ތެލުގެ ބާވަތްތައް ކުރިއަށް އޮތް ތަނުގައި މެދުކެނޑުމެއްނެތި ލިބޭނެކަން ކަށަވަރުކުރުމަށާއި ދެގައުމުގެ ވިޔަފާރީގެ ގުޅުން އިތުރުކުރުމު ގޮތުން، އިންޑިއާގެ ތެލުގެ ބާވަތްތައް އެތެރެކުރުމަށްޓަކައި މޮރިޝަސްއިން އިންޑިއާއާއެކު ދިގު މުއްދަތުގެ އެއްބަސްވުންތަކެއްގައި ސޮއިކޮށްފިއެވެ.
މި އެއްބަސްވުންތަކުގެ ތެރޭގައި އިންޑިއާ ސަރުކާރާއި މޮރިޝަސް ސަރުކާރާ ދެމެދު ސޮއިކުރެވުނު މެމޮރެންޑަމް އޮފް އަންޑަސްޓޭންޑިންގ އާއި، އިންޑިއާގެ ދައުލަތް ހިއްސާ އޮންނަ އިންޑިއަން އޮއިލް ކޯޕަރޭޝަން އާއި މޮރިޝަސްގެ ސްޓޭޓް ޓްރޭޑިންގ ކޯޕަރޭޝަންއާ ދެމެދު ސޮއިކުރެވުނު 5 އަހަރު ދުވަހުގެ އެއްބަސްވުން ހިމެނެއެވެ.
މި އެއްބަސްވުމުގެ ދަށުން އިންޑިއަން އޮއިލްއިން މޮރިޝަސްއަށް ޕެޓްރޯލް، ޑީސަލް، މެރިން ގޭސް އޮއިލް އަދި މަތިންދާބޯޓަށް އަޅާ ޖެޓް ފިއުލް ފޯރުކޮށްދޭނެއެވެ.
އިންޑިއާގެ ޕެޓްރޯލިއަމް އެންޑް ނޭޗަރަލް ގޭސް މިނިސްޓަރު ހަރްދީޕް ސިންހް ޕޫރީ މޮރިޝަސްއަށް ކުރެއްވި ދަތުރުފުޅުގައި ސޮއިކުރެވުނު މި އެއްބަސްވުމުގެ ސަބަބުން، މޮރިޝަސްއަށް ބޭނުންވާ ތެޔޮ ކަށަވަރުވެ، އަގުތައް އެއްވަރެއްގައި ހިފެހެއްޓުމަށް މަގުފަހިވެގެންދާނެއެވެ. ސަރަހައްދީ ހަމަނުޖެހުންތަކާއި ކަނޑުދަތުރުފަތުރަށް ކުރިމަތިވެފައިވާ ގޮންޖެހުންތަކުގެ ސަބަބުން ދުނިޔޭގެ ތެލުގެ ބާޒާރުގައި އަގުތައް އުފުލެމުންދާ ދަނޑިވަޅެއްގައި، މުޅިން އިމްޕޯޓަށް ބަރޯސާވާ މޮރިޝަސްއަށް މިއީ ހަކަތައިގެ ރައްކާތެރިކަން ކަށަވަރުކުރުމަށް ލިބުނު މުހިންމު ކުރިއެރުމެކެވެ.
ހަރްދީޕް ސިންހް ޕޫރީ ފާހަގަކުރެއްވި ގޮތުގައި، ދެކުނު އޭޝިއާގެ ގައުމުތައް ފިޔަވައި އެހެން ގައުމަކުން އިންޑިއާގެ ދައުލަތުގެ ތެޔޮ ކުންފުންޏަކާއެކު މިފަދަ ފުޅާ ދާއިރާއެއްގައި ތެޔޮ ގަތުމުގެ އެއްބަސްވުމެއްގައި ސޮއިކުރި މިއީ ފުރަތަމަ ފަހަރެވެ.
Advertisement
This content is created and paid for by advertisers and does not involve Voice Journalists
