ޕަރަގުއާއީގެ ސެނެޓަރު ސެލެސްޓޭ އަމަރިއްލާ އަނެއްކާވެސް އެމްބާޕޭއަށް އަމާޒުކޮށް ބަހުގެ ހަމަލާތަކެއް ފޮނުވާލައިފިއެވެ.

ސެލެސްޓޭ އަމަރިއްލާ ދެވަނަ ފަހަރަށް އެމްބާޕޭއަށް ނިސްބަތްކޮށް ބަހުގެ ހަމަލާތަކެއް ފޮނުވާލާފައިވަނީ އެންމެ ފުރަތަމަ ޕޮސްޓްކުރި ވާހަކައަށް އެމްބާޕޭ ދިން ރައްދާ ގުޅިގެންނެވެ. ފްރާންސް އަތުް ޕަރަގުއޭ ބަލިވިމެޗަށްފަހު އަމަރިއްލާ ވަނީ އެމްބާޕޭއަށް ނިސްބަތްކޮށް ވަރަށް ކުޑައިމީސްކޮށް ވާހަކަދައްކާފައެވެ. އެގޮތުން އެމްބާޕޭއަކީ ލިޔަންކިޔަން ނޭނގޭ މީހެއްކަމަސް ބުނެ، އަމަރިއްލާ ވަނީ ނަސްލީގޮތުން ދިމާކޮށް ފުރައްސާރަކޮށްފައެވެ.

ޕަރަގުއޭގެ ސެނެޓަރު އެ ބީދައިން ވާހަކަދެއްކީ ފްރާންސް އާއި ޕަރަގުއޭ ބައްދަލުކުރިމެޗަށްފަހު އެޓީމްގެ ބައެއް ކުޅުންތެރިންނާ އެމްބާޕޭ ސަލާންނުކުރުމުންނެވެ. އެ މެޗްގައި ޕަރަގުއޭގެ ކުޅުންތެރިން ވަނީ އެމްބާޕޭއަށް ގަސްތުގައި ޖެހިގަނެ ކުޅިވަރުގެ ރޫހާ ހިލާފަށް އަމަލުތައް ބަހައްޓާފައެވެ. 

ސެލެސްޓޭ އަމަރިއްލާ ދެއްކި ވާހަކަތަކުގެ ރައްދުގައި އެމްބާޕޭ ވަނީ ކޯޓަށް މައްސަލަ ހުށަހަޅާނޭކަމަށް ބުނެފައެވެ. އެމްބާޕޭ ބުނީ އަމަރިއްލާއަކީ އެ މަޤާމަށް ކުފޫހަމަނުވާ، ދަށުދަރަޖައިގެ އަންހެނެއް ކަމަށެވެ. އަދި އޭނާއަކީ ޕެރަގުއޭ ތަމްސީލުކުރާ މީހެއް ނޫން ކަމަށާއި، އޭނާގެ މި ނާތަހުޒީބު ޢަމަލުގެ ސަބަބުން ޕެރަގުއޭގެ ކުޅުންތެރިން ކުރި ބުރަ މަސައްކަތުގެ މަތިން ދުނިޔެ ހަނދާން ނެތި، ޤައުމުގެ އަގު ވެއްޓިފައިވާ ކަމަށް އެމްބާޕޭ ފާހަގަކުރިއެވެ. އެމްބާޕޭ އިތުރަށް ބުނީ، ދުނިޔޭގައި ނަފްރަތާއި ނަސްލީ ތަފާތުކުރުން ފެތުރުމުގެ ފުރުޞަތު މިފަދަ މީހުންނަށް ނުދޭނެ ކަމަށެވެ

އެމްބާޕޭގެ މިވާހަކަތަަކަށް ރައްދު ދެމުން އަމަރިއްލާ ބުނެފައިވަނީ، އެމްބާޕޭ އަކީ ފްރާންސް މީހެކޭ ބުނެވެން ނެތްކަމަށާއި، ފްރާންސް މީހުންނަކީ މީހުންނަށް އިހްތިރާމްކޮށް ސަލާމްކޮށް އުޅޭ ބައެއްކަމަށެވެ. އަމަރެއްލާ ބުނީ އެމްބާޕޭ ދެއްކި ވާހަކަތަކަށް މައާފަށް ނޭދޭނަމަ އާނާވެސް ކޯޓަށް ދާނޭކަމަށެވެ. އަދި އަދާކުރާ މަގާމަށް ކުފޫހަމަނުވާ، ދަށުދަރަޖައިގެ އަންހެނެއް ކަމަށް ބުނުމުގެ އެއްވެސް ހައްގެއް އެމްބާޕޭއަށް ނޯންނާނޭކަމަށްވެސް އަމަރެއްލާ ބުންޏެވެ.

މީޑިއާގެ ބައެއް ރިޕޯޓްތައް ބުނާގޮތުގައި އަމަރެއްލާ ވަނީ ރޮނާލްޑީނިއޯ މިސާލަކަށް ނަގައި އެމްބާޕޭއަށް އިންޒާރުދީފައެވެ. އެގޮތުން ޕަރަގުއޭއިން ވާނީ ރޮނާލްޑީނިއޯވެސް ޖަލަށް ލާފައިކަަމަށް އަމަރެއްލާ ބުނިކަމަށް މީޑިއާތަކުން ވަނީ ރިޕޯޓްކޮށްފައެވެ. އެމްބާޕޭ އާއި އަމަރިއްލާގެ ވާހަކަ މީޑިއާގެ ސަމާލުކަމަށް އައިސްފައިވާއިރު، މި މައްސަލާގައި ގިނަބަޔަކު ތިބީ އެމްބާޕޭއާ ކޮޅަށްކަމަށް މީޑިއާ ރިޕޯޓްތައް ބުނެއެވެ.