ދިހަ ދުވަސްތެރޭ ރާއްޖޭގައި ބަންގްލަދޭޝްގެ އަށް މީހަކު މަރުވެފައިވާ ކަމަށް ރާއްޖޭގައި ހުންނަ ބަންގްލަދޭޝްގެ ހައި ކޮމިޝަނާ ހަވާލީ އެ ގައުމުގެ ނޫހަކުން ރިޕޯޓް ކޮށްފި އެވެ.
ބަންގްލަދޭޝްގެ ވިއުސް ނޫހުން ރިޕޯޓްކުރި ގޮތުގައި ޖުލައި މަހުގެ 25 ވަނަ ދުވަހުން ފެށިގެން އޮގަސްޓް މަހުގެ ތިންވަނަ ދުވަހަށް ރާއްޖޭގައި ބަންގްލަދޭޝްގެ އަށް މީހަކު މަރުވެފައިވެ އެވެ. އޭގެ ތެރޭގައި ވަރަށް ޒުވާން މީހުން ވެސް ހިމެނެ އެވެ.
އެ މީހުންގެ ނަމާއި އުމުރާއި މަރުގެ ތަފްސީލުވެސް އެ ނޫހުން ހާމަކޮށްފައިވެ އެވެ. އެގޮތުން ޖުލައި މަހުގެ 25 ވަނަ ދުވަހު އުމުރުން 23 އަހަރުގެ ޒުވާނަކު މަރުވީ މަސައްކަތު ސައިޓްގައި ހިނގި އެކްސިޑެންޓެއްގައި ކަމަށް ވަނީ ބުނެފަ އެވެ.
އަދި އުމުރުން 45 އަހަރުގެ މީހަކާއި އުމުރުން 47 އަހަރުގެ މީހަކައި އުމުރުން 44 އަހަރުގެ މީހަކު ވަނީ ސްޓްރޯކެއް ޖެހިގެން މަރުވެފަ އެވެ. މީގެ އިތުރުން ވިހައެއް ބޮވިގެން ވެސް މީހަކު މަރުވެފައިވާ ކަމަށް ރިޕޯޓްގައިވެ އެވެ. މި މަހުގެ ފުރަތަމަ ދުވަހު މަރުވީ އުމުރުން 21 އަހަރުގެ ޒުވާނެކެވެ.
މީގެ އިތުރުން ބަގްލަދޭޝްއަށް ނިސްބަތްވާ އުމުރުން 37 އަހަރުގެ މީހަކު މަރުވެފައި އޮއްވާ ފެނިފައިވާ ކަމަށާ އެއީ އަމިއްލައަށް މަރުވުމުގެ ހާދިސާއެއް ކަަމަށްވެސް ބުނެ އެވެ. މީގެ އިތުރުން އުމުރުން 70 އަހަރުގެ މީހަކު މަރުވެފައިވާ ކަމަށްވެސް ވެ އެވެ.
ރާއްޖޭގައި މަސައްކަތް ކުރާ ބިދޭސީންގެ ތެރެއިން އެންމެ ގިނައީ ބަންގްލަދޭޝްއަށް ނިސްބަތްވާ މީހުންނެވެ. އެ ގައުމަށް ނިސްބަތްވާ އެތައް ހާސް ބަޔަކު ރާއްޖޭގައި އުޅެ އެވެ. އޭގެ ތެރޭގައި ގަވާއިދާ ހިލާފަށް އުޅޭ ގިނަ އަދަދެއްގެ ބަޔަކުވެސް ހިމެނެ އެވެ.
Advertisement
This content is created and paid for by advertisers and does not involve Voice Journalists
