އެސްޓީއޯއިން ގިނަ އަދަދެއްގެ ފިޔާ، އަލުވި އަދި ބިސް އުކާލަމުން އެބަގެންދެއެވެ.

ކޮވިޑް-19 އާއި ގުޅިގެން ގިނަ ރާއްޖެއަށް މި ބާވަތްތައް ލިބުމުގައި ދަތިތަކެއް ކުރިމަތިލާންޖެހި، އަގުތައް އިންތިހާއަށް އަރާފައިވެއެވެ. މިއާއެކު އަވަށްޓެރި އިންޑިއާއިން ވަނީ މޭ 15 ވަނަ ދުވަހު 26 ޓަނުގެ ފިޔާ، 14 ޓަނުގެ އަލުވި ރާއްޖެއަށް އެހީގެ ގޮތުގައި ފޮނުވާފައެވެ.

އެސްޓީއޯއިން ގިނަ އަދަދަކަށް ފިޔާ އަލުވި އަދި ބިސް އުކާލަމުން ދާ ސަބަބު ހޯދުމަށް އެސްޓީއޯގެ މީޑިއާ އޮފިޝަލްއަށް ގުޅާލުމުން ފޯނަށް ޖަވާބު ނުދެއްވާތީ އެ ކުންފުނީގެ ބަހެއްވަނީ ލިބޭގޮތް ނުވެފައެވެ.

ވެމްކޯގެ އޮފިޝަލްއެއް ވޮއިސް އަށް ކިޔައިދިންގޮތުގައި އެސްޓީއިން ކޮންމެ ދުވަހަކު ގޮތަކަށް މިފަހުން ކުނިވެފައި ހުންނަ ފިޔާ، ބިސް އަދި އަލުވި ގެންނަމުން ދާތީ ކުނި ވާޒާތުގެ އެއްޗިސް އުފުލާ އުފުލި ކޮންމެ ރެއަކު ވެސް މިހާރު ކުނި އުފުލަމުން އަންނަކަމަށެވެ.

ވޮއިސް ގެ ނޫސްވެރިން ވެމްކޯ ސަރަހައްދުގައި ހަރަކާތްތެރިވި ވަގުތުވެސް އެސްޓީއޯގެ ބޮޑު ޕިކަޕެއްގެ ކުނިވެފައި ހުރި ތަކެތި ގެނެސްފައިވާތަން ފެނިފައިވެއެވެ. އަދި ވެމްކޯ އުފުލި ފުރިފައިވަނީ އެސްޓީއޯއިން ގެނެސްފައިވާ ކުނިންކަން ފާހަގަކޮށްލެވެއެވެ.

ކޮވިޑް-19 އާއި ގުޅިގެން ރާއްޖެއަށް އިޤްތިސާދީގޮތުން ބޮޑެތި ގޮންޖެހުންތަކެއް ކުރިމަތިވެ، ގިނަ ބަޔަކު ވަޒީފާއިން ވަކިކޮށްފައިވާ މި ދަނޑިވަޅުގައި މި ފަދަގޮތަކަށް ބޮޑު އިސްރާފެއް ވެގެން ދިޔުމުން ގިނަ ބަޔަކު ދަނީ ސަރުކާރަށް ފާޑުކިޔަމުންނެވެ. އެގޮތުން ހިލޭ ރަށްރަށް ނުވަތަ ފިހާރަތަކަށް ބަހާލުން މި ހާލަތުގައި އެއީ ސަރުކާރުގެ ވިޔަފާރި ކުންފުނިން މިތަކެތި ކުނިވަންދެން ބެހެއްޓުމުގެ ބަދަލުގައި ކުރެވިދާނެކަމެއްކަމަށް ގިނަ ބަޔަކު އަންނަނީ މީސް މީޑިއާގައި ހިޔާލު ފާޅުކުރަމުންނެވެ.