ގާސިމް ކިޔައި ދެއްވީ ކުއްޔާއި ލޯނު މަޢާފު ކޮށްދެއްވާނެ ގޮތް؛ އެދިލެއްވީ ގޮތް ބަލާލަން ވެރިކަން ހަވާލުކޮށްލަން!

ޖުމްހޫރީ ޕާޓީގެ ވެރިކަމެއްގައި ކުދި އަދި މެދުފަންތީގެ ވިޔަފާރިތަކަށް ދޫކޮށްފައި ހުރި ލޯނުތަކާއި ފްލެޓްތަކުގެ ކުލި މާފުކޮށްދޭން ވެވަޑައިގެންނެވި ވައުދު ފުއްދަވާނެ ގޮތް އެ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމް ހާމަކުރައްވައިފިއެވެ.

ގާސިމް ގެ ވެރިކަމެއްގައި ސަރުކާރުތަކުން ދޫކޮށްފައިވާ ހުރިހާ ފްލެޓުތަކެއްގެ ކުލި މައާފުކޮށްދެއްވައި، އެސްއެމްއީ ލޯނުތައް މައާފްކޮށްދެއްވާނެ ކަމަށް އެމަނިކުފާނު ވަނީ ވައުދުވެވަޑައިގެންފައެވެ. އެކަމާއި ގުޅިގެން ގިނަ ބަޔަކު އަންނަނީ އެއީ ކުރެވިދާނެ ކަމެއްތޯ ސުވާލު ކުރަމުންނެވެ.

އެފަރާތްތަކުގެ ސުވާލުތަކަށް ޖަވާބު ދެއްވަމުން ހުޅުމާލޭ ދެވަނަ ފިޔަވަހީގައި ޖުމްހޫރީ ޕާޓީގެ ޖަގަހަ ހުޅުވުމަށް ބޭއްވި ޖަލްސާގައި ވާހަކަފުޅު ދައްކަވަމުން ގާސިމް ވިދާޅުވީ، ވައުދުވެ ވަޑައިގަތީ އެކަން ކުރާނެ ގޮތް އެނގިވަޑައިގެން ކަމަށެވެ.

"އަޅުގަނޑު މާފު ކުރާނެ ވާހަކަ ބުނީމާ އެންމެން ބުނީ ކިހިނެއްހޭ އެ ދައްކާނީ. އަޅުގަނޑު ބުނީކީ ނޫނޭ އިރާދަކުރެއްވިއްޔާ އެ މާފުކުރާނަމޭ." ގާސިމް ވިދާޅުވިއެވެ.

މިއާއެކު ގާސިމް ވިދާޅުވީ ސަރުކާރުތަކުން ހިންގާ އެކިއެކި މަޝްރޫތައް މެދުވެރިކޮށް ކޮރަޕްޝަންގެ އަމަލުތައް ހިންގައި ރައްޔިތުންގެ ފައިސާއަށް ޚިޔާނާތްތެރި ވަމުންދާ ކަމަށެވެ. އަދި ލޯނުތަކާއި ކުލި މައާފްކޮށް ދޭނީ ސަރުކާރުތަކުން ކޮރަޕްޝަނަށް ހަރަދު ކުރާ ފައިސާ ރަނގަޅު ގޮތުގައި ބޭނުންކޮށްގެން ކަމަށްވެސް ވިދާޅުވި އެވެ.

ސަރުކާރުތަކުން ޕްރޮޖެކްޓްތަކުގެ ސައިޑުން ނަގާ ފައިސާ، ސަރުކާރުތަކުން ހިންގާ ކޮރަޕްޝަންގެ ފައިސާ ސަލާމަތް ކޮށްފިއްޔާ އެކަހަލަ ހައުސިން އަކަށް އެކަންޏެއް ނޫނޭ މާފުކޮށްދެވޭނީ. މިކަހަލަ އެސްއެމްއީ ލޯން އެކަންޏެއް ނޫނޭ މާފުކޮށްދެވޭނީ. އަދިވެސް އިތުރު އެއްޗެހި އެބަހުރި މާފުކޮށްދެވޭނެ. އެކަން އަޅުގަނޑު ކުރާނެތީ އަޅުގަނޑު މި ދަންނަވަނީ މާތް الله ގެ ވާގިފުޅާއެކު ވެރިކަން އަޅުގަނޑާ ހަވާލުކޮށްދެއްވައިފި ނަމަ އެކަން އަޅުގަނޑު ކޮށްދޭނަމޭ.

ގާސިމް އިބްރާހިމް

ގާސިމް އިތުރަށް ވިދާޅުވީ ކުރީގެ ސަރުކާރުން ދަރުމަވަންތަ ހޮސްޕިޓަލު އަޅަން ހަވާލުކުރީވެސް އަސްލު އަގަށްވުރެ 100 މިލިއަން ޑޮލަރު ބޮޑު ކޮށް ކަމަށެވެ.

"ވަރަށް ރަނގަޅެއްނު، އެއްކަލަހެން ލޯވަޅަށް ފައިބައިގެން މިދަނީ 100 މިލިއަން ޑޮލަރު. އެވެސް ބޮޑުވަރެކޭ އަޅުގަނޑު ސަރުކާރެއްގައި އެކަން ކުރިނަމަ އެ ކޮލިޓީގައި އެއަށް ވުރެ ރަނގަޅަށް އަޅުގަނޑު ހެދީމުސް 35 މިލިއަނާއި 40 މިލިއަނަށް އެންމެ ގިނަވެގެން."

ގާސިމް އިބްރާހިމް

ގާސިމް އިބްރާހީމް ވިދާޅުވީ އެންމެ ފުރަތަމަ ދުވަހުން ފެށިގެން މިއަދާ ހަމައަށްވެސް އެމަނިކުފާނު މަސައްކަތް ކުރެއްވީ ދިވެހި ރައްޔިތުންގެ ހެވާ ލާބައަށް ކަމަށާއި، މިއަދުވެސް މަސައްކަތް ކުރައްވަމުން ގެންދަވަނީ ރައްޔިތުންގެ ހައްގުގައި ކަމަށެވެ.

އެހެންކަމުން އެމަނިކުފާނުގެ ވެރިކަމެއްގައި ރައްޔިތުންގެ ފައިސާއަށް ޚިޔާނާތްތެރިވާނެ ކުޑަވެސް ޖާގައެއް ނުދެއްވާނެ ކަމުގެ ޔަގީންކަން ގާސިމް ދެއްވިއެވެ.