journalists
