ރިސޯޓުތަކަށް ލިބޭ ބޭރު ފައިސާގެ އާމްދަނީން 40 އިންސައްތަ ދިވެހި ބޭންކުތައް މެދުވެރިކޮށް މާރުކުރުން ލާޒިމުކުރާ ގޮތަށް ބޭރު ފައިސާގެ ޤާނޫނަށް އިސްލާހު ހުށަހެޅުމަށް ނިންމައިފައިވާ ކަމަށް އެމްއެމްއޭގެ ގަވަރުނަރު އަހުމަދު މުނައްވަރު މިއަދު ވިދާޅުވެއްޖެއެވެ.

ރައީސް އޮފީހުގައި ތިން ވަޒީރަކާ އެކު ބޭއްވި ނޫސްވެރިންގެ ބައްދަލުވުމެއްގައި ގަވަރުނަރު ހާމަކުރެއްވި ގޮތުގައި މިހާރު ޤާނޫނުގައި 20 އިންސައްތައިގެ ގޮތުގައި ކަނޑައެޅިފައި އޮތް އެ ނިސްބަތް 40 އިންސައްތައަށް މަތިކުރުމަށް ރައްޔިތުންގެ މަޖިލީހަށް ހުށަހެޅުމަށް ވަނީ ތައްޔާރުވެފައެވެ.

ހަމައެއާ އެކު ކޮންމެ ތިން މަހަކުން ޑޮލަރު މާރުކުރުމަށް މިހާރު އޮންނަ މުއްދަތު ކޮންމެ މަހަކު މާރުކުރާ ގޮތަށް ބަދަލުކުރުންވެސް ހުށަހަޅާ އިސްލާހުތަކުގެ ތެރޭގައި ހިމެނެއެވެ.

މީގެ އިތުރުން އެމްއެމްއޭއަށް ޑޮލަރު މާރުކުރުމަށްފަހު، ބާކީ ހުންނަ ޑޮލަރު ހޭދަކުރާގޮތް މޮނިޓާކުރުން ރަނގަޅު ކުރުމަށް ނިންމަވާފައިވާ ކަމަށާ، އެކަން އެހެން ކުރަނީ ޑޮލަރުން އާމްދަނީ ލިބޭ ފަރާތްތަކުން ކަޅު ބާޒާރުގައި ޑޮލަރު ވިއްކާތީ ކަށް މުނައްވަރު ވިދާޅުވިއެވެ.  

ތަފާސްހިސާބުތަކަށް ބަލާއިރު ފަތުރުވެރިކަމުގެ އާމްދަނީ އާއި ބޭންކުތަކުގެ ޑިޕޮސިޓް އިތުރުވި ނަމަވެސް ތެލަށް ކުރާ ހޭދަ ދެ ގުނައަށް ބޮޑުވުމާ ގުޅިގެން ދައުލަތުގެ ރިޒާވް ވަނީ ދަށަށް ގޮސްފައެވެ.