މުއައްޒަފުންގެ މުސަރައާއި އިނާޔަތްތަކަށް ކުރި ހޭދަ އާއެކު އަހަރުގެ މިހާތަނަށް ބަޖެޓުން ކުރި ހޭދަ އިތުރުވެއްޖެއެވެ.

ފިނޭންސް މިނިސްޓްރީން ނެރެފައިވާ ވީކްލީ ފިސްކަލް ރިޕޯޓްގައި ބުނެފައިވަނީ، ޖުލައިމަހުގެ ދެވަނަ ދުވަހުގެ ނިޔަލަށް ދައުލަތުގެ ޖުމްލަ ހަރަދަކީ 23.4 ބިލިއަން ރުފިޔާ ކަމަށެވެ. މިއީ މިދިޔަ އަހަރުގެ މި މުއްދަތާ އަޅާއިރު 4.2 ބިލިއަން ރުފިޔާގެ އިތުރުވުމެކެވެ. މިދިޔަ އަހަރުގެ މި މުއްދަތުގައި ހަރަދުގެ ގޮތުގައި ރެކޯޑްކުރެވިފައިވަނީ 19.2 ބިލިއަން ރުފިޔާއެވެ.

ފިނޭންސުން ބުނީ އަހަރުގެ މިހާތަނަށް ކުރި ހޭދަ އިތުރުވެފައިވަނީ، މުވައްޒަފުންގެ މުސާރަ އާއި އިނާޔަތްތަކަށް ކުރި ޚަރަދު އިތުރުވުމުން ކަމަށެވެ. މީގެ އިތުރުން ސަބްސިޑީއަށް ކުރަންޖެހުނު ހަރަދު އިތުރުވުމަކީވެސް މި މުއްދަތުގެ ތެރޭގައި ހަރަދުތައް އިތުރުވުމުގެ އެއް ސަބަބެވެ.

ސަބްސިޑީއަސް ކުރި ހޭދަ އިތުރުވެފައިވަނީ، މެދުއިރުމަތީގައި ކުރިޔަށްދާ ހަނގުރާމައާ ގުޅިގެން ދުނިޔޭގެ ބާޒާރުގައި ތެލާއި އެހެނިހެން ތަކެތީގެ އަގުތައް އުފުލިފައިވީނަމަވެސް، ސަރުކާރުން ފޯރުކޮށްދެމުންދާ އަސާސީ ތަކެއްޗާއި ޚިދުމަތްތަކުގެ އަގު ހިފެހެއްޓުމަށް ގެންގުޅުނު ސިޔާސަތުގެ ތެރެއިންނެވެ. މިއަހަރުގެ މިހާތަނަށް ސަބްސިޑީއަށް އެކަނިވެސް 1.4 ބިލިއަން ރުފިޔާ ހޭދަކުރިކަމަށް ފިނޭންސްގެ ރިޕޯޓުން ދައްކައެވެ. ސަބްސިޑީއަށް ކުރި ހޭދަ އިތުރުވުމާ ގުޅިގެން ފިނޭންސުން ބުނީ މިއީ އާންމު ޚިދުމަތްތައް މެދުނުކެނޑި ފޯރުކޮށްދިނުމަށާއި ސިވިލް ސާވިސްގެ މުސާރައިގެ އިލްތިޒާމުތައް ހަމަހަމަކުރުމަށް ސަރުކާރުން ދޭ އިސްކަން ހާމަކޮށްދޭ ކަމެއް ކަމަށެވެ.

ފިނޭންސްގެ ރިޕޯޓަށް ބަލާއިރު މުސާރަ އާއި އުޖޫރައަށް ޖުމްލަ 3.7 ބިލިއަން ރުފިޔާ ޚަރަދުވެފައިވާއިރު، މިއީ މިދިޔަ އަހަރަށްވުރެ 13.9 އިންސައްތަ އިތުރު އަދަދެކެވެ. ހިނގަމުންދާ ޚަރަދު ނުވަތަ ރިކަރަންޓް އެކްސްޕެންޑިޗަރ 20.3 ބިލިއަން ރުފިޔާގައި ހުރިއިރު، ތަރައްޤީގެ މަޝްރޫޢުތަކަށް ކުރާ ކެޕިޓަލް ޚަރަދު ވަނީ 3.0 ބިލިއަން ރުފިޔާއަށް އިތުރުވެފައެވެ. މިއީ އުމްރާނީ ތަރައްޤީގެ މަޝްރޫޢުތަކަށް ސަރުކާރުން ކުރާ އިންވެސްޓްމަންޓްތައް އިތުރުވަމުންދާކަން ހާމަކޮށްދޭ ތަފާސްހިސާބެއްކަމަށްވެސް ފިނޭންސުން ބުންޏެވެ.

ފިނޭންސުގެ ރިޕޯޓަށް ބަލާއިރު، ޚަރަދުތައް އިތުރުވި ނަމަވެސް، ދައުލަތުގެ ޕްރައިމަރީ ސާޕްލަސްގެ ގޮތުގައި 1.7 ބިލިއަން ރުފިޔާ ވަނީ ރެކޯޑުކުރެވިފައެވެ. މިއީ ދަރަނި އަދާކުރުމާއި އިންޓްރެސްޓްގެ ޚަރަދުތައް ނުހިމަނައި، ދައުލަތަށް ލިބޭ އާމްދަނީން އާންމު ޚަރަދުތައް ހަމަޖެއްސޭނެކަން އަންގައިދޭ މިންގަނޑެއްކަމަށް ދެކޭކަމަށް ފިނޭންސުން ބުންޏެވެ.