ބޭރުފައިސާ ލިބުން ދަތިވެފައިވާ މައްސަލަ ހައްލުކުރުމަށް ކުރަމުންގެންދާ މަސައްކަތްތަކުގެ ތެރެއިން ބޭރުފައިސާ ގަނެވިއްކުމުގެ އުސޫލްތައް އިތުރަށް ހަރުދަނާކުރުމަށް ނިންމަވާފައިވާކަމަށް މަރުކަޒީ ބޭންކްގެ ގަވަރުނަރު އަހުމަދު މުނައްވަރު މިއަދު ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި މަނީ ޗޭންޖަރުންގެ ދައުރާ ގުޅޭގޮތުން ވާހަކަދައްކަވަމުން ގަވަރުނަރު ވަނީ ބޭރުފައިސާ ގަނެވިއްކުމުގެ ދާއިރާއަށް ގެނައުމަށް ތައްޔާރުވަމުންދާ ބަދަލުތަކާ ގުޅޭގޮތުން ވާހަކަދައްކަވާފައެވެ. އެގޮތުން ދިވެހިރާއްޖޭގައި ބޭރު ފައިސާ މާރުކުރާ ނުވަތަ މަނީ ޗޭންޖަރުންގެ މަސައްކަތްތައް އިތުރަށް ހަރުދަނާކޮށް، އެ ޚިދުމަތް ދިނުމުގެ ގަވާއިދުތަކަށް ބޮޑެތި އިސްލާޙުތަކެއް ގެނައުމަށް ނިންމަވާފައިވާކަމަށް ގަވަރުނަރު ވިދާޅުވިއެވެ.

މީގެ އަހަރުތަކެއް ކުރިން ބޭރިފައިސާ ގަނެވިއްކާ ފަރާތްތަކުގެ ލިސްޓް 400 ގައި އުޅުނު ނަމަވެސް، ބޭރުފައިސާ ގަނެވިއްކުމުގެ އުސޫލަށް ގެންނަންފެށި އިސްލާހުތަކާއެކު މިހާރު އެ އަދަދު ވަނީ ވަރަށްބޮޑަށް މަދުވެފައެވެ. ގަވަރުނަރު މުނައްވަރު ވިދާޅުވީ، ރާއްޖޭގައި ހިންގަމުންދިޔަ މަނީ ޗޭންޖަރުންގެ އަދަދު މިހާރު 58 އަށް މަދުކުރެވިފައިވާކަމަށެވެ.

ގަވަރުނަރު ވިދާޅުވީ، އަލަށް ގެންނަ އިސްލާޙުތަކުގެ ތެރޭގައި، މި ވިޔަފާރި ކުރާ ފަރާތްތަކުގެ ކެޕިޓަލް (ރައުސްމާލު) އިތުރުކުރުމާއި، އެ ފަރާތްތަކުގެ ޑިޕޮސިޓްތައް ރައްކާތެރިކޮށް (ސެކިއުއަރ) ދެމެހެއްޓޭނެ އިންތިޒާމު ހަމަޖެއްސުން ހިމެނޭ ކަމަށެވެ. މީގެއިތުރުން، އެ ފަރާތްތަކުގެ މާލީ ހަރަކާތްތައް އިތުރަށް މޮނިޓަރކޮށް، ބެލެހެއްޓޭނެ ހަރުދަނާ ނިޒާމެއް ގާއިމުކުރުމަށް ވެސް ވަނީ ނިންމާފައެވެ.

ބައިނަލްއަޤްވާމީ ދުނިޔޭގެ މާލީ ބާޒާރަށް އަންނަމުންދާ އާ ހާލަތްތަކާ ގުޅިގެން، ރާއްޖޭގެ މާލީ ނިޒާމުގެ ރައްކާތެރިކަން ކަށަވަރުކުރުމަށްޓަކައި، ކަމާބެހޭ އިދާރާތަކުން ކުރިއަށްގެންދާ ތަޙުޤީޤުތަކާއި ފިޔަވަޅުތައް ސަރުކާރުން ވަރަށް ސާފުކޮށް އަދި ހަރުދަނާކަމާއެކު ކުރިއަށްގެންދާނެ ކަމުގެ ޔަގީންކަންދޭކަމަށްވެސް ގަވަރުނަރު ވަނީ ވިދާޅުވެފައެވެ.