ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ކެބިނެޓްގައި ހިމެނޭ ޒުވާން ވަޒީރުންގެ އަދަދު އެހެން ކެބިނެޓްތަކާއި އަޅާބަލާއިރު ތަންކޮޅެއް ގިނައެވެ. އެެހެންކަމުން ނިކަން ޗާލުކޮށް ހެދުން އަަޅުއްވާ ފަރާތްތައްވެސް ތިއްބަވައެވެ. އޭގެ ތެރެއިންވެސް ފާހަގަކޮށްލެވޭ އެއް ފަރާތަކީ މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމެންޓް އަހުމަދު މަޚުލޫފެވެ.

މަޚުލޫފަކީ ކެބިނެޓަށް ވަޑައިގަތުމުގެ ކުރިން ރައްޔިތުންގެ މަޖިލީހުގައި އުޅުއްވިއިރުވެސް، ވަރަށް ރީތިކޮށް ހެދުން އަޅުއްވާ ބޭފުޅެކެވެ. ރަސްމީ ހެދުމުން ބޭރުގައި އަބަދުވެސް ވަރަށް ޒަމާާނީކޮށް ހެދުން އަޅުއްވައެވެ. ކެބިނެޓަށް ވަޑައިގަތުމަށްފަހު، ރަށްރަށާއި ގައުމުން ބޭރަށް ކުރެއްވި ދަތުރުތަކުންވެސް މިކަން ވަރަށް ރަނގަޅަށް ފެނިގެންދިޔައެވެ.

އެގޮތުން ރޭ އުރީދޫ މޯލްޑިވްސްއިން ބޭއްވި ޚާއްސަ އިވެންޓަަކަށްވެސް މަޚުލޫފް ވަޑައިގެންނެވީ ވަރަށް ޗާލު ގަމީހެއް ތުުރުކުރައްވައިގެންނެވެ. މި ގަމީސް ރީތިކަމުގެ ވާހަކަ މުޅި ސޯޝަލް މީޑިޔާގައި އެބަދެކެވެއެވެ. ހުދު އަޅުގަނޑަށްވެސް އެ ގަމީހެއް ވަރަށް ރީއްޗެވެ. ކަމުދާ ކަހަަލަ ގޮތެއް އެބަހުއްޓެވެ.

ނަމަވެސް ކަމަކުދާކަށް ނެތެވެ. ނިކަމެތި އަޅުގަނޑަށް މިއިން ދުވަހަކު އެ ގަމީސް ލެވޭނެހެނެއް ހީނުވެއެވެ. ސައިޒުގެ ގޮތަކުންނެއް ނޫނެވެ. މަތީ އަގުގެ ސަބަބުންނެވެ. އިންޓަރނެޓްގެ ޒަރިއްޔާާއިން "ފަރފެޗް.ކޮމް" ކިޔާ ވެބްސައިޓަކުން އެ ގަމީހުގެ އަގު ބެލިއިރު، ޑޮލްޗޭ އެންޑް ގަބާނާ ބްރޭންޑްގެ އެ ގަމީހުގެ އަގު މިވަގުތު ހުރީ 892 ޑޮލަރުގައެވެ. އެއީ ގާތްގަނޑަކަށް 13,754.64 ރުފިޔާއެވެ. 

މިނިސްޓަރ މަޚުލޫފަކީ ދެ ދައުރަކު މަޖިލިސް މެންބަރުކަން ކުރައްވާ އަދި އާއިލީ ވިޔަފާރިއެއްވެސް އޮންނަ ބޭފުޅަކަށްވުމުން އެފަދަ އަގުބޮޑު ގަމީހެއް ގަތުމަކީ އުނދަގޫ ކަމަކަށްވެސް ނުވާނެއެވެ. ނަމަވެސް ދަންނަވަންތޯއެވެ. އާދައިގެ ރައްޔިތުމީހާވެސް ތިޔަ ގަމީސް ލުމަށް އެދެއެވެ. އެ ފަރާތްތަކަށް އެފަދަ މާލީ ތަނަވަސްކަމެއް ލިބޭނީ ކޮން އިރަކުންތޯއެވެ؟ ނުވަތަ އަނގަޔާއި އަތާއި ދިމާާނުވެ އުމުރު ހުސްވެދާންވީތޯއެވެ؟