ކ. ގާފަރު ކައިރިން ބަންޑުންޖަހާލި އެލްސީވީން (ކޮޅުވެއްޓި) ގެއްލިގެން ހޯދަމުންދާ ދެ މީހުން ފެނޭތޯ އެމްއެންޑީއެފް ކޯސްޓްގާޑުން ކުރިއަށްގެންދާ އޮޕަރޭޝަންގައި، ކަނޑާއި ވައިގެމަގުން ބޮޑު ސަރަހައްދެއް ބަލައިފިއެވެ.

އެމްއެންޑީއެފް އިން މައުލޫމާތު ދޭ ގޮތުގައި، ކޯސްޓްގާޑާއި އެމްއެންޑީއެފް އެއަރ ކޯރ ގުޅިގެން ހިންގާ މި އޮޕަރޭޝަންގައި މިހާތަނަށް ކަނޑާއި ވައިގެ މަގުން 2747 އަކަ ނޯޓިކަލް މޭލްގެ ސަރަހައްދެއް ވަނީ ބަލާފައެވެ. މީގެ އިތުރުން، ކޯސްޓްގާޑްގެ ޑައިވަރުން ވަނީ އެލްސީވީ އަޑިޔަށްދިޔަ ސަރަހައްދު ޑައިވްކޮށްގެންވެސް ބަލާފައެވެ.

މި މަސައްކަތުގައި ކަނޑުމަގުން ކޯސްޓްގާޑް ޝިޕް 'އިމާދުއްދީން' އާއި ފާސްޓް އިންޓަރސެޕްޓަރ ކްރާފްޓް ހަރަކާތްތެރިވަމުން ދާއިރު، މިހާތަނަށް ކުރެވުނު މަސައްކަތުން އެ ދެ މީހުން އަދި ފެނިފައެއް ނުވެއެވެ.

މި ހާދިސާ ހިނގާފައިވަނީ ޖުލައި މަހުގެ 31 ވަނަ ދުވަހުގެ ހެނދުނު 08:48 އެހާކަންހާއިރުއެވެ. އެ ވަގުތު ކޮޅުވެއްޓީގައި ޖުމްލަ 10 މީހުން ތިއްބެވެ. އެއީ 2 ދިވެހިންނާއި 8 ބިދޭސީންނެވެ. މީގެ ތެރެއިން ގެއްލިގެން ހޯދަމުންދަނީ ދެ ބިދޭސީންނެވެ.

ހާދިސާގައި ސަލާމަތްވި 8 މީހުން ގާފަރަށް ގެންގޮސްފައިވާއިރު، އެ މީހުންގެ ހާލު ރަނގަޅު ކަމަށް ގާފަރު ކައުންސިލުން ބުނެއެވެ.