ކުރިއަށް އޮތް ލޯކަލް ކައުންސިލް އިންތިހާބުގައި އިދިކޮޅު މައި ޕާޓީ -- އެމްޑީޕީން ޓިކެޓް ދިނުމުގައި 33 ޕަސެންޓް ޒުވާނުންނަށް ހާއްސަ ކުރުމަށް ނިންމައިފި އެވެ.
އެ ޕާޓީން ބޭއްވި ގައުމީ މަޖިލީހުގެ ޖަލްސާގައި ވަނީ ކައުންސިލް އިންތިހާބަށް ޕާޓީން ވަމުންދާ ތައްޔާރީތަކާއި އެ ޕާޓީގެ ނިންމުންތައް ހިމަނާ ރިޕޯޓެއް ހިއްސާކޮށްފަ އެވެ. އެ މަސައްކަތަށް އެކުލަވާލި ކޮމެޓީގެ މުގައްރިރު, ދާންދޫ ދާއިރާގެ ކުރީގެ މެންބަރު ޔައުގޫބު ވިދާޅުވީ އެމްޑީޕީގެ ޓިކެޓްގައި ވާދަކުރާ ކެންޑިޑޭޓުންގެ ތެރެއިން ވަކި ޕަސެންޓް އެއީ ޒުވާނުން ކަމުގައި ހަމަޖެއްސުމަށް ނިންމާފައިވާ ކަމަށެވެ.
އެގޮތުން އެ ޕާޓީގެ ޓިކެޓްގައި ވާދަކުރާ ކެންޑިޑޭޓުންގެ 33 ޕަސެންޓަކީ ޒުވާނުން ކަމަށް ވިދާޅުވި އެވެ. ޒުވާނުން ކަމަށް ބަލާނީ އުމުރުން 18 އަހަރު ފުރި 35 އަހަރުން ދަށުގެ މީހުންނަށެވެ.
އެމްޑީޕީގެ ގައުމީ މަޖިލީހުގެ ޖަލްސާ -- ފޮޓޯ: ވޮއިސް
ޔައުގޫބް އިތުރަށް ވިދާޅުވީ ޓިކެޓަށް ހުޅުވާލާއިރު އެކަމަށް ހާއްސަ ބައެއް ހިމަނާނެ ކަމަށެވެ. އަދި އެއް ދާއިރާއަކަށް އިންތިހާބު ކުރަން ޖެހޭ އަދަދަށް ވުރެ އިތުރަށް ޒުވާނުން ކުރިމަތިލައިފިނަމަ ޕްރައިމަރީއެއް ބާއްވާނެ ކަމަށެވެ.
މިއީ އެމްޑީޕީން ޒުވާނުންނަށް އަބަދުވެސް އޮންނަ ހާއްސަ ފުރުސަތުތަކުގެ ތެރެއިން ކަނޑައެޅި ފުރުސަތެއް ކަމަށް ވިދާޅުވި އެވެ.
މީގެ އިތުރުން އެ ޕާޓީން ވަނީ އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކުގެ އިންތިހާބުގައި ވެސް އެ ޕާޓީން ވާދަކުރާ ކެންޑިޑޭޓުންގެ 33 ޕަސެންޓް ޒުވާން އަންހެނުންނަށް ހާއްސަ ކުރުމަށް ނިންމާފަ އެވެ.
އެމްޑީޕީގެ ގައުމީ މަޖިލީހުގެ ޖަލްސާ -- ފޮޓޯ: ވޮއިސް
އެމްޑީޕީން ނިންމާފައި ވަނީ އެ ޕާޓީގެ ޓިކެޓަށް އެދޭ ކެންޑިޑޭޓުންނަށް ތަމްރީން ޕްރަގްރާމެއްވެސް ބާއްވާށެވެ. އެ ޕްރަގްރާމްގައި ހުރިހާ ކެންޑިޑޭޓުން ވެސް ބައިވެރިވާން ޖެހެ އެވެ.
އަންނަ އަހަރު ކުރީކޮޅު އޮންނަ އިންތިހާބަށް ޕާޓީތަކުން މިހާރު ދަނީ ތަައްޔާރުވަމުންނެވެ. ކައުންސިލްް އިންތިހާބަކީ ރާއްޖޭގައި ބޭއްވޭ އެންމެ ބޮޑު އިންތިހާބެވެ.
Advertisement
This content is created and paid for by advertisers and does not involve Voice Journalists
