ސްރީލަންކާގައި 2019 ވަނަ އަހަރު ދިން އީސްޓާ ސަންޑޭ ބޮމުގެ ހަމަލާތައް ހުއްޓުވުމަށް ފިޔަވަޅު ނޭޅި ކަމުގެ ކުށް ސާބިތުވެ އެ ޤައުމުގެ ކުރީގެ އިންސްޕެކްޓާ ޖެނެރަލް އޮފް ޕޮލިސް (އައިޖީޕީ) ޕުޖިތް ޖަޔަސުންދަރައަށް ކޮލޮމްބޯ ހައި ކޯޓުން މިއަދު މަރުގެ ޙުކުމް އިއްވައިފިއެވެ.

ތިން ފަނޑިޔާރުންގެ ބެންޗުގެ ތެރެއިން ދެ ފަނޑިޔާރުންގެ އަޣުލަބިއްޔަތުން އެ ޙުކުމް އިއްވީ ޖިނާއީ އިހުމާލާއި ވާޖިބު އަދާނުކުރުމުގެ ކުށާއި މީހުން މެރުމަށް ވާގިވެރިވުމުގެ ކުށް ސާބިތުވެގެންނެވެ. ޖަޔަސުންދަރައާ ދެކޮޅަށް ހުށަހެޅި 855 ދައުވާގެ ތެރެއިން 854 ދައުވާއެއް ސާބިތުވެފައިވެއެވެ. ނަމަވެސް އެ ބެންޗުގެ އެއް ފަނޑިޔާރު ތަފާތު ރައުޔެއް ނެރުއްވައި ދައުލަތުން އެކަށީގެންވާ މިންވަރަށް ހެކި ހުށަހެޅިފައި ނުވާ ކަމަށް ކަނޑައެޅުއްވިއެވެ.

ޙުކުމް އިއްވަވަމުން ފަނޑިޔާރު ފާހަގަކުރެއްވީ 2019 ވަނަ އަހަރުގެ އެޕްރީލް 20 ވަނަ ދުވަހުގެ ރޭ ދައުލަތުގެ ޖާސޫސީ އިދާރާގެ ޑައިރެކްޓަރު ނިލާންތަ ޖަޔަވަރުދެނަ ކެތަލިކް ފައްޅިތަކާއި ކޮލޮމްބޯ ހިސާބުގެ ޓުރިސްޓް ހޮޓެލްތަކަށް ޖާނުން ފިދާވެގެން ހަމަލާ ދޭން ރާވާފައިވާ ކަމުގެ އިންޓެލިޖެންސް މަޢުލޫމާތު ޖަޔަސުންދަރައާ ހިއްސާ ކުރި ކަމަށެވެ.

"ކުށް ހުއްޓުވުމަށް ދައުލަތުން ޢައްޔަންކޮށްފައި ހުރި އޮފިސަރެއްގެ ޙައިސިއްޔަތުން އޭނާ ވަނީ ވާޖިބު އަދާކުރުމުގައި ނާކާމިޔާބުވެފައި" ފަނޑިޔާރު ޙުކުމް އިއްވަވަމުން ވިދާޅުވިއެވެ.

ޖަޔަސުންދަރައަކީ 2016 ވަނަ އަހަރުގެ އެޕްރީލް މަހުން ފެށިގެން ސްރީލަންކާގެ 34 ވަނަ އައިޖީޕީގެ މަގާމުގައި ހުރި އޮފިސަރެވެ. އީސްޓާ ހަމަލާތަކާ ގުޅިގެން އޭނާ މަޖުބޫރީ ޗުއްޓީއަކަށް ފޮނުވާލިއެވެ. 2022 ވަނަ އަހަރުގެ ފެބްރުއަރީ މަހު ހައި ކޯޓުގެ ޓްރައިލް އެޓް ބާ އިން ފުރަތަމަ ޖަޔަސުންދަރައާއި ކުރީގެ ޑިފެންސް ސެކެޓެރީ ހެމަސިރި ފެނާންޑޯ ދައުވާއިން ބަރީއަކުރިއެވެ. ނަމަވެސް ބަންޑާރަ ނައިބު އެ ނިންމުން އިސްތިއުނާފުކޮށް ސުޕްރީމް ކޯޓުން ކުރީގެ ބަރީއަކުރުން ޤާނޫނާ ޚިލާފު ކަމަށް ކަނޑައަޅައި ޝަރީޢަތް ކުރިއަށް ގެންދިޔުމަށް އެންގިއެވެ.

2019 ވަނަ އަހަރުގެ އެޕްރީލް 21 ވަނަ ދުވަހު ފައްޅިތަކާއި މަތީ ފެންވަރުގެ ހޮޓެލްތަކަށް އަމާޒުކޮށް ދިން އެ ނިރުބަވެރި ހަމަލާތަކުގައި 260 އަށް ވުރެ ގިނަ މީހުން މަރުވެ އެތައް ސަތޭކަ ބަޔަކު ޒަޚަމްވެފައިވެއެވެ. ހަމަލާތައް ހުއްޓުވުމުގައި އިހުމާލުވި ކަމަށް ތުހުމަތުކޮށް ކުރީގެ ޑިފެންސް ސެކެޓެރީ ހެމަސިރި ފެނާންޑޯއާ ދެކޮޅަށް ހުށަހެޅި މައްސަލައިގެ ޝަރީޢަތް އަދިވެސް ކޯޓުގައި ކުރިއަށް އެބަ ދެއެވެ.