ރާއްޖޭގައި ބޭންކިންގެ އިސް މަގާމުތަކުގައި ބިދޭސީންގެ ދައުރު ހަނިކޮށް ދިވެހިންގެ ނިސްބަތް 80 އިންސައްތައަށް ގެންދިއުމަށް ވަކި އަމާޒެއްގެ ދަށުން މުހިންމު މަސައްކަތްތަކެއް ފަށާފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހުމަދު މުނައްވަރު މިރޭ ވިދާޅުވެއްޖެ އެވެ.
މޯލްޑިވްސް ޕްރިމިއަރ ބޭންކް (އެމްޕީބީ) ގެ ޑިޖިޓަލް މަންސަތައް ރަސްމީކޮށް އިފުތިތާޙުކުރުމަށް މިރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ގަވަރުނަރު ވިދާޅުވީ ރާއްޖޭގައި ބޭންކިންގެ އިސް މަގާމުތަކުގައި ބިދޭސީންގެ 40 އިންސައްތަ ހިއްސާކުރާ ކަމަށެވެ.
އެ އަދަދު 20 އިންސައްތަ ދަށްކޮށް ދިވެހީންގެ އަދަދު އިތުރުކުރުމަކީ އަމާޒެއް ކަމުގައި ވިދާޅުވި އެވެ. އެގޮތުން ކުރިއަށް އޮތް ފަސް އަހަރު ރާއްޖޭގައި ބޭންކިންގެ އިސް މަގާމުތަކުގައި ބިދޭސީންގެ ދައުރު ހަނިކޮށް ދިވެހިންގެ ނިސްބަތް 80 އިންސައްތައަށް ގެންދިއުމަށް މަސައްކަތް ކުރަމުންދާ ކަމަށެވެ.
އައު ބެންކު އިފްތިތާހު ކުރުމުގެ ރަސްމިއްޔާތުގައި ގަވަރުނަރު
އެ އަމާޒަށް ވާސިލުވުމަށް ވަރަށް މުހިންމު ދެ ކަމެއް ފަށާފައިވާ ކަމަށް ވެސް ވިދާޅުވި އެވެ. އެއީ "ހިއުމަން ކެޕޭސިޓީ ޑިވެލޮޕްމަންޓް ފަންޑު" ޤާއިމު ކުރުމާއި އޭޝިއަން އިންސްޓިޓިއުޓް އޮފް ޗާޓާޑް ބޭންކާސް (އޭއައިސީބީ) އާއެކު އެއްބަސްވުމެއް ގާއިމުކުރުން ކަމުގައި ވިދާޅުވި އެވެ.
ބޭނުމަކީ ބެންކިންގެ ދާއިރާގެ އިސް މަގާމަށް ފަންނީ، ގާބިލް ދިވެހީން ބިނާކުރުމެވެ.
ރޭ ބާސެލޯ ނަސަންދުރާގައި ބޭއްވެވި، މޯލްޑިވްސް ޕްރިމިއާ ބޭންކްގެ އިފުތިތާޙީ ރަސްމިއްޔާތުގައި ރައީސުލްޖުމްހޫރިއްޔާ ވަނީ، ބޭންކުގެ މޯބައިލް އެޕްލިކޭޝަން 'އެމް.ޕީ.ބީ ޕްލަސް" އާއި އިންޓަރނެޓް ބޭންކިންގ ޚިދުމަތް އިފުތިތާޙުކޮށްދެއްވާފައެވެ.
މޯލްޑިވްސް ޕްރިމިއާ ބޭންކްގެ އިފުތިތާޙުކުރުން
އެމްޕީބީ އަކީ، ޓިއަރ 1 ފެންވަރުގެ، ސައްތައިން ސައްތަ ދިވެހި ބޭންކެކެވެ. ބޭންކުގެ މަޤުޞަދަކީ، ދިވެހި މާލީ ވެއްޓަށް އަހުލުވެރި، ޒަމާނީ، އިތުބާރު ހުރި މާލީ ޚިދުމަތްތަކެއް މެދުވެރިކޮށް، ވަކި ވަކި ފަރުދުންނާއި، ކުދި އަދި މެދު ފަންތީގެ ވިޔަފާރިތަކަށާއި ބޮޑެތި ކޯޕަރޭޝަންތަކަށް، ރާއްޖެ އާއި ބައިނަލްއަޤުވާމީ މައިދާނުން ފަހި ފުރުޞަތުތައް ހޯދައިދިނުން ކަމަށް އެ ބެންކުން ބުނެ އެވެ.
Advertisement
This content is created and paid for by advertisers and does not involve Voice Journalists
