މީގެ 40 އަހަރު ކުރިން މާލެއަށް ދަތުރުކުރި ބައްތެއްޔަކުން ގެއްލުނު މީހަކު ދިރިހުރިތޯ ބަލަން ގއ. ގެމަނަފުށީ މެޖިސްޓްރޭޓް ކޯޓުން އިއުލާންކޮށްފިއެވެ.

ގެމަނަފުށީ ކޯޓުން ބުރާސްފަތި ދުވަހު ކުރި އިއުލާނެއްގައި ބުނެފައިވަނީ، ދިރިހުރިތޯ ބަލަމުންދަނީ ގއ. ދިޔަދޫ / ތަނޑިރަތްމާގޭ، ހަސަން މުހައްމަދު ކަމަށެވެ. އެހެންކަމުން، އޭނާ ދުނިޔޭގައި ހުރިކަން ނުވަތަ ނެތްކަން އެނގޭ އެއްވެސް ފަރާތެއް ވާނަމަ، ކުރިއަށް އޮތް 10 ދުވަހުގެ ތެރޭގައި ލިޔުމަކުން އެކަން އެ ކޯޓަށް އެންގުމަށް ވަނީ އެދިފައެވެ.

މި މައްސަލައާ ގުޅިގެން ހަސަން މުހައްމަދުގެ ކާފަ ދަރިއަކު ވޮއިސްއަށް މައުލޫމާތު ދެމުން ބުނެފައިވަނީ، އޭނާގެ ކާފަ ގެއްލުނީ މީގެ 40 އަހަރު ކުރިން، ގއ. ދިޔަދޫގެ ބައްތެއްޔެއްގައި އިންޖީނު އެޅުމަށްޓަކައި މާލެއަށް ކުރި ދަތުރެއްގެ ތެރޭގައި ކަމަށެވެ.

އެ ދަތުރުގައި ބައްތެއްޔާއި އޭގައި ދަތުރުކުރި ހުރިހާ ފިރިހެނުން ގެއްލިފައިވާއިރު، މިއަދާ ހަމައަށްވެސް އެމީހުންނަށް ވީނުވީއެއް އެނގިފައި ނުވާކަމަށް އޭނާ ބުންޏެވެ.

ކޯޓުން މިފަދަ އިއުލާނެއް ކުރީ ހަސަން މުހައްމަދުގެ ތަރިކައާ ގުޅޭ މައްސަލައެއް ކޯޓަށް ހުށަހެޅިފައިވުމުން، އޭނާ ދުނިޔޭގައި ހުރިތޯ ނުވަތަ ނެތްތޯ ކަށަވަރު ކުރުމުގެ ގޮތުންނެވެ.

ގއ. ދިޔަދޫއަކީ ކުރިން މީހުން ދިރިއުޅުނު ރަށެއް ނަމަވެސް، 2009 ވަނަ އަހަރު އެ ރަށުގެ ރައްޔިތުން ވަނީ ރާއްޖޭގެ އެހެން ރަށްރަށަށް ބަދަލުކޮށްފައެވެ. އެ ރަށުގެ މީހުން މައިގަނޑު ގޮތެއްގައި ބަދަލުކުރެވުނީ ގއ. ގެމަނަފުއްޓާއި ލ. ފޮނަދޫއަށެވެ. އެހެންކަމުން މިހާރު ދިޔަދޫއަކީ ފަޅު ރަށެކެވެ.