ދިވެހިރާއްޖޭގައި އިސްލާމްދީނުގެ މަތިވެރި އަސާސްތައް ދާއިމަށް ދެމެހެއްޓުމަށްޓަކައި، އިސްލާމީ ޝަރީޢަތުގެ ޙުކުމްތައް ޤާއިމުކޮށް ޝަރީޢަތާ އެއްގޮތަށް ޤަޟާއީ ނިޒާމު ބައްޓަންކުރުމަކީ ކޮންމެހެން މުހިންމު ކަމެއް ކަމަށް މިއަދުގެ ހުކުރު ޚުތުބާގައި ބުނެފިއެވެ.

"އިސްލާމްދީނުގައި ސާބިތުވުން" މި މައުޟޫޢަށް ރާއްޖޭގެ އެކި ކަންކޮޅުތަކުގައި މިއަދު އިއްވި ހުކުރު ޚުތުބާގައި ބުނީ، ދިވެހިން އިސްލާމްދީނުގެ ހިދާޔަތުގައި ފައިތިލަ ސާބިތުކޮށްގެން ތިބޭތާ 900 އަހަރު ވެފައިވާ ކަމަށާއި، ޤައުމުގެ އެއްބައިވަންތަކަމާއި މިނިވަންކަން ދެމިއޮތުމުގެ އަސްލަކީ ވެސް އިސްލާމްދީން ކަމަށެވެ. އަދި ކުރިއަށް އޮތްތަނުގައި ވެސް ދިވެހިންނަށް އެއްބައިވަންތަ ބައެއްގެ ގޮތުގައި ދެމިތިބެވޭނީ އިސްލާމްދީނުގެ އަސާސްތަކުގައި ހިފަހައްޓައިގެން ކަމަށް ޚުތުބާގައި ބުންޏެވެ.

ޚުތުބާގައި ބުނީ، އިސްލާމްދީނުގެ އަސާސްތައް ރާއްޖޭގައި ދެމެހެއްޓުމަށްޓަކައި ޤާނޫނީ، ސިޔާސީ އަދި ތަޢުލީމީ ދާއިރާއިން ގިނަ މަސައްކަތްތަކެއް ކުރަންޖެހޭ ކަމަށެވެ.

ހަމައެއާއެކު، އިސްލާމީ ޢަޤީދާ ޙިމާޔަތްވާނޭހެން ތަޢުލީމީ މަންހަޖުތައް ބައްޓަންކުރުމާއި، ޤުރްއާނާ ބެހޭ މަރުކަޒުތަކާއި އިސްލާމީ ޔުނިވަރސިޓީތައް ފުޅާކުރުމާއި، ޙާފިޒުންނާއި އިމާމުން ބިނާކުރުމުގެ މުހިންމުކަން ވެސް ޚުތުބާގައި ހަނދާންކޮށްދިނެވެ.

މުޖުތަމަޢުގެ ފަރުދީ ޒިންމާތަކަށް އަލިއަޅުވާލަމުން، ހެޔޮކަންކަމަށް އަމުރުކުރުމާއި ނުބައިކަންކަން ނަހީކުރުމުގެ މަތިވެރި ރުކުން ދެމެހެއްޓުމަށް ޚުތުބާގައި ގޮވާލިއެވެ. އަދި ދީނަށް ގޮވައިލުމުގައި ލުއިފަސޭހަ ގޮތްތައް އިޚްތިޔާރުކޮށް، ހަރުކަށި ފިކުރުތަކާއި، ޙުއްޖަތެއް ނެތި މީސްތަކުން ކާފަރުކުރުމާއި، ޓެރަރިޒަމް ފަދަ ނުރައްކާތަކުން މުޖުތަމަޢު ސަލާމަތްކުރަންޖެހޭ ކަމަށް ބުންޏެވެ.

ޚުތުބާ ނިންމަވާލަމުން ވަނީ، އަންނަން އޮތް ޖީލުތަކަށް އިސްލާމްދީން ވާރުތަކޮށްދިނުމަށްޓަކައި، ކޮންމެ ޢާއިލާއަކުން ވެސް ދަރިންނަށް އިސްލާމީ ޞައްޙަ ޢަޤީދާއާއި، ރިވެތި އަޚުލާޤު އުނގަންނައިދީ، ނަމާދަށް އަހުލުވެރިކުރުވައި، ރަނގަޅު ތަރުބިޔަތެއް ދިނުމަށް ނަޞޭޙަތްތެރިވެފައެވެ. ސަބަބަކީ އިސްލާމްދީން ޙިމާޔަތްކުރުމުގެ ބިންގަލަކީ ރަނގަޅު ފަރުދުންނާއި ޢާއިލާތައް ކަމުގައިވާތީއެވެ.