ދަނޑުވެރިކަން ކުރުމަށް ރ.އިނގުރައިދޫއިން ބިން ދޫކުރަނީ
ދަނޑުވެރިކަންކުރުމަށް ރ.އިނގުރައިދޫއިން ބިން ދޫކުރުމަށް އެރަށު ކައުންސިލުން ނިންމައިފިއެވެ.
އެ ކައުންސިލުން ކުރި އިއުލާނެއްގައި ބުނެފައިވަނީ އެރަށުން ކުއްޔަކާއި ނުލައި 163 ބިން އެއް އަހަރު ދުވަހުގެ މުއްދަތަކަށް ދޫކުރުމަށް ނިންމާފައިވާ ކަމަށެވެ.
އިނގުރައިދޫ ކައުންސިލް އިދާރާގެ ކުރިމަތީ ބަހައްޓާފައިވާ ކޮވިޑް19 ސްކޭނިން ކައުންޓަރުން ދަނޑުބިމަށް އެދޭ ފޯމް ލިބެން ހުންނާނެއެވެ. މި ފޯމް ބަލައިގަތުމަށް ހަމަޖެހިފައިވަނީ ކޮންމެ ދުވަހެއްގެވެސް 11:00 ން 12:00 އަށް އިނގުރައިދޫ ކައުންސިލް އިދާރާއިންނެވެ. މިގޮތުން ދަނޑުބިމަށް އެދޭ ފޯމް ފުރިހަމަ ކުރުމަށްފަހު 16 އޭޕްރީލް 2020 ގެ ކުރިން ކައުންސިލަށް ހުށައަޅަން ޖެހެއެވެ.
ދަނޑުބިން ދޫކުރާ އުސޫލުގައިވާ ގޮތުގައި މީހުން ދިރިއުޅެމުންދާ ގެއަކަށް ދޫކުރެވޭނީ އެންމެ ބިމެކެވެ. އަދި ބިމަށް އެދެވޭނީ އެގޭގެ ވެރިފަރާތުގެ ނަމުގައި ނުވަތަ ގޭގައި ދިރިއުޅޭ ފަރާތެއްގެ ނަމުގައި ކަމަށެވެ. އަދި ބިމަށް އެދޭ ފަރާތްތަކުގެ ޢަދަދު، ދޫކުރެވެން އޮތް އަދަދަށްވުރެ އިތުރުނަމަ ބިން ލިބޭ ފަރާތްތައް ކަނޑައަޅާނީ ގުރުއަތުންނެވެ.
މިދަނޑުތަކުގައި ހައްދަންވާނީ ކުރު މުއްދަތުގައި ނަފާލިބޭ ގޮވާމާއި ތަރުކާރީއާއި ފަލަމަޑީގެ ބާވަތްތަކާއި ފަތްޕިލާވެލީގެ ބާވަތްތައްކަމަށްވެސް ބުނެފައިވެއެވެ.
މީގެ އިތުރުން، ބިމަށް އެދޭ ގޭބިސީގައި ދިރިއުޅޭ އެއްވެސް މީހެއްގެ ނަމުގައި ހުސް ގޯއްޗެއް އޮތްނަމަ އެގޭބިސީއަށް ދަނޑު ބިމެއް ނުލިބޭނެ ކަމަށް ބުނެފައިވެއެވެ.
Advertisement
This content is created and paid for by advertisers and does not involve Voice Journalists