ސިޔާސީ ޕާޓީތަކުގެ ޒިންމާ އަކީ، އެ އިރެއްގައި އޮންނަ ސަރުކާރެއް ޒިންމާދާރު ކުރުވުމެވެ.

އިންތިހާބުގެ ތެރޭގައި ރައްޔިތުންނަށް ވީ ވައުދުތައް ފުއްދައިދޭތޯ ބަލައި، އެކަން ސަރުކާރުން ނުކުރާނަމަ، ސަރުކާރު ޖަވާބުދާރީ ކުރުވައި، ރައްޔިތުންގެ ހައްގުތައް ކަށަވަރު ކޮށްދިނުމަކީވެސް، ސަރުކާރާ އިދިކޮޅުގައި މަސައްކަތް ކުރާ ޕާޓީތަކުގެ މައިގަނޑު މަސައްކަތެވެ.

އަދި ވަކީން ހާއްސަކޮށް، ރާއްޖެ ފަދަ ސައްތައިން ސައްތަ އިސްލާމީ ގައުމެއްގައި، އިސްލާމީ ރިވެތި އުސޫލުތަކާއި، ދީނުގެ ހަމަތަކާ ހިލާފަށް ސަރުކާރުން ކަމެއް ކުރާނަމަ، އެކަމެއް ހުއްޓުުވުމުގެ މަސައްކަތް ކުރަނީވެސް މި ދެންނެވި ޕާޓީތަކުންނެވެ.

ރޭގައިވެސް ކާނިވާ ސަރަހައްދުން ފެނިގެންދިޔަ ޖަލްސާއިންވެސް އިދިކޮޅު ކޯލިޝަނުން ސަރުކާރަށް ފާޑުކީ މަންޒަރު ފެނިގެންދިޔައެވެ.

ލާދީނީ ފިކުރަށް ސަރުކާރުން ހިތްވަރުދޭ ވާހަކައާއި، ދީނީ ހަރުކަށި ފިކުރުގެ ނަމުގައި އިލްމުވެރިންގެ ދޫތަކުގައި ތަޅު އަޅުވަން އުޅޭ ވާހަކަ، ރޭ ޕްރޮގްރެސިވް ކޮންގްރެސް ކޯލިޝަނުގެ ޖަލްސާގައި ވާހަކަ ދެއްކެވި ކޮންމެ ބޭފުޅަކުވެސް ފާހަގަކުރެއްވިއެވެ.

އެހެންނަމަވެސް ރޭގެ ޖަލްސާގެ ތެރެއިން، ދޭތެރެ ދޭތެރެއިން ފެނުނީ "ނާޗަރަންގީ" ކުޅޭ މަންޒަރެވެ.

ދެ ބޭފުޅެއްގެ ވާހަކައެއްގެ ތެރެއިން ކޮންމެވެސް ލަވައެއް ޖަހާލައި، ނަށާލައެވެ.

މިއީ ލާދީނީ ފިކުރާ ދެކޮޅަށް މަސައްކަތް ކުރާ ބަޔަކު ދެއްކުން އެންމެ ރީތި މަންޒަރުތޯއެވެ؟ އެފަދަ ކަންކަމުން އެހިތްވަރު ދެވެނީ އެބުނާ "ލާދީނީ" ކަންކަމަށް ނޫންބާއެވެ؟ މި ހުންނަނީ މުޅިންވެސް ސުވާލެވެ.