ޖަރުމަނުގެ ފެޑެރަލް ކައުންސިލް (ބުންޑެސްރާޓް) އިން އިސްތިއުމާރީ އިސްރާއީލުގެ ވުޖޫދު ދެކޮޅު ހަދާ މީހުންނަށް ފަސް އަހަރު ދުވަހުގެ ޖަލު ހުކުމް އަންނަ ގޮތަށް ޤާނޫނެއް ފާސްކުރުމުގެ މަސައްކަތް ފަށައިފިއެވެ.

ބުންޑެސްރާޓުން ފާސްކުރި މި ބިލަށް މަތިގޭގެ ތާއީދު ލިބުމާ ގުޅިގެން ދަށު ގޭ (ބުންޑެސްޓާގް) އަށް މި ބިލު ފޮނުވައިފައިވަނީ ޤާނޫނު އަސާސީގައި ބަޔާންކޮށްފައިވާ ފާސްކުރުމުގެ މަރުހަލާތައް ފުރިހަމަކުރުމަށެވެ.

ހުށަހަޅާފައިވާ ބިލުގެ ދަށުން ޢާންމުކޮށް ނުވަތަ ބައްދަލުވުމެއްގައި އިސްތިއުމާރީ އިސްރާއީލުގެ ވުޖޫދާ ދެކޮޅު ހަދާ ނުވަތަ އެ އިސްރާއިލް ނައްތާލުމަށް ފާޅުގައި ގޮވާލާ ކޮންމެ މީހަކަށް ސީރިއަސް ޖިނާއީ ދައުވާ ކުރެވޭނެއެވެ.

މި ކުށުގެ ދަށުން ކުށްވެރިވާ ފަރާތްތަކަށް ގިނަވެގެން ފަސް އަހަރު ދުވަހުގެ ޖަލު ހުކުމެއް އަންނާނެ ކަމަށް ބުނެފައިވެއެވެ.

ޓެކްނިކަލް ގޮތުން ބަލާނަމަ ޖަރުމަނުން މި ބަދަލު ގެންނަނީ އެ ޤައުމުގެ ފެޑެރަލް ޕީނަލް ކޯޑް (އެސްޓީޖީބީ) ގެ ސެކްޝަން 130 ފުޅާކުރުމުގެ ތެރެއިންނެވެ. ތާރީޚީ ގޮތުން ބަލާނަމަ މި ސެކްޝަން މައިގަނޑު ގޮތެއްގައި ބައްލަވަމުން ދިޔައީ "ހޮލޮކޯސްޓް ދެކޮޅު ހެދުމަށެ"ވެ. ނަމަވެސް މި އިސްލާހުން "އިސްރާއީލުގެ ވުޖޫދާ ދެކޮޅު ހެދުން" ވެސް ހިމަނާ ގޮތަށް ސެކްޝަންގެ ދާއިރާ ފުޅާކުރެއެވެ.

ބުންޑެސްރާޓުން ބުނީ ޤައުމުގެ ބަދަލުވަމުންދާ ހަޤީގަތްތަކާ ކުރިމަތިލުމަށް މިހާރު ހުރި ޖިނާއީ ޤާނޫނުތައް ފުދޭ ވަރަށްވުރެ ބާރު ދަށް ކަމަށެވެ. ޤާނޫނު ހަދާ މީހުން ފާހަގަކުރި ގޮތުގައި ޖަރުމަނުގައި ޔަހޫދީންނާ ދެކޮޅު ހާދިސާތައް ބޮޑުތަނުން އިތުރުވެ 2020 ވަނަ އަހަރު ރެކޯޑުކުރެވުނު 1,957 ހާދިސާ 2024 ވަނަ އަހަރު 8,627 ހާދިސާއަށް އަރައިފައިވެއެވެ.

އޭގެ އިތުރުން ޤައުމުގެ ތެރޭގައި ހިނގާ ސުލްހަވެރި ހަނގުރާމައާ ދެކޮޅު މުޒާހަރާތަކުގެ ބައެއް ބަސްމަގު އިސްތިއުމާރީ އިސްރާއީލުގެ ޝަރުޢިއްޔަތާ ސުވާލު އުފައްދާ ދަރަޖައަށް ތަކުރާރުކޮށް ގޮސްފައިވާ ކަމަށް މަތިގޭ ފަރާތުން ފާހަގަކޮށްފައިވެއެވެ.