ޔުނައިޓެޑް އަރަބް އެމިރޭޓްސް (ޔޫއޭއީ) އާއެކު އޮތް ޚާރިޖީ ގުޅުން ކަނޑާލަން ނިންމާފައިވާ ކަމަށް އަލްޖީރިއާއިން ބުނެފިއެވެ.
އަލްޖީރިއާގެ ފޮރިން މިނިސްޓްރީން ބުނީ ތަކުރާރުކޮށް އިންޒާރު ދިނުމަށްފަހު ވެސް ޔޫއޭއީގެ އަމަލުތައް ބަލައިނުގަނެވޭ މިންވަރަށް ގޮސްފައިވާ ކަމަށާއި، ދެޤައުމުގެ ގުޅުން ދެމެހެއްޓުމަށް ކުރި ހުރިހާ މަސައްކަތެއް މިހާރު ނާކާމިޔާބުވެފައިވާ ކަމަށެވެ.
މި ނިންމުމާ ގުޅިގެން ޔޫއޭއީގެ ސަފީރު ޚާރިޖިއްޔާއަށް ހާޒިރުކޮށް، 48 ގަޑިއިރުގެ ތެރޭގައި ޤައުމުން ފޭބުމަށް ވަނީ އަންގާފައެވެ.
މީގެ އިތުރުން، އަލްޖީރިއާގެ ޑިފެންސް މިނިސްޓްރީއާ ހަވާލާދީ އެޤައުމުގެ އެންނަހާރު ޓީވީން ރިޕޯޓްކޮށްފައިވާ ގޮތުގައި، ހުކުރު ދުވަހުން ފެށިގެން ޔޫއޭއީގެ ހުރިހާ މަދަނީ އަދި އަސްކަރީ މަތިންދާބޯޓުތަކަށް އަލްޖީރިއާގެ ވައިގެ ސަރަހައްދު ވަނީ ބަންދުކޮށްފައެވެ. ނަމަވެސް، މިހާރު ހަދާފައިވާ އެއްބަސްވުން ހަމަވާ ދުވަހުގެ ނިޔަލަށް، ޔޫއޭއީގެ ވިޔަފާރި ފްލައިޓުތައް އަލްޖިއާސްއަށް ދަތުރުކުރުމަށް ވަނީ އިސްތިސްނާ ދީފައެވެ.
މި ނިންމުމާ ގުޅިގެން ޔޫއޭއީގެ ޚާރިޖިއްޔާއިން ނެރުނު ބަޔާނެއްގައި ބުނެފައިވަނީ އަލްޖީރިއާގެ މި ނިންމުމަކީ "ވަގުތީ" ނިންމުމަކަށް ވާނެ ކަމަށް އުއްމީދުކުރާ ކަމަށެވެ. އަދި ޔޫއޭއީގައި ދިރިއުޅޭ އަލްޖީރިއާގެ ރައްޔިތުންނާއި ދެޤައުމުގެ ދެމެދުގައިވާ އަޚުވަންތަ ގުޅުން އަގުވަޒަންކުރާ ކަމަށްވެސް ބުނެފައިވެއެވެ.
ޔޫއޭއީގެ ރައީސްގެ ޑިޕްލޮމެޓިކް އެޑްވައިޒަރު އަންވަރު ގަރްގާޝް ސޯޝަލް މީޑިއާގައި ވިދާޅުވީ، ޚާރިޖީ ގުޅުންތައް ބިނާވާންވާނީ "ހައްލުކުރަން އުނދަގޫ އިޝާރާތްތަކެއްގެ" މައްޗަށް ނޫން ކަމަށާއި، ބުއްދި އިސްކުރުމާއި މުވާސަލާތު ކުރުމުގެ މައްޗަށް ކަމަށެވެ.
ފާއިތުވި އަހަރުތަކުގައި ދެޤައުމުގެ ގުޅުން ވަރަށް ބޮޑަށް ވަނީ ގޯސްވެފައެވެ. މައިގަނޑު ސަބަބުތަކުގެ ތެރޭގައި، އިސްރާއީލާ ގުޅުން ޤާއިމުކުރުމާ އަލްޖީރިއާއިން ދެކޮޅުހަދަމުންދަނިކޮށް، 2020 ވަނަ އަހަރު ޔޫއޭއީ އާއި އަލްޖީރިއާގެ ވާދަވެރި މޮރޮކޯއިން އިސްރާއީލާއެކު ގުޅުން ޤާއިމުކުރުން ހިމެނެއެވެ. އަދި ހުޅަނގު ސަހަރާގެ މައްސަލައިގައި ޔޫއޭއީން މޮރޮކޯއަށް ތާއީދުކުރާއިރު، އަލްޖީރިއާއިން ތާއީދުކުރަނީ މިނިވަންކަމަށް މަސައްކަތްކުރާ ޕޮލިސާރިއޯ ފްރަންޓަށެވެ.
އަލްޖީރިއާގެ ރައީސް އަބްދުލްމަޖީދު ތެބޫން ވަނީ ޔޫއޭއީއަކީ ސަރަހައްދުގެ ހަމަޖެހުން ނަގާލަން އުޅޭ ޤައުމެއްގެ ގޮތުގައި ތަކުރާރުކޮށް ސިފަކުރައްވާފައެވެ. އަދި އެޤައުމުން ފައިއަޅާ ކޮންމެ ތަނެއްގައި ލޭއޮހޮރުވުން ހިނގާ ކަމަށާއި، އަރަބި ދުނިޔޭގެ ބައިބައިވުން ބޮޑުވެދާނެތީ މީގެ ކުރިން ގުޅުން ކަނޑާނުލައި މަޑުކުރީ ކަމަށްވެސް ރައީސް ތެބޫން މީގެ ކުރިން ވިދާޅުވެފައިވެއެވެ.
Advertisement
This content is created and paid for by advertisers and does not involve Voice Journalists
