ރައީސުލްޖުމްހޫރިއްޔާ ޑރ. މުހައްމަދު މުޢިއްޒުއާ ބައްދަލުކޮށްލައްވަން ބޭނުންވާ ރައްޔިތުންނަށް ވީހާވެސް ފުޅާ ދާއިރާއެއްގައި އެ ފުރުސަތު ފަހިކޮށްދިނުމަށް "ރައްޔިތުންގެ އަޑު" ނަމުގައި ފެށުމަށް ހަމަޖެހިފައިވާ ސިލްސިލާގައި ބައިވެރިވާން އެދޭ ރައްޔިތުންގެ ތެރެއިން އިތުރު ދާއިރާތަކެއްގެ ރައްޔިތުންނަށް ނަން ނޯޓުކުރެއްވުމުގެ ފުރުސަތު ހުޅުވާލައިފި އެވެ.

ރައީސުލްޖުމްހޫރިއްޔާގެ އޮފީހުން މިއަދު ބުނީ ރާއްޖޭގެ އިންތިހާބީ 93 ދާއިރާގެ ތެރެއިން މިފަހަރު ހުޅުވައިލާފައިވަނީ އިހަވަންދޫ ދާއިރާ އާއި ނައިފަރު ދާއިރާ އާއި ފޮނަދޫ ދާއިރާ އާއި މީދޫ ދާއިރާ އާއި ވިލިމާލެ ދާއިރާ އާއި މައްޗަންގޮޅި ދެކުނު ދާއިރާ އާއި މާމިގިލި ދާއިރާ އަދި ތިނަދޫ އުތުރު ދާއިރާއަށް ނިސްބަތްވާ ރައްޔިތުންނަށް ކަމަށެވެ.

"ރައްޔިތުންގެ އަޑު" ބައްދަލުވުމުގައި ބައިވެރިވާން ބޭނުންވާ މީހުން، ރައީސް އޮފީހުގެ ވެބްސައިޓްގައި މިކަމަށް ޚާއްޞަކޮށްފައިވާ ޕޯޓަލް މެދުވެރިކޮށް 17 އޮގަސްޓް ވާ ހޯމަ ދުވަހުގެ ރޭ 12:00 ގެ ކުރިން ނަން ނޯޓު ކުރުމަށް ވަނީ އެދިފަ އެވެ.

"ރައްޔިތުންގެ އަޑު" ބައްދަލުވުންތަކުގައި ބައިވެރިވުމުގެ އުސޫލު، ރައީސް އޮފީހުގެ ވެބްސައިޓުން ފެންނަން އެބަ ހުއްޓެވެ.