އުރީދޫ މޯލްޑިވްސްގެ 21 ވަނަ އަހަރީ ދުވަހުގެ ހަރަކާތްތަކުގެ ތެރެއިން މާސްޓަރކާޑު ބޭނުންކޮށްގެން ފައިސާ ދައްކާ ކަސްޓަމަރުންގެ މެދުގައި ގުރުއަތުން ދެ މީހަކަށް މެލޭޝިއާ ދެކޮޅު ޓިކެޓު ލިބޭ ޕްރޮމޯޝަނެއް އެ ކުންފުނިން ފަށައިފިއެވެ.

"މާސްޓަރކާޑު ގިވްއަވޭ" ގެ ނަމުގައި ކުރިއަށް ގެންދާ މި ޕްރޮމޯޝަން ހިނގާނީ 1 އޮގަސްޓުން ފެށިގެން 30 ސެޕްޓެމްބަރު 2026 ގެ ނިޔަލަށް ކަމަށް އުރީދޫއިން ބުނެފައިވެއެވެ. މިކަމުގައި ބައިވެރިވެވޭނީ އުރީދޫ ސުޕަރއެޕް މެދުވެރިކޮށް މާސްޓަރކާޑުން 400 ރުފިޔާ ނުވަތަ އެއަށްވުރެ ބޮޑު ޢަދަދެއްގެ މުޢާމަލާތެއް ހިންގާ ޕްރީޕެއިޑް އަދި ޕޯސްޓްޕެއިޑް ކަސްޓަމަރުންނަށެވެ. ޓޫރިސްޓު ޕްލޭންތަކާއި މޮބައިލް ބްރޯޑްބޭންޑް ޕްލޭންތައް މީގެ ތެރޭގައި ނުހިމެނެއެވެ.

ގުރުއަތުގައި ބައިވެރިވެވޭ ފުރުޞަތުތައް ބިނާވެފައި އޮންނާނީ ފައިސާ ދެއްކި ގޮތެއްގެ މައްޗަށެވެ. އެ ކުންފުނިން ބުނީ މާސްޓަރކާޑުން އެއް ފަހަރު ފައިސާ ދައްކައިފި ނަމަ ގުރުއަތުގެ އެއް ފުރުޞަތު ލިބޭ ކަމަށެވެ. ސޭވްކޮށްފައިވާ ކާޑެއް ބޭނުންކޮށްފި ނަމަ ދެ ފުރުޞަތު ލިބެއެވެ. އޮޓޯޕޭ މެދުވެރިކޮށް ފައިސާ ދައްކާ ކަސްޓަމަރުންނަށް ޝަރުޠު ހަމަވާ ކޮންމެ މުޢާމަލާތަކަށް ފަސް ފުރުޞަތު ލިބޭނެ ކަމަށް ވެސް އުރީދޫއިން ހާމަކޮށްފައިވެއެވެ. ޕްރޮމޯޝަން ކުރިއަށްދާ މުއްދަތުގައި ގިނަ މުޢާމަލާތްތައް ހިންގައިގެން ފުރުޞަތުތައް އިތުރުކުރެވޭނެއެވެ.

އޮޓޯޕޭ ފީޗާ ބޭނުންކުރާ ކަސްޓަމަރުންނަށް ކާޑުގެ މަޢުލޫމާތު ރައްކާތެރިކަމާ އެކު ސޭވްކޮށް ކަނޑައެޅި ތާރީޚެއްގައި އޮޓޮމެޓިކުން ފައިސާ ދެއްކޭ ގޮތް ހަމަޖެހިފައިވާ ކަމަށް އުރީދޫއިން ބުނެފައިވެއެވެ. މި ޚިދުމަތާ ގުޅޭ އެހީ ބޭނުންވާ ފަރާތްތަކަށް އެ ކުންފުނީގެ އޭއައި ޑިޖިޓަލް އެސިސްޓެންޓް "އެވީ" މެދުވެރިކޮށް މަޢުލޫމާތު ހޯދެން ހުންނާނެއެވެ.

ޕްރޮމޯޝަން ނިމުމުން ޝަރުޠު ހަމަވާ ކަސްޓަމަރުންގެ މެދުގައި ނަގާ ގުރުއަތުން ހޮވޭ އެއް ފަރާތަކަށް ދެ މީހުންގެ މެލޭޝިއާ ދެކޮޅު ޓިކެޓު ލިބޭނެއެވެ. ގުރުއަތު ނެގޭ ވަގުތު ނަސީބުވެރިޔާގެ ޚިދުމަތް މެދުކެނޑިފައި ނެތުމާއި ދައްކަން ޖެހޭ ފައިސާ ނުދައްކާ ނެތުން ލާޒިމުވާނެއެވެ.