ކުރީގެ ނައިބު ރައީސް އަހުމަދު އަދީބުގެ މައްޗަށް ހުށައަޅާފައިވާ މައްސަލަތައް ބާތިލްކަމަށް ކްރިމިނަލް ކޯޓުގެ ގާޒީ އަލްއުސްތާޛު އިސްމާއިލް ރަޝީދު ނިންމެވި މައްސަލަ ޖޭއެސްސީއަށް ހުށައެޅުމަކީ އެ މައްސަލައިގެ އިސްތިއުނާފަށް ނުފޫޒު ފޯރުވުންކަމަށް، ކުރީގެ ޕްރޮސެކިއުޓަރ ޖެނެރަލް އަލްއުސްތާޛު މުހުތާޒް މުހުސިން ވިދާޅުވެއްޖެއެވެ.

އެބޭފުޅާ މިހެން ވިދާޅުވީ މިއަދު ކުރެއްވި ޓްވީޓެއްގައެވެ.

މުހުތާޒް ވިދާޅުވީ ފަނޑިޔާރަކު ކުރެއްވި ހުކުމަކީ ގާނޫނާއި ހިލާފް ހުކުމެއްކަމަށްބުނެ އިސްތިއުނާފް ކޮށްފައި ވަނިކޮށް، މަތީކޯޓުން ހުކުމެއް ކުރުމުގެ ކުރިން މައްސަލަ ބެލި ފަނޑިޔާރު ހުކުމަށް ވާސިލުވީ ގާނޫނާއި ޚިލާފަށްކަމަށް ޖޭ.އެސް.ސީ އިން ކަނޑައަޅުއްވުމަކީ އިސްތިއުނާފީ މައްސަލައަށް ނުފޫޒުފޯރުވުން ކަމަށެވެ.

އަދީބުގެ މައްސަލައިގައި ގާޒީ އިސްމާއިލް ރަޝީދު ކުރެއްވި ހުކުމް ޕީޖީން އިސްތިއުނާފްކޮށްފައިވާއިރު، އެ ހުކުމްގައި ގާނޫނީ މައްސަލަތަކެއް ހުރިކަަމަށްބުނެ އެ މައްސަލަ ވަނީ ޖޭއެސްސީއަށްވެސް ހުށައަޅާފައެވެ.

މީގެ ދުވަސްތަކެއް ކުރިން އޮތް ނޫސްވެރިންގެ ބައްދަލުވުމުގައި ޕްރޮސެކިއުޓަރ ޖެނެރަލް އަލްއުސްތާޛު ހުސައިން ޝަމީމް ވަނީ މި މައްސަލަ ބެއްލެވި ގާޒީ އިސްމާއިލް ރަޝީދު މައްސަލައިގައި ހުކުމް ކުރެއްވިގޮތަށް ވަރަށް ބޮޑަށް ފާޑުވިދާޅުވެފައެވެ. އަދި އެބޭފުޅާގެ މައްސަލަ ޖޭއެސްސީއަށް ހުށައަޅުއްވާނެކަމަށްވެސް ވިދާޅުވިއެވެ.

އެގޮތުން ގާޒީ އިސްމާއިލް ރަޝީދު ކުރެއްވި ހުކުމްގައި ޕީޖީއިން ހުށަނާޅާ ލިޔެކިޔުންތަކުން ހުށަނާޅާ މައުލޫމާތުތަކަށާއި، ޝަރީއަތުގެ މަޖިލީހުގައި އަދީބު ވިދާޅުނުވާ ބަސްތަކަކަށް ރިއާޔަތްކުރައްވާފައިވާކަން ޕީޖީ ފާހަގަކުރެއްވިއެވެ. އެއީ ގާނޫނީގޮތުން ހަމަޖެހޭ ގޮތެއްކަމަށް ގަބޫލުފުޅު ނުކުރައްވާކަމަށްވެސް އެބޭފުޅާ ވިދާޅުވިއެވެ.

އަދި މީގެ އިތުރުން މި މައްސަލައިގެ ހުކުމްގައި ގާޒީ އެންމެ ތިންް ފޮޅުވަތް ލިޔުއްވާފައިވާތީވެސް ޕީޖީ ޝަމީމް އެކަމާއި މެދު ސުވާލު އުފެއްދެވިއެވެ. އެގޮތުން އެ ހުކުމް ކުރެއްވި ސަބަބެއް، ހަވާލާދެއްވި މާއްދާއެއް، އަދި ބާތިލް ކުރެއްވީ ކިހިނެެތްކަން އެނގޭކަށް ނެތްކަމަށްވެސް ޕީޖީ ވިދާޅުވިއެވެ