މިހާރު ކުރިއަށްގެންދާ ގައުމީ ވޮލީބޯޅަ މުބާރާތުގެ ފިރިހެން ޑިވިޝަނުގައި ރޭ ކުޅުނު ސެމީ ފައިނަލް ދެވަނަ މެޗުގައި ސީދާ ތިން ސެޓުން ދަޑިމަގު ސްޕޯޓްސް އެންޑް ރެކްރިއޭޝަން ކުލަބު ބަލިކޮށް، ދިވެހި ސިފައިންގެ ކުލަބް (ޑީއެސްސީ) އިން މުބާރާތުގެ ފައިނަލުން ޖާގައެއް ކަށަވަރުކޮށްފިއެެވެ.
މުބާރާތުގެ ސެމީފައިނަލުން އެންމެ ފަހުގެ ޗެންޕިއަން ޑީއެސްސީ އިން ޖާގަހޯދީ މިއަހަރުގެ ގައުމީ ލީގުގެ އެއްވަނަ ޓީމުގެ ގޮތުގައެވެ. އަދި ދަޑިމަގު ސްޕޯޓްސް އެންޑް ރެކްރިއޭޝަން ކުލަބު ސެމީފައިނަލުން ޖާގަހޯދީ ގައުމީ ލީގުގެ ދެވަނަ ޓީމުގެ ގޮތުގައެވެ.
ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު މި މެޗުގައި ސިފައިންގެ ކުލަބުގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، މެޗުގެ ފުރަތަމަ ސެޓް އެޓީމުން ކާމިޔާބުކުރީ ހަ ޕޮއިންޓްގެ ލީޑަކާއެކު 19-25 ގެ ނަތީޖާއަކުންނެވެ.
މީގެ އިތުރުން މެޗުގެ ދެވަނަ ސެޓް 10 ޕޮއިންޓްގެ ލީޑަކާއެކު 15-25 ގެ ނަތީޖާއަކުން ކާމިޔާބުކުރިއިރު، ތިންވަނަ ސެޓް އެޓީމުން ކާމިޔާބުކުރީ ނުވަ ޕޮއިންޓްގެ ލީޑަކާއެކު 16-25 ގެ ނަތީޖާއަކުންނެވެ. އަދި މި މެޗުގެ މޮޅު ކުޅުންތެރިއަކަށް ހޮވުނީ ޑީއެސްސީގެ ބިދޭސީ ކުޅުންތެރިޔާ ޗިރާގް އެވެ.
މިނަތީޖާއެކު މުބާރާތުގެ ފައިނަލުގެ ފުރަތަމަ ޖާގަ ޑީއެސްސީ އިން ކަށަވަރުކުރިއިރު، މިމެޗުން ބަލިވި ދަޑިމަގު ސެމީ ފައިނަލުގެ ތިންވަނަ މެޗުގައި ނުކުންނާނީ އެޗްޑީސީ އާއި ދެކޮޅަށެވެ. އެޗްޑީސީ ސެމީގެ ތިންވަނަ މެޗުން ޖާގަހޯދީ ޤައުމީ ވޮލީ ލީގުގެ ތިންވަނަ ޓީމާއި ހަތަރުވަނަ ޓީމުގެ މެދުގައި ކުޅުނު ސެމީގެ ފުރަތަމަ މެޗުގައި ހުރާ ކޮމިއުނިޓީ ކުލަބު ބަލިކުރުމަށްފަހު އެވެ.
Advertisement
This content is created and paid for by advertisers and does not involve Voice Journalists
