މި އަހަރުގެ ފުރަތަމަ ހަތް މަސް ދުވަހުގެ ތެރޭގައި ރާއްޖޭގައި ދިވެހި ފުލުހުންގެ ހިދުމަތުން ހިންގި މަސްތުވާތަކެތީގެ އޮޕަރޭޝަންތަކުގައި 144 ކިލޯއަށްވުރެ ގިނަ މަސްތުވާތަކެތި އަތުލައިގަނެ، 1،875 މީހުން ހައްޔަރު ކޮށްފައިވާ ކަމަށް ދިވެހި ފުލުހުންގެ ހިދުމަތުން ބުނެފި އެވެ.

ފާއިތުވި ހަތް މަސްދުވަހު ޑްރަގް އެންފޯސްމަންޓުން ކޮށްފައިވާ މަސައްކަތްތަކާ ގުޅޭގޮތުން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ ޖަނަވަރީ 1 އިން ޖުލައި 31 ގެ ނިޔަލަށް މާލެ ސަރަހައްދާއި އަތޮޅުތެރެ ހިމެނޭގޮތަށް ޖުމްލަ 1،141 އޮޕަރޭޝަން ހިންގާފައިވާ ކަމަށެވެ. އިންޓެލިޖެންސް މައުލޫމާތާއި އޮޕަރޭޝަނަލް ބޭނުންތަކަށް ބިނާކޮށް ހިންގުނު މި ހަރަކާތްތަކުގައި 23،249 މީހުންނާއި، 7,309 ތަނެއް ވަނީ ބަލައިފާސްކޮށްފަ އެވެ. މުޅި ރާއްޖެއިން ހިންގުނު މި އޮޕަރޭޝަންތަކުގައި ޖުމްލަ 144.341 ކިލޯގްރާމްގެ މަސްތުވާތަކެއްޗާއި، 1،856 ފުޅި ބަނގުރާ ވަނީ ފުލުހުންގެ ބެލުމުގެ ދަށަށް ވަނީ ގެނެސްފަ އެވެ.

ފުލުހުން ބުނި ގޮތުގައި ފާއިތުވި ހަތް މަސްދުވަހުގެ ތެރޭގައި މަސްތުވާތަކެއްޗާ ގުޅުންހުރި 1،533 މައްސަލައެއް ތަހުގީގުކުރިއިރު، މީގެ ތެރެއިން 634 މައްސަލައެއްގައި ދައުވާކުރުމާމެދު ގޮތެއް ނިންމުމަށް ޕްރޮސެކިއުޓަރ ޖެނެރަލްގެ އޮފީހަށް ވަނީ ފޮނުވާފަ އެވެ.

މާލެ ސަރަހައްދުގެ އިތުރުން އަތޮޅުތަކުގައިވެސް ފުޅާ ދާއިރާއެއްގައި އޮޕަރޭޝަންތައް ވަނީ ކުރިއަށް ގެންގޮސްފަ އެވެ. އެގޮތުން، ކައުންޓާ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓާއި އަތޮޅުތަކުގައި މަސައްކަތްކުރާ ފުލުހުން ގުޅިގެން 17 އަތޮޅެއްގައި 260 އިންޓެލިޖެންސް-ލެޑް އޮޕަރޭޝަން ހިންގާފައިވާއިރު، މި އޮޕަރޭޝަންތަކުގައި 298 މީހަކު ވަނީ ހައްޔަރުކޮށްފަ އެވެ.

މިއަދު އޮތް ނޫސްވެރީންގެ ބައްދަލްވުން --

ފުލުހުންގެ ޑްރަގް އެންފޯސްމަންޓް ޑިޕާޓްމަންޓުން ތަހުގީގުކުރި މައްސަލަތަކަށް ބަލާއިރު، 377 މައްސަލައެއް ވަނީ ތަހުގީގު ކޮށްފަ އެވެ. މީގެ ތެރެއިން 256 މައްސަލަ (67 އިންސައްތަ) ދައުވާކުރުމަށް ޕީޖީ އޮފީހަށް ވަނީ ފޮނުވާފަ އެވެ.

ޑްރަގް އެންފޯސްމަންޓުން އެކަނިވެސް 137.0296 ކިލޯގެ މަސްތުވާތަކެތި އަތުލައިގަނެފައިވާއިރު، މީގެ މަގުމަތީގެ އަގު 120،243،100 ރުފިޔާއަށް އަރަ އެވެ. އަދި 845 ފުޅި ބަނގުރާ އަތުލައިގަނެފައިވާއިރު، މީގެ އަގަކީ 960،900 ރުފިޔާއެވެ. އެހެންކަމުން، އެ ބަހާއިން އަތުލައިގަތް ތަކެތީގެ ޖުމްލަ އަގު 121،204،000 ރުފިޔާއަށް އަރަ އެވެ.

މީގެ އިތުރުން، މަސްތުވާތަކެތި ޓްރެފިކްކުރުމުގެ މިންގަނޑަށް ފެތޭ 94 މައްސަލައެއް ތަހުގީގު ކޮށްފައިވެ އެވެ. މި މައްސަލަތަކާ ގުޅިގެން 147 މީހަކު ހައްޔަރުކޮށްފައިވާއިރު، 83 މައްސަލަ (88 އިންސައްތަ) ދައުވާކުރުމަށް ޕީޖީ އޮފީހަށް ވަނީ ފޮނުވާފަ އެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ޑްރަގް އެންފޯސްމަންޓުން ވަނީ، މަސްތުވާތަކެތީގެ ނެޓްވޯކްތައް ހިންގާ ފަރާތްތަކާއި އެކަމަށް ފަންޑުކުރާ ފަރާތްތައް ހޯދުމަށް ހާއްސަ އިސްކަމެއް ދީގެން މަސައްކަތްކުރަމުންދާކަން ފާހަގަ ކޮށްފައިވެ އެވެ.

އެގޮތުން، މަސްތުވާތަކެއްޗާ ގުޅުންހުރި ފައިސާގެ 25 މައްސަލައެއްގެ ތަހުގީގު މިހާރުވެސް ކުރިއަށްދެ އެވެ. އަދި ނެޓްވޯކްގެ ގޮތުގައި ހަރަކާތްތެރިވާ ތިން މައްސަލައެއް ބަލަމުންދާކަން ވަނީ ހާމަކޮށްފަ އެވެ. ތަފާސްހިސާބުތަކުން ފެންނަ އަދަދުތަކަކީ ސީދާ ކުށްކުރާ މިންވަރު އިތުރުވުންކަމަށް މާނަ ނުކުރުމަށް ޗީފް ސުޕްރިންޓެންޑެންޓް އަޙްމަދު މުސްލިމް އެދިލެއްވި އެވެ. ސަބަބަކީ، އޮޕަރޭޝަނަލް މަސައްކަތްތަކާއި ތަހުގީގު އަމާޒުތައް ވަގުތާއި ހާލަތަށް ބަލައި މުރާޖައާކޮށް ބަދަލުގެންނަމުންދިއުމާ ގުޅިގެން ތަފާސްހިސާބުތަކާއި ކާމިޔާބު އޮޕަރޭޝަންތަކުގެ އަދަދުތަކަށް ބަދަލުތައް އަންނާނެތީ އެވެ.

މި މައްސަލަތަކުގައި ޝާމިލުވާ 116 ބިދޭސީއަކު ޑީޕޯޓުކުރުމުގެ އިޖުރާއަތްތައް ކުރިއަށްގެންދިއުމަށް މޯލްޑިވްސް އިމިގްރޭޝަނާ ވަނީ ހަވާލުކޮށްފަ އެވެ. އަދި ފަރުވާއަށް ބޭނުންވާ 37 މީހަކަށް ފަރުވާގެ ފުރުސަތު ފަހިކޮށްދިނުމަށް ކަމާގުޅުންހުރި އިދާރާތަކާ ވަނީ ހަވާލުކޮށްފަ އެވެ.

ކެފޭ އުސޫލުން މަސްތުވާތަކެތި ބޭނުންކުރާ ތަނެއް.. ފޮޓޯ: ފުލުހުން

މީގެ އިތުރުން، މަސްތުވާތަކެއްޗާ ބެހޭ ގާނޫނަށް ގެނެވުނު 3 ވަނަ އިސްލާހުގެ ދަށުން ލިބިދީފައިވާ ބާރުގެ ދަށުން، މަސްތުވާތަކެތި ބޭނުންކުރުމުގެ ޚިދުމަތް ފޯރުކޮށްދޭ ތަންތަނުގެ ގޮތުގައި ފާހަގަކުރެވުނު މާލޭގެ 6 ތަނެއް ވަނީ ބަންދުކޮށްފައެވެ. އެ ތަންތަނަކީ މ. ގުންޒަރު، މ. ތަރިވިލާގެ، މ. އަމީރާމަންޒިލް، މ. ސެވަން އެންޑް ހައުސް، މ. ކަނޑުފިނިގެ، އަދި މ. ލޭންޑްއޮފްގާޑަން އެވެ. ގާނޫނީގޮތުން ކަނޑައެޅިފައިވާ މުއްދަތުގެ ތެރޭގައި މި ތަންތަން މޮނިޓަރކުރުމުގެ މަސައްކަތް ފުލުހުން ދަނީ ކުރަމުންނެވެ.