ރައީސް ޔާމީން ވިދާޅުވިއޭ ކިޔާ ދޮގު ވާހަކަ ފަތުރަނީ ބަލިވާތަން ފެންނާތީ: އަބްދުއްރަހީމް
ރައީސް އަބްދުالله ޔާމީން އަބްދުލްގައްޔޫމު ވިދާޅުވިކަމަށް ބުނެ ސަރުކާރު އަޑީގައި އޮވެގެން ދޮގު ޚަބަރުތައް ފަތުރަމުން ދަނީ ސަރުކާރު ހިންގާ މައި ޕާޓީ އެމްޑީޕީގެ ކެންޑިޑޭޓު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ގޮތް ހުސްވެގެން ކަމަށް އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ.
އަބްދުއްރަހީމް މިފަދައިން ވިދާޅުވެފައި ވަނީ ނައިފަރުގައި ބޭއްވި ޑރ މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ.
އަބްދުއްރަހީމް ވިދާޅުވީ ރިޔާސީ އިންތިޚާބުގެ ވޯޓުލުމަށް ކުޑަތަންވަމުން އަންނައިރު، ސަރުކާރާއި ޑރ މުއިއްޒުގެ ވާދަވެރިން މަސައްކަތް ކުރައްވަމުން ދަނީ އެމަނިކުފާނު ބަދުނާމު ކުރުމަށް ކަމަށެވެ. އެގޮތުން ރައީސް ޔާމިނުގެ ނަންފުޅު ބޭނުންކޮށް ދޮގު ޚަބަރުތައް ފަތުރާ، ރައީސް ޔާމީނުގެ ތާއީދު ޑރ މުއިއްޒަށް ނެތްކަމަށް ބުނެ ތަފާތު ދޮގު ޚަބަރުތައް ފަތުރަމުންދާކަމަށް އަބްދުއްރަހީމް ވިދާޅުވި އެވެ.
އޭނާ ވިދާޅުވީ އެފަދައިން ދޮގު ޚަބަރުތައް ފަތުރަނީ ޑރ މުއިއްޒަށް އޮތް ތާއީދު ފެނި، މި އިންތިޚާބު އެމަނިކުފާނު ކާމިޔާބު ކުރައްވާނެކަން ޔަގީންވާތީ ގޮތް ހުސްވެގެން ކަމަށެވެ. ރައީސް ޔާމީން ބޭނުންފުޅުވާ ގޮތާއި އެމަނިކުފާނު އެދިވަޑައިގަންނަވާ ގޮތް ސަރުކާރަށް ވެސް، ސަރުކާރާއި ގުޅުންހުރި ފަރާތްތަކަށް ވެސް އަދި ސިޔާސީ ޕާޓީތަކަށް ވެސް ނޭނގޭނެ ކަމަށް އަބްދުއްރަހީމް ވިދާޅުވި އެވެ.
"އަޅުގަނޑު ލޮބުވެތި ރައްޔިތުންނަށް ދަންނަވާލަން ބޭނުންވާ ވާހަކައަކީ މި އޮތް 8 ދުވަސްތެރޭގައި ވަރަށް ގިނަ ގޮތްގޮތުން، ވަރަށް ގިނަ ވާހަތައް ފަތުރަމުން ގެންދާނެ. ރައީސް ޔާމިނު ވިދާޅުވިޔޭ.. ނޫނީ މެޑަމް ފާތުމަތު އިބްރާހިމް ވިދާޅުވިޔޭ... ނޫނީ މިވެނި މީހަކު ވިދާޅުވިޔޭ ކިޔައިގެން ވެސް ވާހަކަ ދައްކާނެ... އެ އުޅެނީ ހަދާނެ ގޮތް ހުސްވެގެން. ކުރާނެ ކަމެއް ނޭނގިގެން. ބޮޑުތަނުން ބަލިވެއްޖެކަން އަމިއްލަޔަށް ގަބޫލުކުރެވިގެން"
އަބްދުއްރަހީމް އަބްދުالله
އަބްދުއްރަހީމް ވިދާޅުވީ ރައީސް ޔާމިނުގެ ފުރިހަމަ ތާއީދު ޑރ މުއިއްޒަށް އޮތް ކަމަށެވެ. އެމަނިކުފާނު މި އިންތިޚާބުގައި ވާދަކުރައްވަނީ ރައީސް ޔާމިނުގެ ފުރިހަމަ ތއީދާއި އެކުގައި ކަމަށާއި، މި އިންތިޚާބު ޕްރޮގްރެސިވް ކޮންގްރެސް ކޯލިޝަނަށް ކާމިޔާބުކޮށްދެއްވުމަށް ރައީސް ޔާމިނު އެދިވަޑައިގަންނަވާކަމަށް އަބްދުއްރަހީމް ވިދާޅުވި އެވެ.
އޭނާ ވިދާޅުވީ ރައީސް ޔާމީން އެދިވަޑައިގަންނަވަނީ ރިޔާސީ ކެމްޕޭނު ވަރުގަދަކޮށް ހަރަކާތްތައް އިތުރުކޮށް، އެއްބުރުން ޑރ މުއިއްޒު އިންތިޚާބު ކުރެއްވުމަށް ކަމަށެވެ. އެހެންކަމުން ޑރ މުއިއްޒާއި ރައީސް ޔާމިނު ޖައްސާ، ޑރ މުއިއްޒުގެ ތާއީދު ފަނޑުކުރުމަށް މަސައްކަތް ކުރުމަކީ ބޭކާރު ކަމެއް ކަމަށާއި، އެފަދައިން ފަތުރާ ޚަބަރުތަކަށް ސަމާލުވުމަށް އަބްދުއްރަހީމް ވަނީ ސަޕޯޓަރުންނަށް ގޮވާލައްވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
