ކަޅުބާޒާރުގައި ޑޮލަރު ވިއްކުމުގެ ޝަރުއީ ހުކުމް, ދިވެހިރާއްޖޭގެ ފަތުވާ މަޖިލީހުން ބަޔާންކޮށްދިނުމަކީ މުހިންމު ކަމެއް ކަމަށް ދެކެވަޑައިގަންނަވާ ކަމަށް ކުރީގެ އިސްލާމިކް މިނިސްޓަރު ޑރ. އަހްމަދު ޒިޔާދު ބާޤިރު ވިދާޅުވެއްޖެ އެވެ.
ރާއްޖޭގައި ޑޮލަރުގެ މައްސަލަ އޮތީ ވަރަށް ބޮޑުވެފަ އެވެ. ހަމަ އަގުގައި ޑޮލަރު ލިބެނީ ދައުލަތުގެ އިދާރާއަކުން ފޯރުކޮށްދޭ އިންތިޒާމެއްގެ ތެރެއިން އެކަންޏެވެ. ނަތީޖާއެއްގެ ގޮތުން ކަޅު ބާޒާރުގައި ޑޮލަރުގެ އަގު ވަނީ ވަރަށް ބޮޑަށް އުފުލިފަ އެވެ.
ކޮންމެ ދުވަހަކު އެ އަދަދު ދަނީ މަތިވަމުންނެވެ.
ކުރީގެ މިނިސްޓަރު އަދި މަޝްހޫރު ދީނީ އިލްމުވެރިޔާ ޑރ. ޒިޔާދު ވިދާޅުވީ ކަޅުބާޒާރުގައި ޑޮލަރު ވިއްކުމުގެ ޝަރުއީ ހުކުމް, ދިވެހިރާއްޖޭގެ ފަތުވާ މަޖިލީހުން ބަޔާންކޮށްދިނުމަކީ މުހިންމު ކަމެއް ކަމަށް ދެކެވަޑައިގަންނަވާ ކަމަށެވެ.
"ދިވެހިރައްޔިތުންނަށް މިކަމުން ވަނީ ގެއްލުންތޯ ނުވަތަ ފައިދާތޯ އަދި މިކަމުގެ ޝަރުއީ ހަމައެއް އޮވޭތޯ ބަޔާންކޮށް ދިނުމަކީ މުހިންމު ކަމެއް ކަމުގައި ދެކެން," ޑރ. ޒިޔާދު ވިދާޅުވި އެވެ.
ސަރުކާރުން ދަނީ ޑޮލަރުގެ ކަޅުބާޒާރު ނައްތާލުމަށް ގާނޫނަށްވެސް ބަދަލުތަކެއް ގެންނަމުންނެވެ. ޑޮލަރުގެ ކަޅުބާޒާރަކީ ބަޔަކު ބޮޑު އާމްދަނީއެއް ހޯދަން ރޭވިގެން ހިންގާ ކަމެކެވެ.
Advertisement
This content is created and paid for by advertisers and does not involve Voice Journalists
