19ވަނަ ރައްޔިތުންގެ މަޖިލީހުގައި ނަން އިއްވާ ތަޅުމުން ބޭރުކުރެވުނު އެމްޑީޕީގެ ފުރަތަމަ މެންބަރަކަށް އައްޑޫ މީދޫ ދާއިރާގެ މެންބަރު ރޮޒަައިނާ އާދަމް ވެވަޑައިގެންފިއެވެ.

ރޮޒައިނާގެ ނަން އިއްވާ މަޖިލީހުގެ ތަޅުމުން ބޭރުކޮށްފައިވަނީ މިއަދުގެ ޖަލްސާގައި ކުރިއަށްދިޔަ އަންނަ އަހަރަށް ލަފާކުރާ ދައުލަތުގެ ބަޖެޓްގެ ބަހުސްގެ ތެރެއިންނެވެ.

ފާހަގަކޮށްލެވޭ ގޮތުގައި ރޮޒައިނާ ވަނީ ދާންދޫ ދާއިރާގެ މެންބަރު ޔައުގޫބް އަބްދުﷲއާއި ނައިފަރު ދާއިރާގެ މެންބަރު މުހައްމަދު ޝިޔާމް ވާހަކަފުޅު ދައްކަވަމުން ގެންދެވި އިރު ވަނީ އެކަމަނާ ނެންގެވި ނިޒާމީ ނުކުތާއަކަށް ރިޔާސަތުން ޖާގަނުދެއްވުމުގެ ސަބަބުން އަޑުގަދަކުރައްވާފައެވެ.

މިކަމާއި ގުޅިގެން ރިޔާސަތުގައި އިންނެވި މަޖިލީހުގެ ރައީސް މުހައްމަދު ނަޝީދު ވިދާޅުވީ، މަޖިލިސް ގަވައިދުގައިވާ ގޮތުން ނިޒާމީ ނުކުތުތާއެއް ނަގަން ޖެހެނީ ނިޒާމް ގެއްލޭ ކަމެއް ފާހަގަ ވުމުން ކަމަށާއި އަދި ނިޒާމީ ނުކުތާ ދިނުމާމެދު ގޮތެއް ނިންމުމުގެ ބާރު އޮންނަނީ ރިޔާސަތުގެ އިޚްތިޔާރުގައި ކަމަށެވެ.

ރައީސް ނަޝީދު އިތުރަށް ވިދާޅުވީ ދައުލަތުގެ ބަޖެޓަށް ބަހުސް ކުރަމުންދާ އިރު، އެ ބަޖެޓަށް އިދިކޮޅު މެމްބަރުންނަށް ވެސް ވާހަކަ ދެއްކުމުގެ ފުރުސަތުވެސް ދޭންޖެހޭނެ ކަމަށެވެ.