އިނގިރޭސިވިލާތުގެ މަޝްހޫރު ޢިލްމުވެރިޔާ އައްޝައިޚް އަބޫ ތައިމިއްޔާ, ދީނީ ހަރަކާތްތަކެއް ކުރިއަށް ގެންދެވުމަށް ރާއްޖެ ވަޑައިގެންފި އެވެ.

މަހަލްދީބް ފައުންޑޭޝަންގެ ފަރާތުން އިންތިޒާމްކޮށްގެން ކުރިއަށް ގެންދާ "އެންލައިޓްން" ގެ ނަމުގައި ގެންދާ މި ޕްރޮގްރާމް ނުވަ ދުވަހުގެ މުއްދަތަށް ކުރިއަށް ގެންދިޔުމަށް ވަނީ ހަމަޖެހިފަ އެވެ.

އެންލައިޓްން ޕްރޮގްރާމްގައި ޒުވާނުންގެ ހިތްތަކުގައި ޚާއްޞާ ގަދަރަކާއި ޝައުޤުވެރިކަމެއް ދެވިފައިވާ ޝެއިޚް އަބޫތައިމިއްޔާގެ ދީނީ އަދި ތަޢުލީމީ ޙަރަކާތްތަކެއްގައި ކުރިއަށް ގެންދިޔުމަށް ވަނީ އިންތިޒާމް ކުރެވިފައިވާއިރު އޭގެތެރޭގައި ބޮޑަށް އަމާޒުކުރެވިފައިވާނީ ޒުވާނުންނާއި ފުރާވަރު ޢުމުރު ފުރައިގެ ކުދީންނަށެވެ. ޝެއިޚްގެ ޕްރޮގްރާމްތައް މާލޭ ސިޓީގެ އިތުރުން އައްޑު ސިޓީ އަދީ ފުވައްމަލަކު ސިޓީގައި ވެސް ކުރިއަށް ގެންދާ ގޮތައް ވަނީ ހަމަޖެހިފަ އެވެ.

ޝެއިޚްގެ ދަތުރުގެ ޕްރޮގްރާމްތައް ފެށޭނީ މާލޭއިންނެވެ. އެއަށް ފަހު އައްޑޫ ސިޓީ އަދި ދެން ފުވައްމުލަކު ސިޓީގައި ޕްރޮގްރާމްތައް ކުރިއަށް ދާނެ އެވެ. އެކި އެކި ބައްދަލުވުންތަކާއި ޒުވާނުންނަށް ޚާއްޞަ ޑިނާ ނުވަތަ ކޮފީ އާއި ޔުނިވާސިޓީ ދަރިވަރުންނާއި ސްކޫލު ދަރިވަރުންނަށް ތަފާތު ޕޮރޮގްރާމްތައް ރޭވިފައި ވެއެވެ. އަދި އޭގެއިތުރުން އިސްލާމީ ކަންތައްކަތަކާއި އައުޤާފާ ބެހޭ ވުޒާރާއާ ގުޅިގެން ބާއްވާ ސެސަންތަކާއި ޢާންމު ދަރުސްއަކާއި، ހުކުރު ޚުޠުބާއަކާއެކު ޒުވާނުންގެ ކުޅިވަރު ހަރަކާތްތަކެއް ހިމެނެ އެވެ. މީގެ އިތުރުން، އަންހެނުންނަށް ޚާއްޞަ ސެޝަނަކާއި، ޓީވީ އަދި ޕޮޑްކާސްޓް ރެކޯޑިންތަކާއި، ދިވެހި ޢިލްމުވެރިންނާއެކު ބާއްވާ ޚާއްޞަ ބައްދަލުވެއްވެސް ރޭވިފައިވެ އެވެ.

މި މަހުގެ 23 ވަނަ ދުވަހު އައްޑޫ ހައި ސްކޫލަށް ޒިޔާރަތް ކުރެއްވުމާއި، ސްކޫލްތަކުގެ ވެރިންނާއި ދަރިވަރުންނާ ބައްދަލުކުރެއްވުމުގެ އިތުރުން، އައްޑޫ ސިޓީ ކައުންސިލްގެ އެހީތެރިކަމާއެކު ޢާންމު ދަރުސްއެއް ބޭއްވުމަށް ހަމަޖެހިފައިވެ އެވެ. 25 އޮގަސްޓުގައި ފުވައްމުލަކު ސިޓީގައި ސްކޫލް ސެޝަނަކާއި، ޒުވާނުންނާއެކު ބައްދަލުވުމަކާއި، ފުވައްމުލައް ސިޓީ ކައުންސިލްގެ އެހީތެރިކަމާއެކު އިތުރު ޢާންމު ދަރުސްއެއް ބޭއްވުމަށް ހަމަޖެހިފައިވެ އެވެ. މީގެ އިތުރުން، ފުވައްމުލަކުގައި ފަތުރުވެރިކަމުގެ ތަޖުރިބާތަކާއި ފެތުމުގެ ހަރަކާތްތަކަށް ދުވަހެއް ޚާއްޞަ ކުރެވިފައިވެ އެވެ.

މުޅި އެންލައިޓްން ޙަރަކާތުގައި އެކިއެކި މުއައްސަސާތުގެ ބައިވެރިވުމާއި އެހީތެރިކަން ލިބިފައިވާކަން މަހަލްދީބު ފައުންޑޭޝަނުން ބުނެ އެވެ. ޚާއްޞަކޮށް އިސްލާމީ ކަންތައްކަތަކާއި އައުޤާފާ ބެހޭ ވުޒާރާ އާއި، ތަޢުލިމީ ވުޒާރާއާއި އައިޔޫއެމް އަދި އެމްއެންޔޫ، އަދި އައްޑޫ އަދި ފުވައްމުލަކު ސިޓީ ކައުންސިލުގެ އެހީތެރިކަން ފާހަގަކޮށްފައިވެ އެވެ.