ކުރީގެ ރައީސް އަބްދުﷲ ޔާމީންގެ މައްޗަށް މަނީ ލޯންޑްރިންގގެ ދައުވާ ސާބިތުވާކަމަށް ހުކުމްކުރި ފަނޑިޔާރުންނާއި ކުއްތާއާއި އެއްވަރުކޮށްފިއެވެ.
އެފަރާތްތަކަށް ކުއްތާއާއި އެއްވަރުކޮށް، ހަޑިހުތުރުބަހުން މުޚާތަބުކޮށްފައިވަނީ ރައްޔިތުންގެ މަޖިލީހުގެ ފޮނަދޫ ދާއިރާގެ ކުރީގެ މެންބަރު އަދި ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ)އެވެ.
ކޯޓު ސަރަހައްދަށް އެއްވެ ތިބި އިދިކޮޅު ޕްރޮގްރެސިވް ކޯލިޝަންގެ ސަޕޯޓަރުންނާއި މުޚާތަބުކުރައްވަމުން އަދުރޭ ވިދާޅުވީ ރައީސް ޔާމީނަށްޓަކައި ވާންޖެހުނު ކޮންމެ ގުރުބާނީއެއްވެސް ވާނެކަމަށެވެ. އަދި ރައީސް ޔާމީން މިނިވަންވެވަޑައިގަންނަވަންދެން އެ ފަރާތްތަކުން ކުރާާ މަސައްކަތް ހުއްޓާ ނުލައްވާާނެކަމަށް އަދުރޭ ވިދާޅުވިއެވެ.
މީގެ އިތުރުން އެބޭފުޅާ ވަނީ ރައީސް ޔާމީންގެ މައްސަލަ ބެއްލެވި ފަސް ފަނޑިޔާރުންނާއި މެދު ހަޑިހުތުރުބަހުން މުޚާތަބުކުރައްވައި، އެއީ ކުއްތާތަކެއްކަމަށް ވިދާޅުވެފައެވެ.
"ފަނޑިޔާރުންގެ ބެންޗުގައި ތިބި ފަސް ބަ**ނަށް ދަންނަވާލަން ބޭނުންވަނީ އަޅުގަނޑުމެންގެ ވެރިކަމެއްގައި ޖަލަށް ލާނަމޭ"، އެބޭފުޅާ ވިދާޅުވިއެވެ.
އަދުރޭ މި މޭރުމުން ފަނޑިޔާރުންނަށް މުޚާތަބުކުރައްވައި ދެއްކެވި ވާހަކަފުޅުތަކަކީ ކޯޓުގެ ހުރުމަތް ކެނޑުމުގެ މައްސަލައެއްގެ ގޮތުގައި ބަލައިދިނުމަށް ޑީޖޭއޭއިން ވަނީ ފުލުހުންނަށް ހުށައަޅާފައެވެ.
Advertisement
This content is created and paid for by advertisers and does not involve Voice Journalists
