ޖުމްހޫރީ ޕާޓީގެ ލީޑަރ އަދި ރައްޔިތުންގެ މަޖިލީހުގެ ރައީސްކަމުގެ މަގާމަށް އިންތިޚާބުކުރެވިފައިވާ ގާސިމް އިބްރާހިމް ކުރައްވަމުންގެންދަވާ މަސައްކަތަކީ އަގުނުކުރެވޭނެ ހިދުމަތެއްކަމަށް، ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ މިއަދު އެމަނިކުފާނުގެ ގެކޮޅުކަމަށްވާ ގ.ކެނެރީގޭގައި ގާސިމް އިބްރާހީމްއާއި ބައްދަލު ކުރެއްވުމަށްފަހު ކުރެއްވި ޓްވީޓެއްގައެވެ. ރައީސް ނަޝީދު ވިދާޅުވީ އިސްލާހީ މަސައްކަތުގައި ގާސިމް ފެށުނީއްސުރެ ކުރައްވަމުން ގެންދަވާ މަސައްކަތްތަކަކީ އަގު ނުކުރެވޭނެ ފަދަ ހިދުމަތެއް ކަމަށެވެ. އަދި ރައްޔިތުންގެ ހައްގުތައް ކަށަވަރުކުރުމަށް ރައްޔިތުންގެ މަޖިލީހުގެ ދައުރު ނުހަނު ބޮޑު ކަމަށްވެސް އެމަނިކުފާނު ވަނީ ފާހަގަކުރައްވާފައެވެ.
"އިރާދަ ކުރެއްވިއްޔާ މަޖިލީހުގެ ރައީސްއާއި އެކު މި މަސައްކަތުގައި އަޅުގަނޑު ދެމިހުންނާާނަން"، ރައީސް ނަޝީދު ވިދާޅުވިއެވެ.
ކްރިމިނަލް ކޯޓުން ކުރީގެ ރައީސް މުހައްމަދު ނަޝީދަށް އިއްވާފައިވާ ޖަލުހުކުމް ތަންފީޒުކުރުން މަޑުޖައްސާލުމަށް ސުޕްރީމް ކޯޓުން އަމުރުކުރުމުން އެމަނިކުފާނު ވަނީ މާލެ ވަޑައިގަންނަވާފައެވެ. މާާލެ ވަޑައިގެން އެމަނިކުފާނު ދަނީ އިދިކޮޅު ސިޔާސީ ހަރަކާތުގެ ގިނަ ފަރާތްތަކަކާއި ބައްދަލުކުރައްވަމުންނެވެ.
Advertisement
This content is created and paid for by advertisers and does not involve Voice Journalists
