އިންޑިއާއާއި ސިންގަޕޫރާ ދެމެދު ބާއްވާ އިންޑިއާ-ސިންގަޕޯރ މިނިސްޓީރިއަލް ރައުންޑްޓޭބަލްގެ 4 ވަނަ ބައްދަލުވުން އިއްޔެ ސިންގަޕޫރުގައި ބާއްވައިފިއެވެ.
މި ބައްދަލުވުމުގައި އިންޑިއާގެ ވަޒީރުންގެ ފެންވަރުގެ ވަފުދެއް ބައިވެރިވެވަޑައިގެންނެވި އިރު، އޭގެ ތެރޭގައި ފިނޭންސް މިނިސްޓަރު ނިރްމަލާ ސީތާރާމަން، އެކްސްޓަރނަލް އެފެއާޒް މިނިސްޓަރު ޑރ. އެސް. ޖައިޝަންކަރު، ކޮމާސް މިނިސްޓަރު ޕިއުޝް ގޯޔަލް އަދި މިނިސްޓަރު އޮފް ސްޓޭޓް ޖިތިން ޕްރަސާދާ ހިމެނިވަޑައިގަންނަވައެވެ. ސިންގަޕޫރުގެ ފަރާތުން މި ބައްދަލުވުމުގައި އިސްކޮށް ބައިވެރިވެވަޑައިގެންނެވީ ބޮޑުވަޒީރުގެ ނައިބު އަދި މިނިސްޓަރު ފޯ ޓްރޭޑް އެންޑް އިންޑަސްޓްރީ ގަން ކިމް ޔޮންގްގެ އިތުރުން ސީނިއާ މިނިސްޓަރު ކޭ. ޝަންމުގަމް، ފޮރިން މިނިސްޓަރު ޑރ. ވިވިއަން ބާލަކްރިޝްނަން، ޑިޖިޓަލް ޑިވެލޮޕްމަންޓް މިނިސްޓަރު ޖޯސެފިން ތިއޯ އަދި ޓްރާންސްޕޯޓް މިނިސްޓަރު ޖެފްރީ ސިއޯއެވެ.
މި ބައްދަލުވުމުގައި ދެ ގައުމުގެ ވަޒީރުން ވަނީ އިންޑިއާއާއި ސިންގަޕޫރާ ދެމެދު އޮތް "ކޮމްޕްރިހެންސިވް ސްޓްރެޓީޖިކް ޕާޓްނަޝިޕް" ގެ ދަށުން ކަނޑައަޅާފައިވާ އެޑްވާންސްޑް މެނުފެކްޗަރިންގ، ކަނެކްޓިވިޓީ، ޑިޖިޓަލައިޒޭޝަން، ސިއްހީ ދާއިރާ، ހުނަރު ތަރައްގީކުރުން އަދި ދެމެހެއްޓެނިވި ތަރައްގީގެ ދާއިރާތަކުން ކުރެވިފައިވާ މަސައްކަތްތަކަށް އަލިއަޅުއްވާލައްވާފައެވެ. މީގެ އިތުރުން ފެހި އިގްތިސާދު، އިންޑަސްޓްރިއަލް ޕާކުތައް، ކާބޯތަކެތީގެ ރައްކާތެރިކަން، ފިންޓެކް، ސެމީކޮންޑަކްޓާ އަދި ގްރީން ޝިޕިންގ ފަދަ އާ ދާއިރާތަކުން ގުޅުން ބަދަހިކުރުމާ ގުޅޭގޮތުން ދެ ގައުމުން ފުޅާ ދާއިރާއެއްގައި މަޝްވަރާކުރެއްވިއެވެ.
ދެ ގައުމުގެ ދެމެދުގައި ހާސިލުކުރެވިފައިވާ މުހިންމު ކާމިޔާބީތަކުގެ ތެރޭގައި ޔޫ.ޕީ.އައި މެދުވެރިކޮށް ކުރާ މުއާމަލާތްތައް އިތުރުވުމާއި، އިންޑިއާގެ ޖެނެރިކް ބޭސް ސިންގަޕޫރުގައި ރަޖިސްޓްރީކުރުމުގެ ޕައިލެޓް މަޝްރޫއު ކުރިއަށްދިއުމާއި، އިންޑިއާއިން ސިންގަޕޫރަށް ތާޒާ މޭވާއާއި ކާބޯތަކެތި އެކްސްޕޯޓްކުރުން އިތުރުވުން ހިމެނެއެވެ. އަދި ސެމީކޮންޑަކްޓާ ދާއިރާއަށް ގްރީން ލޭން އިނިޝިއޭޓިވް ތައާރަފްކުރުމަށް ތައްޔާރުވުމުގެ އިތުރުން، ޗެންނާއީގައި ނޭޝަނަލް ސެންޓަރ އޮފް އެކްސެލެންސް ފޯ ސްކިލިންގ ގާއިމުކުރުމާއި، ނޮވެމްބަރު މަހު 4 ވަނަ ސިންގަޕޫރު-އިންޑިއާ ހެކަތޯން ބޭއްވުމަށް ވަނީ ނިންމާފައެވެ.
މި ބައްދަލުވުމުގެ ތެރެއިން ދެ ގައުމުގެ ދެމެދުގައި މުހިންމު އެއްބަސްވުންތަކެއްގައި ވަނީ ސޮއިކޮށްފައެވެ. އޭގެ ތެރޭގައި ކާބޯތަކެތީގެ ވިޔަފާރި ފަސޭހަކުރުމަށް ދެގައުމުގެ ދެމެދު ވެވުނު އެއްބަސްވުމާއި، ކަނޑުގެ ތަރިކައާއި މިއުޒިއަމްތަކުގެ ދާއިރާއިން ގުޅުން ބަދަހިކުރުމަށް ސޮއިކުރެވުނު އެމްއޯޔޫގެ އިތުރުން، ޓެލެކޮމް އަދި ބްރޯޑްކާސްޓިންގ ރެގިއުލޭޓްކުރުމުގެ ތަޖުރިބާތައް ހިއްސާކުރުމަށް ދެގައުމުގެ އިދާރާތަކުގެ މެދުގައި ސޮއިކުރެވުނު ލެޓަރ އޮފް އިންޓެންޓް ހިމެނެއެވެ.
ދަތުރުފުޅުގެ ތެރެއިން އިންޑިއާގެ ވަޒީރުން ވަނީ ސިންގަޕޫރުގެ ބޮޑުވަޒީރު ލޯރެންސް ވޮންގްގެ އަރިހަށް އިހުތިރާމުގެ ޒިޔާރަތެއް ކުރައްވާފައެވެ. އަދި އެކްސްޓަރނަލް އެފެއާޒް މިނިސްޓަރު ޑރ. އެސް. ޖައިޝަންކަރު ވަނީ ސިންގަޕޫރުގައި ހުންނަ އިންޑިއާގެ ހައިކޮމިޝަންގެ އާ އިމާރާތުގެ ބިންގާ އަޅުއްވައިދެއްވާފައެވެ. ކޮމާސް މިނިސްޓަރު ޕިއުޝް ގޯޔަލް އިންޑިއާ-ސިންގަޕޫރު ބިޒްނަސް ފޯރަމްގައި ތަގުރީރު ކުރެއްވި އިރު، ސެމީކޮންޑަކްޓާ ދާއިރާގެ ޚާއްޞަ ރައުންޑްޓޭބަލް ބައްދަލުވުމެއްވެސް ވަނީ ބޭއްވިފައެވެ.
Advertisement
This content is created and paid for by advertisers and does not involve Voice Journalists
