މީހަކު ރަހީނުކުރުމުގެ ތުހުމަތުގައި އިއްޔެ ހައްޔަރު ކުރި މީހާ ޝަރީއަތް ނިމެންދެން ބަންދު ކުރުމަށް ކޯޓުން އަމުރުކޮށްފި އެވެ.
ރަހީނު ކުރުމުގެ ހާދިސާގެ ރިޕޯޓް ފުލުހަށް ލިބުނީ މިދިޔަ ބުދަ ދުވަހު އެވެ. ފުލުހުން އެ މީހާ ސަލާމަތްކުރީ އިއްޔެ އެވެ. އަދި ކުށުގެ ވެށީން މީހަކު ވަނީ ހައްޔަރު ކޮށްފައެވެ.
އެ މީހާގެ ފޮޓޯއާ ވަނަވަރު ވެސް ވަނީ އާންމުކޮށްފަ އެވެ. އެއީ އައްޑޫ ސިޓީ ފޭދޫ، އުމުރުން 48 އަހަރުގެ އިބްރާހިމް ސައީދު އެވެ.
ފުލުހުން ބުނީ އެ މީހާގެ ބަންދާއިމެދު ގޮތް ނިންމަން ކޯޓަށް ހާޒިރު ކުރުމުން ޝަރީއަތް ނިމެންދެން ބަންދު ކުރުމަށް އަމުރުކޮށްފައިވާ ކަމަށެވެ.
ހިފަހައްޓައިގެން ގެންގުޅެ އަނިޔާކޮށްފައިވާ މީހާއަށް އައިޖީއެމްއެޗްގައި ދަނީ ފަރުވާ ދެމުންނެވެ. އެއީ އުމުރުން 44 އަހަރުގެ ދިވެހި ފިރިހެނެކެވެ.
އިއްޔެ ވަނީ އެފަދަ އެހެން ހާދިސާއެއް ވެސް ހިނގާފަ އެވެ. މާލޭގެ ގެއެއްގައި ރަހީނުކޮށްފައި ހުރި ބަންގްލަދޭޝްގެ ފިރިހެނަކު ވަނީ ސަލާމަތް ކޮށްފަ އެވެ. އެ ހާދިސާއާ ގުޅޭގޮތުން ފުލުހުން ބުނީ މާލޭގެ ގެއެއްގައި ހުއްދަ ނޫން ގޮތުގައި މީހަކު ބަންދުކޮށްފައި ހުރި ކަމަށް ބުނާ މައްސަލައެއް އިއްޔެ ހެނދުނު 6:00 ހާއިރު ފުލުހުންނަށް ރިޕޯޓްކޮށްފައިވާ ކަމަށެވެ. އަދި އެ ރިޕޯޓާ ގުޅިގެން އެ ގޭގެ ތަޅު ހަލާކުކޮށްލައިގެން ފުލުހުން އެތަނަށް ވަދެ އެ މީހާ އެތަނުން ނެރެފައިވާ ކަމަށާ އެއީ ބަންގްލަދޭޝް ފިރިހެނެއް ކަމަށެވެ.
Advertisement
This content is created and paid for by advertisers and does not involve Voice Journalists
