މެދުއިރުމަތީގެ ހަނގުރާމަޔާއި، ރަޝިޔާ-ޔޫކްރޭން އަދި އެނޫންވެސް ހަނގުރާމަތަކާއި ސަރަހައްދީ ނުތަނަވަސްކަމުގެ ސަބަބުން ދުނިޔޭގެ އިގްތިސާދަށް ބޮޑެތި ގޮންޖެހުންތަކެއް ކުރިމަތިވި ނަމަވެސް އިންޑިއާގެ ކުންފުނިތަކުގެ ފައިދާ މަތީ މިންވަރަކަށް އުފުލިއްޖެއެވެ.

މާކެޓް ހަބަރުތައް ގެނެސްދޭ ނިކޭއީން ބުނެފައިވަނީ އިންޑިއާގެ ކުންފުނިތަކުގެ ފައިދާ ފާއިތުވި ތިން އަހަރު ދުވަހުގެ ތެރޭގައި ނުއުފުލޭ މިންވަރަކަށް އުފުލި ބޮޑު ކުރިއެރުމެއް ހޯދާފައިވާކަމަށެވެ. ތަކެތީގެ އަގުބޮޑުވުމާއި ހަނގުރާމައިގެ ސަބަބުން ތެލާއި ރޯ މެޓީރިއަލްސްގެ އަގަށް އައި ބަދަލުތަކާއެކުވެސް، އިންޑިއާގެ އަމިއްލަ ކުންފުނިތަކުން ޚަރަދުތައް ކޮންޓްރޯލްކޮށް، އުފެއްދުންތެރިކަން އިތުރުކޮށްގެން ފައިދާ އިތުރުކޮށްފައިވާކަމަށް ނިކޭއިން ވަނީ ފާހަގަކޮށްފައެވެ.

އިންޑިއާގެ އެތެރޭގެ މާކެޓުގައި ޑިމާންޑް ވަކިވަރަކަށް މަޑުޖެހުނު ނަމަވެސް، ބައިނަލްއަގުވާމީ މާކެޓުތަކުން އިންޑިއާގެ އުފެއްދުންތަކަށް ލިބުނު އޯޑަރުތައް އިތުރުވުމާއި، ކުންފުނިތަކަށް ލިބުނު ޓެކްސް ލުއިތަކުގެ ސަބަބުން މާލީގޮތުން ބޮޑެތި ކުރިއެރުންތަކެއް ވަނީ ލިބިފައެވެ. މި ކުރިއެރުމާއެކު ކުރިއަށް އޮތް ތަނުގައި ވިޔަފާރިތައް ފުޅާކޮށް އާ ވަޒީފާތައް އުފެއްދުމުގެ އުންމީދު ބޮޑުވެފައިވާއިރު، މިއީ ދުނިޔޭގެ އިގްތިސާދީ ނުތަނަވަސްކަމުގެ ތެރޭގައިވެސް އިންޑިއާގެ އިގްތިސާދުގެ ވަރުގަދަކަން ހާމަކޮށްދޭ ކަމެއްގެ ގޮތުގައި އިގްތިސާދީ މާހިރުން ފާހަގަކުރެއެވެ.