ކޭޝް ކާޑު ބޭނުންކޮށްގެން ބަހަށް ފައިސާ ދެއްކޭނެގޮތް ހަދަނީ
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީން ދެމުންދާ ބަހުގެ ހިދުމަތުގައި ކޭޝް ކާޑުން ބަހަށް ފައިސާ ދެއްކޭނެ އިންތިޒާމް ހަމަޖެއްސުމަށް ކުރިއަށްގެންދާ އަޖުމަ ބެލުމުގެ ދަތުރުތައް ފެށުމަށް ތައްޔާރުވެއްޖެއެވެ.
އެމްޓީސީސީއިން ބުނީ އާރްޓީއެލް ބަހުގެ ހިދުމަތް ބޭނުންކުރާ ކަސްޓަމަރުންނަށް ކޭޝް ކާޑުން ބަހަށް ފައިސާ ދެއްކޭނެ އިންތިޒާމު ހަމަޖެއްސުމުގެ ގޮތުން ބާއްވާ ޓެސްޓް ދަތުރުތައް އޮންނާނީ ޖެނުއަރީ 1 ވަނަ ދުވަހާއި 2 ވަނަ ދުވަހުކަމަށެވެ.
މި ޓެސްޓު ބުރުތަކުގައި މާލެ ތެރޭގައި ދުއްވާ ބަސްތަކުގައި ކޮންޓެކްޓްލެސް މާސްޓާ ކާޑާއި ވިސާ ކާޑުގެ ބޭނުންކޮށްގެން ފައިސާ ދެއްކޭނެކަމަށް އެމްޓީސީސީން ބުނެއެވެ.
އެމްޓީސީސީން ދެމުންދާ ބަހުގެ ހިދުމަތަށް މިހާރު ފައިސާ ދެއްކެނީ އާރުޓީއެލް އެޕްލިކޭޝަން އަދި ބަސް ކާޑު މެދުވެރިކޮށް އެކަންނެވެ.
މިނީ ބަހުގެ ޚިދުމަތް ތައާރަފްކުރުމަކީ މި ސަރުކާރުގެ 100 ދުވަހުގެ ވައުދެކެވެ. މިއަހަރުގެ ސެޕްޓެމްބަރު މަހުގެ ތެރޭގައި މި ޚިދުމަތް ސަރުކާރުން ފަށާފައިވާއިރު، ގިނަ ބަޔަކު މިނީބަސް ބޭނުންކުރަމުންދާ ކަމަށް ސަރުކާރުން ވަނީ ހާމަކޮށްފައެވެ.
މާލެ ސަރަހައްދުގެ އިތުރުން އެމްޓީސީސީން އަންނަނީ މާލެ އާއި ލ. އަތޮޅާއި އައްޑޫ އަދި ފުވައްމުލަކުގައި ބަހުގެ ހިދުމަތް ދެމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
