އިންވެސްޓަރުންނާ އެކު ގާތް ގުޅުން ބެލެހެއްޓުމާއި ދައުލަތުގެ ދަރަނީގެ މަޢުލޫމާތު ހާމަކުރުމުގައި އެންމެ ބާރަށް ކުރިއެރި ހަތަރުވަނަ ޤައުމަށް ސްރީލަންކާ ހޮވިއްޖެއެވެ.

ބައިނަލްއަޤުވާމީ ފައިނޭންސް އިންސްޓިޓިއުޓް (އައިއައިއެފް) އިން 2026 ވަނަ އަހަރަށް ނެރުނު އެސެސްމެންޓުގައި މި ދާއިރާއިން އެންމެ ހަލުވިކޮށް ކުރިއެރި ޤައުމެއްގެ ގޮތުގައި ފާހަގަކޮށްފައިވަނީ ވިއެޓްނާމެވެ. ދެވަނައިގައި މެދުތެރޭ އެމެރިކާގެ ޤައުމެއްކަމަށްވާ ބެލީޒް އޮތްއިރު ތިންވަނައިގައި އޮތީ މޮޒެމްބީކެވެ. މި ލިސްޓުގެ ހަތަރުވަނައިގައި ސްރީލަންކާ ހިމެނުނީ އެ ޤައުމުގެ ޖުމްލަ ސްކޯ 6.3 ޕޮއިންޓުން މައްޗަށް ޖެހި 50 ޕޮއިންޓުގެ ތެރެއިން 43.67 ޕޮއިންޓް ހޯދައިގެންނެވެ. މީގެ ކުރީ އަހަރު ސްރީލަންކާއަށް ލިބިފައިވަނީ 37.33 ޕޮއިންޓެވެ. ތަރައްޤީވަމުން އަންނަ 57 އިޤުތިޞާދެއް ވަޒަންކުރި މި ދިރާސާގައި ސްރީލަންކާ ހިމެނުނީ ފުރަތަމަ ކުއާޓައިލްގައެވެ.

ދަރަނީގެ ހާމަކުރުމުގެ ވަކި އިންޑެކްސްގައި ސްރީލަންކާ ދުނިޔެއިން ފަސްވަނައަށް އެރީ 13 ޕޮއިންޓުގެ ތެރެއިން 11.25 ޕޮއިންޓް ހޯދައިގެންނެވެ. އޭގެ އިތުރުން ތިމާވެށި އިޖުތިމާޢީ އަދި ހިންގުމުގެ ނިޒާމު (އީއެސްޖީ) ބައިން ހަތަރު ޕޮއިންޓުގެ ތެރެއިން 3.25 ޕޮއިންޓް ސްރީލަންކާއަށް ލިބިފައިވެއެވެ.

ސްރީލަންކާގެ ފިނޭންސް ވުޒާރާއިން ބުނީ މި ކުރިއެރުން ހާސިލުކުރެވުނީ 2024 ވަނަ އަހަރުގެ ފަހުކޮޅު ޕަބްލިކް ޑެޓް މެނޭޖްމެންޓް އޮފީހުގެ ދަށުން ރަސްމީ އިންވެސްޓާ ރިލޭޝަންސް ޕްރޮގްރާމެއް ޤާއިމުކުރުމުގެ ސަބަބުން ކަމަށެވެ. ދަރަނި އަލުން ތަރުތީބުކުރުމަށް ފަހު ބައިނަލްއަޤުވާމީ އިންވެސްޓަރުންގެ އިތުބާރު ހޯދުމަށް ގަވާއިދުން ދަރަނީގެ ބުލެޓިންތައް ނެރުމާއި މާލީ ރިޕޯޓުކުރުން ހަރުދަނާކުރުން ފަދަ ފިޔަވަޅުތައް އެ ޤައުމުން އެޅި ކަމަށް އެ ވުޒާރާއިން ހާމަކޮށްފައިވެއެވެ.

ހާމަކުރުން ވަގުތުން ވަގުތަށް ބެލެހެއްޓުމާއި ލަފާކުރެވޭ ނިޒާމެއް ގެންގުޅުމުގެ ސަބަބުން ދަރަނި ނެގުމުގެ ނޭނގުންވެރިކަން ކުޑަވެ ދުނިޔޭގެ އިޤުތިޞާދީ ހަލަބޮލި ދަނޑިވަޅުތަކުގައި ވެސް ކެޕިޓަލް މާކެޓަށް ވާސިލުވުމުގެ ފުރުޞަތު ފަހިވެގެންދާ ކަމަށް އައިއައިއެފް އިން ފާހަގަކޮށްފައިވެއެވެ. ދަރަނި ބެލެހެއްޓުމުގެ ބޮޑެތި ގޮންޖެހުންތަކާ ކުރިމަތިލުމަށް ފަހު ސްރީލަންކާއިން ހާސިލުކުރި މި ނަތީޖާއަކީ އެ ޤައުމުގެ މާލީ ހާމަކުރުމުގެ ނިޒާމަށް ގެނައި ބަދަލުތަކުގެ ސީދާ ނަތީޖާއެވެ.